Бизим севимли, яш достларымыз!
Сиз, Пейгъамберимиз Мухаммед Мустафа (саляллаху алейхи ве селлем) ким олгъаныны пек яхшы билесинъиз, иншаАллах.
О, ер юзюнде дюнья къурулгъанындан берли яшагъан бутюн адамлардан энъ аджайип инсан эди.
О, бизим сонъки ве энъ буюк Пейгъамберимиздир. Бу мубарек инсан акъкъында бильги алып, аятынен багълы икяелерни эшитип, Онъа нисбетен севгимиз даа чокъ арта.
Бизим Пейгъамберимиз балачыкъларны не къадар чокъ севгенини билесинъизми?
Севимли Пейгъамберимиз Мухаммед (саляллаху алейхи ве селлем) сизлер киби гузель балачыкъларны севген, оларнен эр фырсатта меракълангъан, селямлашкъан, ойнагъан, хаста олгъанларны зиярет эткен ве балачыкъларгъа энъ гузель тербиесини бергендир.
Пейгъамберимизнинъ (с.а.с.) озь балалары да бар эди. Олардан учь огълан: Касим, Абдуллах ве Ибрахим, ве дёрт къызчыкъ: Зейнеб, Рукие, Фатиме ве Умму-Кульсум.
Фатиме къызындан да 6 торунчыгъы бар эди. Пейгъамберимиз (с.а.с.) оларнен ойнамагъа, вакъыт кечирмеге пек севе эди.
Бир кере намаз къылмакъ ичюн джамиге киргенде сахабелер, Пейгъамберимизнинъ омузларына яслангъан балачыкъны корьдилер. Шу балачыкъ Пейгъамбернинъ (саляллаху алейхи ве селлем) Умаме адында торуны эди. Намаз башлагъанда, эр кес балачыкънынъ тюшмесини беклей эди, амма Пейгъамберимиз (с.а.с.) онынъ омузларындан тюшмеге истемеген, балачыкъны раатсыз этмейип, онынънен берабер намазыны башлады. Ве намазнынъ сонъуна къадар торунчыгъы Умаме озь къартбабасындан айырылмады.
Бакъынъыз, достларым!
Юреги мерхаметнен толу Пейгъамберимиз балачыкъларгъа биле урьмет косьтерген эди. Ибадет эткенде де, оларнынъ гонъюллерини къырмадан даврана эди.
Бундан да гъайры, Пейгъамберимиз (с.а.с.) балачыкъларны сыкъ-сыкъ зиярет этмеге де севе эди. Бойледже, оларгъа буюк инсанларгъа киби урьмет косьтере эди.
Балачыкълар яшагъан эвге киргенде, биринджиден: «Кучюк инсан къайда?» — деп, сорай эди. Ве «кучюк инсанчыкълар» севинип, Пейгъамберимизни (саляллаху ве селлем) къаршыламагъа ве Онынънен ойнамагъа чапып келе эдилер. Пейгъамбер Мухаммед Мустафа да балачыкъларнынъ башларыны сийпап, олар ичюн гузель дуалар япа эди.
ГУЛЬСУМ Ширинская