“Alem-i nisvan” (“Qadınlar dünyası”) islâmiy medeniy-maarif
qadınlar merkezi tantanalı müitte resmiy açılışını keçirdi. Merkez Qırım
Cumhuriyeti ve Sevastopol şeeri musulmanları diniy idaresi erkânında
çalışa.
Tedbirniñ musafirlerine merkezniñ tahsil ve medeniy programması
numayış etildi: İslâm temelleri ve Quran oquvı kursları, qırımtatar tili
dersleri, “mıqlama” – ananeviy nağış dersleri, massaj ve hacamat
kursları, qadınlar içün fitnes, qırımtatar tarihı ve medeniyeti, qadın
sağlığı boyunca lektsiyalar, dülberlik, makiyaj ve özüne baqım boyunca
dersler tsiklı, bundan da ğayrı, balalar içün inkişaf dersleri. Merkezniñ
açılışı çerçivesinde er bir oca öz kursu aqqında tarif etti ve suallerge
cevap berdi.
Qadın-qızlarnı”Alem-i nisvan” merkeziniñ rehberi Zenife
Ablayeva selâmladı.
“Arzum ömürge keçti, men buña pek quvanam. Bugün biz Alem-i
nisvan” medeniy-maarif merkezimizniñ qapularını açtıq. Mında er bir
qadın faydalı bilgiler qazana bilir, bir-birinen qonuşa bilir,
tecribelerinen paylaşa bilir. Yañı bina, donatılğan sınıflar, – qadın-
qızlarımıznıñ muvafaqiyetnen inkişaf etmesi içün kerek olğan şarait
azırlandı", – dep, qayd etti Zenife Ablayeva.
Musafirler içün sanat ve el işi ustalarınıñ sergi-yarmalığı, el yapma
ziynetler, musulman parfümeriyası, İsmail Gasprinskiy adına
mediamerkezniñ kitapları taqdim etildi. Qırımtatar yırcısı Mavile
Abkerimova öz yırlarını icra etti,”Ateş”ansambliniñ oyuncısı “Tım-tım”
milliy oyunınen çıqışta bulundı. Qadınlar kösterilgen qadınlar içün
“Kiyafet” urba kollektsiyasına yüksek qıymet kestiler, bayramnıñ yaş
musafirleri içün animatorlar azırlağan eglence programması keçirildi.
Tantanalı tedbirden soñ musafirler arasında viktorina keçirildi,
ğalipler bahşışlar ile taqdirlendi. Musafirler içün tatlı sofra donatıldı.
Qadınlar merkezi Aqmescit şeeri, Klara Tsetkin soq., 34 (Seyit
Settar camisiniñ külliyesi) adresi boyunca yerleşe.
Merkezniñ resmiy içtimaiy ağları:
TG: https://t.me/aleminisvan
VK: https://vk.com/aleminisvan
OK: https://ok.ru/profile/583389121880
Qırım MDİ matbuat hızmeti