Къырым Джумхуриети ве Севастополь шеэри мусульманлары диний идареси диний тедбирлерни тешкиль этюв болюгининъ рехбери Зенифе Аблаева Къырым Джумхуриети Тахсиль, илим ве яшлар назирлигинде олып кечкен иш мушавересинде иштирак этти. Тедбир видеоконференция багъы шекилинде олып кечти.
Музакеренинъ эсас мевзусы – Къырым Джумхуриетининъ умумтахсиль мектеплеринде эр йыллыкъ «Мерхаметлик лялеси» хайрие акциясы черчивесинде хайрие тедбирлерининъ тешкиль этильмеси ве кечирильмеси олды.
Мушавере иштиракчилери келеджек тедбирлернинъ планыны, Диний идаре иле тахсиль идарелери арасында ишбирлик механизмлерини ве мектеп талебелеринен яш несильде шефкъат, мерхаметлик ве ярдымлашув дуйгъуларынынъ тербие этильмесине ёнелик кечириледжек маариф ишининъ форматларыны тафсилятлыджа музакере эттилер.
«Мерхаметлик лялеси» киби акцияларда иштирак этмек балалар ичюн гъает муимдир. Бу садедже ярдым параларыны топламакъ дегиль, мында тербие тесири бар. Бойле тедбирлер балаларымызны мерхаметли олмакъ ве ярдымгъа мухтадж олгъанларгъа ярдым къолуны узатмакъ огрете», – деп, къайд этти Зенифе Аблаева.
«Мерхаметлик лялеси» эр йыллыкъ хайрие акциясы, аньаневий оларакъ, агъыр хаста балаларгъа ве Махсус арбий операция иштиракчилерининъ къоранталарына ярдым этмек ичюн кечириле.
Къырым МДИ матбуат хызмети