Ибн Сирин – тюшлернинъ табирджиси | ЦРО ДУМК

Четверг

28

марта

18
Рамазан
1445 | 2024
Утр.5:02
Вос.6:20
Обед.12:53
Пол.16:20
Веч.19:16
Ноч.20:34
Времена намазов
Календарь 2024

Намаз

Ибн Сирин – тюшлернинъ табирджиси

Опубликовано:

Эбу Бекир куньесинен белли Мухаммед бин Сирин Басра шеэрине, 653 сенеси дюньягъа кельди. Бабасы Энес сахабе олып, Ибн Маликнинъ азатлы къулу эди.
Ибн Сирин гузель тербие корип етишкен. Сахабелерден 30 инсаннен корюшип, субетлер кечирген. Хазрет-и Айше, Энес бин Малик, Зейд бин Сабит, Эбу Хурейре, Абдуллах бин Аббас, Эбу Саид Худри ве Эбу Дерда киби сахабелерден хадис-и шерифлер ривает эткен.
Хадис илиминде имамлыкъ дереджесине юксельди. Яни 300 000-ден зияде хадисни эзберден бильген алим олгъан.
О, тефсир, фыкъых илимлерини де теренден огренген ве шу сааларда да юксек дереджелерге еткен, онынъ замандашлары ве даа сонъраки алимлер оны эп макътавнен анъгъанлар.
Мухаммед бин Сирин узун бойлу, кениш омузлы, къара къашлы, къара козьлю, инджи тишли, гуль юзлю бир генч эди. Зариф, зевкълы кийинген ве эр даим чичек киби олгъан экен.
О, хадис илиминде ривает зынджырына буюк эмиет бере эди. О йылларынынъ талебелери онынъ шу хусусиетине пек дикъкъат этмей эдилер, амма, орталыкъ къарышкъанындан сонъра, оджасынынъ бу мукъайтлыгъыны анълагъан эдилер. Ибн Сирин аетлернинъ насыл адисе себебинен энгенини араштыра, тек сахабелерден эшиткенини талебелерине огрете эди. Озю буюк алим олса биле, бутюн меселелер боюнджа сахабелернен акъыл таныша эди.
Ибн Сирин тюшлерни нефсаний, шейтаний ве рахманий оларакъ сыныфландыргъан. Тюшлернинъ тесиринде къалгъан инсанларгъа: «Къулакъ асма, сен уяныкъ олгъанда, Аллах Таалянынъ эмирлерини эда этмеге тырыш», – деп, айта эди.
Бириси тюшюнде эркек ве къадынларнынъ агъыз ве эдеп ерлери муурьленген алда корьгенини тариф этти. Ибн Сирин бу тюшни эшитип кульген ве онъа: «Сен Рамазан айында муэззинлик япаджакъсынъ» – деп, тюшюни табир эткен. Тюшюнде домузларнынъ боюнына инджилер такъылгъаныны корьген бирине: «Сен базарда алтын сатасынъ, бундан сонъра ляйыкъ олмагъан кимселерге икмет огретмеге тырышма!» – деп, айткъан. Ибн Сирин эвинде эр джума татлы шейлер пиширип, эм бала-чагъагъа, эм кельген-кеткен инсанларгъа дагъытып, икрам эткен эди. Онынъ 41 дане баласы бар эди, ве олардан 40 баланынъ омюри о сагъ экенде кесильди. 40 баласыны джойгъан буюк алим бир кере биле «Уф» демейип: «Алгъан да О (Аллах), берген де О», – деп, айта эди.
Ибн Сирин олюмден ве эсап кунюнден пек къоркъа эди. Къабир, кефин акъкъында сёз юрсетильгенде, пек джиддий ола экен, юзю исе, киреч киби кесиле эди. Амма, алим джаныны пек раат берген. Аллах ондан разы олсун.

Алиме Абдулмеинова