Акъмесджит ве Къырым епархиясында XXXIV Халкъара Милят окъувларынынъ региональ этапы пленар топлашувы олып кечти. Бу сененинъ мевзусы – «Маариф ве ахлякъ: шахсиетнинъ шекилленюви ве земаненинъ мушкюллери» – Къырымда «Къорантадаки проблемалар» призмасындан ачыкъланды.
Мектеп ве бала багъчаларынынъ мудирлерини, педагогларны, рухиятчыларны, дин эрбапларыны, ана-бабалар джемаатчылыгъынынъ ве акимиет органларынынъ векиллерини топлагъан ишбу форум аньаневий къоранта къыйметлерини пекитмек боюнджа ачыкъ диалог къурмакъ ичюн бир мейдан олды.
Дискуссиянынъ ёнюни епархиянынъ кятиби протоиерей Иоанн Пристинский иле Къырым тахсиль, илим ве яшлар назирининъ муавини Илья Донченконынъ чыкъышлары бельгиледи. Олар кениш даиредеки меселелерни котердилер: демографик бухранны ашып кечмек меселесинден башлап, земаневий джемиетте къорантанынъ юксек образыны янъыдан тиклемек меселесине къадар.
Къырым Муфтиси адындан Къырым Джумхуриети ве Севастополь шеэри мусульманлары диний идаресининъ диний тедбирлерни тешкиль этюв болюгининъ рехбери Зенифе Аблаева чыкъышта булунды. О, къайд этти ки, кучьлю девлетнинъ темели – къавий къорантадыр.
«Къорантанынъ проблемалары – девлетнинъ проблемаларыдыр. Къорантанынъ къавий, муаббет ве бахтлы олмасы – девлетнинъ кучьлю олмасы демектир. Айны шу себептен девлетимизнинъ Президенти аньаневий къыйметлерге, къоранта муэссисесининъ сакъланылувына, маневий-ахлякъий тербиеге ве джемиетимизни бозмайджакъ, аксине, инкишаф эттиреджек ориентирлерге чокъ буюк дикъкъат айыра. Бугунь бизге ят олгъан ве Русие менталитетине терс кельген авропаий къыйметлернинъ нелерге алып баргъаныны пек яхшы коремиз. Бахтсыз ве ачувлы бала – севги корьмеген, агрессив муитте оськен баладыр. Мусульман ве православ дин эрбаплары оларакъ, бизим вазифемиз – эйилик урлукъларыны сачмакъ, маариф ёлунен динлерара диалогыны къурмакъ ве яратыджы олмакътыр. Бугунь де бугунь биз Тахсиль назирлигинен берабер, мектеплерде диний сухбетлер кечирип, яш несильни тербиелемек ве балаларда къатты ватандашлыкъ мевамны шекиллендирмек керекмиз», – деп, къайд этти Зенифе Аблаева.
Мектеплерде аиле къыйметлерининъ ашыланувы боюнджа амелий иш акъкъында Тахсиль назирлигининъ болюк рехбери Геннадий Швейдель тариф этти. Къырымда бала акълары боюнджа месулиетли Светлана Савченко озь чыкъышында къайд этти ки, – «баланынъ энъ буюк акъкъы – догъмакъ акъкъыдыр», ве тек балаларнынъ дегиль де, ана-бабаларнынъ маарифине де буюк дикъкъат айырылмакъ кереклигини бельгиледи. Озь теджрибелеринен пайлашып, топлашувгъа айры бир джанлылыкъны чокъ балалы бабалар – папазлар Роман Колеснёв ве Михаил Шепельский къоштылар, олар къоранта аятынынъ къуванчлары ве мушкюллеринен пайлаштылар. Рухиятчылар Таисия Данилова иле Игорь Тимощук чалышкъан ве планлаштырылгъан аилелерге рухий дестек программалары акъкъында тариф эттилер. Православ къадынлар бирлешмесининъ Къырым болюги рехбери Марина Хомич бутюн тахсиль деврелеринде – бала багъчасындан алий окъув юртларына къадар «Къоранташынаслыкъ» курсунынъ кирсетилюви кереклиги акъкъында тесирли бир нутукъ иле чыкъышта булунды. Чыкъышта булунгъанларнынъ ве марузаларынынъ фаркълылыгъы аиле сакълавы меселесинде динлернинъ бирдемлигини косьтерди.
Топлашув нетиджесинде эр кес бир анълайыш этрафында бирлешти, – демографик ве ичтимаий мушкюллернинъ чезильмеси анджакъ джемиетнинъ темели олгъан къорантанынъ сакъланылувы ве пекитильмеси макъсады этрафында бирлешкен девлетнинъ, тахсиль системасынынъ ве ватандашлыкъ муэссиселерининъ умумий ишбирлиги саесинде мумкюндир.
Къырым МДИ матбуат хызмети