Къырым Муфтисининъ Джезаларны иджра этюв федераль хызмети идареси (УФСИН) иле ишбирлик боюнджа муавини Мухаммед Исламов ве шу идаре башлыгъынынъ инангъанлар иле чалышув боюнджа ярдымджысы, протоиерей Роман Цуркан Акъмесджит шеэрининъ №2 тахкикъат изоляторында динлерара иш группасынынъ чалышмасы черчивесинде иш корюшювини кечирдилер. Ишбу топлашув тахкъикъаттан кечкен мусульманларнынъ ве ортодокс христианларнынъ аризасынен кечирильди, чюнки олар озьлери дин эрбапларынен корюшмеге истегенлерини бильдирдилер.
Сухбет девамында иштиракчилер дин ве инангъанларгъа косьтерильген маневий дестек меселелерини музакере эттилер. Мухаммед Исламов тахкъикъаттан кечкенлернинъ маневий тарафтан олгъунлашмасы ве дестекленмеси ичюн бойле корюшювлернинъ муимлигини къайд этти.
«Биз сизге бу къыйын вазиетте дестек косьтермек ве ярдым этмек ичюн мындамыз. Дин – бу кучь ве умют менбасыдыр, о, сизинъ рухий алынъызгъа пек тесир эте биле», – деди Мухаммед Исламов.
Тедбирнинъ сонъунда иштиракчилер, бирликнинъ ве келеджекке умютнинъ нишанеси оларакъ, берабердже дуа яптылар.
Къырым МДИ матбуат хызмети