Къырымнынъ пайтахтында Арбий шурет кунюне ве Гонъюлли кунюне багъышлангъан тантаналы хатыра тедбири олып кечти. Тедбирнинъ тешеббюсчиси – Къырым Джумхуриети ве Севастополь шеэри мусульманлары диний идареси, Ислям медениети, илими ве тахсилине дестек фонду исе, дестек косьтерди.
«Юректе иман, тильде дуа иле гъалебени якъынлаштырамыз!» ады астында кечирильген тедбир Русие Федерациясынынъ гимнинен башланды. Залда сиясет ве джемаат эрбаплары, дин эрбаплары, махсус арбий операциянынъ ветеранлары, гонъюлли аскерлер, волонтёрлар ве джебхеге ярдым эткен, арбийлернинъ къоранталарына дестек берген кимселер топландылар.
Къырым Джумхуриетининъ Башлыгъы Сергей Аксёнов адындан Къырым Джумхуриети Назирлер шурасы Башлыгъынынъ муавини, Ички сиясет, малюмат ве багъ назири Альберт Къуршутов эляк олгъан къараманларнынъ къоранталарына хатыранамелерни ве мектюплерни такъдим этти. Бундан да гъайры, ал-ы азырда ватандашлыкъ борджуны эда эткен къараманларнынъ къоранталарына да тешеккюрнамелер берильди.
Мукяфатландырылгъанларнынъ джедвели:
- Рашитов Зекки Зеккиевичнинъ къорантасы (09.08.2005 с.д., 25.07.2024 куню эляк олды).
- Къуртаметов Энвер Ягьяевичнинъ къорантасы (30.06.1980 с.д., 2022 с., сентябрь 2 куню эляк олды).
- Муратов Нариман Энверовичнинъ къорантасы.
- Ниметулаев Арсен Анафиевичнинъ къорантасы (23.09.1971 с.д., 16.10.2024 куню эляк олды).
- Нафиев Эльведдин Руслановичнинъ къорантасы (08.12.1996 с.д.), мобилизация этильген, МАО иштиракчиси.
- Сейдаметов Муслим Савриевичнинъ къорантасы (09.08.2002 с.д.), МАО иштиракчиси.
Къырым Джумхуриети ве Севастополь шеэри Муфтиси адындан тедбир мусафирлерини муфтилигимизнинъ диний тедбирлерни тешкиль этюв болюгининъ рехбери Зенифе Аблаева селямлады.
«Энди экинджи сенедир биз бойле эпимиз ичюн муим тедбир кечиремиз. Биз арбийлеримизнинъ эмсальсиз къараманлыгъына урьмет косьтермек ичюн топлаштыкъ, оларнынъ инамы ве джесюрлиги Гъалебемизни якъынлаштыра. Ве, мында, джебхе аркъасында, эллери ве юреклери эйилик япкъан бутюн гонъюллилерге де буюк тешеккюрлер бильдиремиз».
Зенифе Аблаева диний идаремизнен джебхеге гуманитар ярдымларны топлап ёлламакъ ичюн фааль чалышкъан гонъюллюлерге де тешеккюрнамелерни такъдим этти.
Муфти муавини Раим Гъафаров эляк олгъан ве хызметке девам эткен арбийлернинъ къоранталарына тешеккюрнамелерни такъдим этип, оларгъа дестек сёзлерини бильдирди.
«Аскерлернинъ аналары – Ватан къараманларына» джемаат тешкиляты Къырым мусульманлары диний идаресининъ гонъюллилерине миннетдарлыкъ бильдирип, оларгъа озь тешеккюрнамелерини такъдим этти. Бундан да гъайры, Алмагуль Къасымова рехберлигиндеки «Кафа» («Кефе») гонъюллилер такъымынынъ фаалиетчилерининъ, «Къырымнынъ аналары Ватан аскерлерине» актив ватандашлыкъ мевамынынъ шекиллендирильмесине ве ордугъа ярдым Къырым Джумхуриети джемаат тешкилятынынъ, «Къырым Джумхуриетинде Ватан аскерлерининъ къоранталары комитети», «Дюньянынъ эйилиги – Къырым гонъюллилери», «Имкянлар такъымы» тешкилятларынынъ фаалиети такъдирленди.
Тедбир концерт программасынен екюнленди, тедбир иштиракчилери келеджек Гъалебе умюти этрафында бирлешти.
Къырым МДИ матбуат хызмети