Акъмесджитте, №1 Тахкикъат изоляторында аньаневий динлер векиллерининъ махкюмлернен иш топлашувы олып кечти. Корюшювни Къырым Муфтисининъ Джезаларны иджра этюв федераль хызмети иле ишбирлик боюнджа муавини, Акъмесджит шеэрининъ баш имамы Мухаммед Исламов ве Рус Православ Килисесининъ Акъмесджит ве Къырым епархиясыны темсиль эткен иерей Илья Павлов кечирдилер.
Музакерелер махкюм къадынлар ве эркеклернен айры кечирильген ачыкъ сухбетлер шекилинде олып кечти. Корюшюв иштиракчилери дин эрбапларына дин, ахлякъ ве къыйын аят вазиетлери акъкъында оларны меракъландыргъан суаллерни бермеге имкян таптылар.
Мухаммед Исламов топлангъанларгъа Къырым Муфтиси хаджы Эмирали Аблаевден селямыны ве дестек сёзлерини еткизди ве муфтилигимизнинъ ичтимаий ве маариф фаалиети акъкъында тариф этти. Бундан гъайры, китапханеге диний китаплар теслим этильди.
Зияретнинъ муим макъсатларында бири – аписханеге махкюмлерге ёлланылып кельген диний китапларнынъ тешкерилюви олды.
Къырым МДИ матбуат хызмети