Aqmescit rayonınıñ Molodöjnoye mikrorayonı camisinde tantanalı müitte İslâm temelleri ve Quran oquvı kurslarınıñ mezunlarına Quran nushaları ediye etildi. 10 qadın ve bala tahsil programmasınıñ birinci basamağından keçip, arap elifbesi ögrendiler ve Quranğa keçtiler.
Toplanğanlarnı Qırım Müftisi hacı Emirali Ablayev adından bu mubarek yolda birinci yeñişleri ile cami imamı İbraim Alidinov ve QMDİ “Faydalı ilim” diniy maarif leyhasınıñ rehberi Zeyneb Bairova hayırladılar. Olarnıñ qayd etkenine köre, bu – Quran oquvınıñ birinci başlanğıç basamağı olsa da, pek müimdir, çünki Allah Kelâmını ögrenüv yolunı aça.
Dersler 2020 senesi, iyül ayında başlandı. Kurslarnıñ ekinci basamağında talebeler Quran oquvını ileriletecekler, tecvid qaidelerini ögrenecekler, sure ve ayetlerniñ manalarını ögrenecekler.
Derslerni Qırım Cumhuriyeti ve Sevastopol şeeri musulmanları diniy idaresiniñ İslâm temelleri ocası Ayşe Duran alıp bara.
Hatırlatamız, “Faydalı ilim” diniy maarif leyhası çerçivesinde İslâm temelleri ve Quran oquvı kursları bütün Qırım boyunca keçirile. Tafsilâtlı malümat içün yerli camilerge muracaat etiñiz.
Qırım MDİ matbuat hızmeti