Акърусиеде буюк такъдир иле «Акърусиеде Къырым куньлери» халкъара форумы олып кечти. Бу тедбир Къырым иле къардаш белорус халкъы арасындаки достане мунасебетнинъ къавийлешмеси ичюн муим бир вакъиа олды. Форум черчивесинде кутьлевий корюшювлер олып кечти, корюшювлерде фаркълы сааларда ишбирлик меселелери музакере этильди.
Форум иштиракчилери Минск, Гродно ве Ивье шеэрлерини зиярет эттилер. Шу шеэрлерде Къырым такъымларынынъ концертлери олып кечти, иштиракчилер, эм де, ерли акимиет векиллеринен ве Русие Федерациясынынъ февкъуляде ве векялетли эльчиси Борис Вячеславович Грызловнен корюштилер. Бундан да гъайры, Беларусь Джумхуриети Муфтиси Эбу Бекир Юхьянович Шабановичнен де корюшюв тешкиль олунды, бу исе, динлерара диалогнынъ муимлиги косьтере.
Къырым Муфтисининъ муавини Раим Гъафаров форумнынъ нетиджелерини чыкъарып, бойле къайд этти: «Къардаш белорус халкъынен достане мунасебетни къурмакъ гъает муимдир. Биз буюк корюшювлер кечирдик, муим нетиджелерге ириштик. Акърусие иле ишбирлик меселелерини музакере эттик ве, энъ муими, артыкъ алты асырдыр Акърусиеде яшагъан къырымтатарларнен яхшы диалог къурдыкъ. Илеридеки мунасебетимизнинъ инкишаф этмесине ве халкъларымыз арасындаки багъларнынъ къавийлешмесине умют этемиз».
Эр учь шеэрде Улу ватан дженкининъ къахраманларына багъышлангъан абиделерге гульдестелер къоюлды. Минскте – «Минск – къахраман шеэр» обелискине, Гроднода – Совет аскерлери ве партизанларынынъ къардаш мезарлыгъына, Ивьеде исе, – «Улу Ватан дженкинде эляк олгъан семетдешлеримиз шерефине» хатыра абидесине.
Форум Къырым ве Акърусие арасында медений ве тарихий ишбирликнинъ теренлешмесине ёнелик муим бир адым олып, илеридеки ишбирлик ичюн янъы уфукълар ача.
Къырым МДИ матбуат хызмети