Акъмесджитте, №1 тюзетюв колониясында динлерара иш группасынынъ иш корюшюви олып кечти. Тедбирде Къырым Муфтисининъ муавини Мухаммед Исламов ве Къырымдаки Джезаларны иджра этюв федераль хызмети идареси (УФСИН) башлыгъынынъ инангъанлар иле чалышув боюнджа ярдымджысы, протоиерей Роман Цуркан иштирак эттилер.
Корюшювнинъ баш макъсады – аписханедеки эки диний объектнинъ, – джами иле православ килисенинъ чалыштырма шараитини ве къыш мевсимине азырлыкъларыны козьден кечирмек олды.
Зиярет черчивесинде Мухаммед Исламов колонияда джеза чеккен мусульманларнен корюшти. Корюшюв эснасында о, диндашларымызгъа мубарек учь айларнынъ башланувы, шу айларгъа кирген Реджеп, Шабан ве Рамазан айларынынъ динимиздеки ери ве бу айларда япыладжакъ эйиликлернинъ къыймети акъкъында тариф этти.
Зиярет иле корюшювде сонъ, динлернинъ векиллери келеджек йылгъа да умумий иш планыны бельгиледилер.
Къырым МДИ матбуат хызмети