1944 sene, mayıs 18 künü qırımtatar halqınıñ zorbalıqnen sürgünliginiñ hatırası künü “Qırım halqlarınıñ ğayrıdan tiklenüv yolu” hatıra külliyesinde, Bağçasaray rayonınıñ “Süren” turağında gülçemberler qoyuluvı merasimi olıp keçti. Merasim sükünet daqiqasınen başlandı.
Qırım Cumhuriyeti ve Sevastopol şeeri Müftisi hacı Emirali Ablayev qayd etkeni üzere, zorbalıq timsali sürgünlik 79 yıl evelsi olıp keçti, amma onıñ acısı alâ daa keçmedi. Bunen beraber, bugün bütün Qırım sakinleriniñ aydın kelecekke ümüti bar.
“Mayıs 18-ni – matem kününi ne biz, ne de balalarımız iç bir vaqıt unutmamız. Unutıp olamamız. Biz qıyınlıqlarğa dayanamayıp, sürgünlik yollarında, sürgünlik yerlerinde can bergen semetdeşlerimiz içün dualar etemiz. Bugün, matem künü, yanımızda diger dinlerniñ vekilleri de bar. Biz olarğa minnetdarlığımıznı bildiremiz, bizni dostane munasebetler birleştire. Bu ise, bizim birligimizni köstere”, – dedi Qırım Müftisi.
Hatıra merasiminde Qırım Cumhuriyetiniñ Başlığı Sergey Aksönov de iştirak etti. O, sürgünlikniñ adaletsiz ve cinaiy olğanını qayd etti.
Sürgün etilgen Qırım halqlarınıñ hatırasını añmaq içün diniy ve milliy birleşmelerniñ temsilcileri, din, cemaat ve medeniyet erbapları toplandı. Ürmetli musafirler hatıra külliyesindeki ekspozitsiyanı ziyaret ettiler.
Qırım MDİ matbuat hızmeti