Акъмесджиттеки Буюк Джума джамиде тахсиль джереянына аньаневий Русие къыйметлерининъ интеграциясы меселелерине багъышлангъан тёгерек маса кечирильди. Тедбирде тахсиль ве дин саасында чалышкъан мутехассыслар топланып, яшларнынъ тербиесинде земаневий усулларнынъ къулланылувыны музакере эттилер.
Тёгерек масанынъ мевзусы – «Талебелерни аньаневий Русие къыйметлерине джельп этмек ичюн земаневий концептуаль усулларнынъ къулланылувы». Тедбирде маневий-ахлякъий тербиелев саасында чалышкъан оджалар, «Информацион-усулий меркез» профессиональ къошма тахсиль муниципаль бюджет муэссисесининъ усулшынаслары, диний идаремизнинъ дин эрбаплары, православ килисесининъ векиллери иштирак эттилер.
Къырым Джумхуриети ве Севастополь шеэри мусульманлары диний идареси земаневий джемиетте маневий-ахлякъий тербиесининъ муимлигини айрыджа къайд эте. Тёгерек масада эсас дикъкъат яш несильнинъ Русие медениетининъ темелинде олгъан къыйметлерни анъламасына ве менимсемесине ярдым этеджек янъы ильмий усулларнынъ ишлеп чыкъарылмасына айырылды.
«Бизим вазифемиз – тек бильгилерни еткизмек дегиль де, балаларгъа чокъмиллетли улькемизнинъ тарихына ве аньанелерине урьметнинъ косьтерильмесине эсаслангъан къавий маневий мисаллер бермектир», – деп, къайд этти муфтилигимизде диний тедбирлерни тешкиль этюв болюгининъ рехбери Зенифе Аблаева.
Ишбу тёгерек маса эр бир талебенинъ эр тарафтан аэнкли бир шекильде инкишаф этмесине ве тахсиль системасынынъ эйилешмесине ёнелик умумий къарарларнынъ ишленип чыкъарылмасы ве теджрибе пайлашувы ичюн муим бир мейдан олды. Бу тек музакере мейданы дегиль, айны вакъытта, иштиракчилер арасында профессиональ багъларнынъ къурулмасы ичюн гуезль бир фырсаттыр. Бунъа эсасен, тедбирде ишленип чыкъарылгъан усуллар илериде тахсиль муэссиселеринде даа эффектив шекильде менимсенильмеси мумкюндир.
Къырым МДИ матбуат хызмети