Къырым пайтахтында, маневий бирлик ве мубарек Рамазан айы муитинде къадынларнынъ джумхуриет хайрие ифтары олып кечти. Артыкъ аньаневий олгъан бу парлакъ вакъиа Къырым Джумхуриети ве Севастополь шеэри мусульманлары диний идареси эркянында чалышкъан «Алем-и нисван» къадынлар ислямий медений-маариф меркези тарафындан тешкиль этильди.
Акъшамнынъ баш гъаеси, эр вакъыт олгъаны киби, мерхаметлик олды. Ифтарнынъ эсасыны «Мерхаметлик лялеси» акциясыны дестеклеген хайрие ярмалыгъы тешкиль этти. Бу сене акция 5 йыллыкъ юбилейини къайд эте. Бу йыллар девамында ляле чичеги шефкъатнынъ ве ярдымнынъ керчек тимсали олды. 2026 сенеси бутюн топлангъан паралар агъыр хаста балаларны тербиелеген къоранталаргъа ве МАО иштиракчилерининъ къоранталарына ёлланыладжакъ.
Зал буюк севги иле безетильди, оны балалар ве буюклер тарафындан кягъыттан, къумачтан ве боюнджакълардан япылгъан лялелер яраштырды. Эр бир чичек тек бирер ильван олмакъта къалмайып, ярдымгъа чагъыргъан бир нида олды.
Акъшамны «Алем-и нисван» меркезининъ рехбери Зенифе Аблаева ачып, ифтарда булунгъанларны маневий арынув ве джумертлик айы – Рамазан айынен хайырлады. Бундан да гъайры, о, къайд этти ки, залда фаркълы миллет векиллеринден мусафирлер топланды, бу исе, достлукъ ве динлерара барышыкълыкънынъ тимсалидир.
«Бугунь залымызда садедже мусафирлер дегиль де, энъ гузель къадынлар топланды. Эр биринъиз уникальсинъиз ве истидатлысынъыз. Айны сизинъ энергиянъыз бизим эйи ниетлеримизни реаль ишлерге чевире. Бу мубарек акъшамны сизнен берабер кечирмектен пек мемнюним», – деп, къайд этти Зенифе Аблаева.
Айры тешеккюрлер исе, озь мевамы, иджады ве профессионаллигинен этрафтакилерге ильхам берген къадынларгъа бильдирильди, бу къадынлар фаркълы номинацияларда такъдирлендилер. Келеджек несиллерни тербиелеген ве оларгъа диний бильгилер огреткен дин оджалары да айрыджа къайд этильди. Оларнынъ буюк эмеклери келеджегимизнинъ темелидир.
Акъшамнынъ урьметли мусафирлери арасында «Рус бирлиги» больгелерара джемаат тешкилятынынъ рехбери Елена Аксёнова да олды. О, тешкилятчыларгъа давет эткенлери ичюн тешеккюр бильдирип, бойле тедбирлернинъ муимлигини къайд этти.
Ифтарнынъ медений программасы акъшамны яраштырды. Мусафирлер миллий оюнлардан ве иляхийлерден зевкъ алдылар. «Алем-и нисван» меркезининъ тарихы ве чокътарафлы фаалиети, къадынлар ичюн азырлангъан ильк меджмуанынъ тарихы ве «Мерхаметлик лялеси» акциясынынъ беш йыллыгъы акъкъындаки видеолевхалар сейирджилерге айры шекильде тесир этти.
Акъшам ифтарнен екюнленди, амма ондан сонъра да мусафирлер даа чокъ таркъамайып къонуштылар. Сыджакъ ве гонъюльден бир муитте тебессюмлер ве илеридеки эйи ишлер ичюн планларнынъ музакереси укюм сюрди.
Къырым МДИ матбуат хызмети