Бугунь Акъмесджитте сабыкъ Акъмесджит ве Къырым Митрополити Лазарьнен ведалаштылар. Александр Невский адына кафедраль килисесинде олып кечкен ведалашув мерасиминде Къырым мусульманларынынъ Муфтиси хаджы Эмирали Аблаев де иштирак этти.
Къырым Муфтиси чокъ йыллар девамында Митрополит Лазарьнен берабер маневий инкишаф ве аньаневий къыйметлернинъ сакъланувы саасында чалышты.
«Биз Митрополит Лазарьнен чокъ шейден кечтик, онынъ икмети саесинде фаркълы къыйынлыкъларгъа, мушкюллерге огърамадыкъ. Митрополит Лазарь – Къырым джемиетинде укюм сюрьген динлерара барышыкълыкънынъ ве муаббетликнинъ тимсалидир десек, догъру олур», – деп, къайд этти Муфти эфенди ве къошты: «Онынъ айдын хатырасы даима юрегимизде ве бутюн Къырым сакинлерининъ юреклеринде къаладжакъ».
Акъмесджит ве Къырым Митрополити Лазарь отуз йыл девамында вазифесини эда этти, о, 1992-2023 сенелери девамында Къырым митрополиясыны идаре этти.
Къырым МДИ матбуат хызмети