Aqmescitte, Qırım Cumhuriyetiniñ Devlet akademik muzıka teatrında “Müfti.Dua ile” bediiy filminiñ prezentatsiyası olıp keçti. Film Qırım Cumhuriyeti ve Sevastopol şeeri musulmanları diniy idaresiniñ hadimleri tarafından çıqarıldı. Tedbir Qırım musulmanları diniy idaresiniñ 30 yıllığı ve Qırım Müftisi hacı Emirali Ablayevniñ 60 yıllığına bağışlandı.Emirali efendi 1999 senesinden başlap, qırımtatar halqı ve yarımadadaki bütün musulmanlarınıñ eyiligi oğrunda Müfti vazifesinde çalışa.
Musulmanlarnıñ ananesine esasen, merasim duanen başlandı.Soñra sözge Qırım Cumhuriyetiniñ başlığı Sergey Aksönov çıqıp, Qırım musulmanlarınıñ diniy yetekçisini hayırladı ve oña uzun ömür tiledi.Qırım Cumhuriyeti Devlet Şurasınıñ başlığı Vladimir Konstantinov hayırlav sözlerinde Müftiniñ öz halqına sadaqatını, çoqmilletli yarımadamızda bütün sakinleriniñ eyiligi içün çalışmaq ve icat etmek istegini qayd etti.Qırım Cumhuriyeti Cemaat palatasınıñ reisi Aleksandr Formançuk ve Qırım Cumhuriyeti nazirler şurası başlığı muavininiñ mesleatçısı Yuriy Didenko Müftiniñ diniy maarif yolunda büyük ğayretini qayd ettiler.
Tedbir çerçivesinde Tatarstandan teşrif etip kelgen şu qardaş cumhuriyetimizniñ müftisi Kamil hazrat Samigullin sözge çıqtı ve sözlerine Tatarstan Cumhuriyetiniñ Başlığı Rustam Minnihanovnıñ hayırlavını qoşıp seslendirdi. “Hacı Emirali Ablayev ne yerge barsa da, er vaqıt Qırım aqqında ayta, halqlarımıznı birleştirgen şeyler aqqında tarif ete”, – dep, qayd etti Kamil hazrat.
Film numayış etilgen soñ, Qırım cemaatçılığı adından qırımtatar yazıcısı Ablâziz Veliyev çıqışta bulundı. O, Qırım Müftisi ile ilk tanışuvı aqqında hatıralarınen paylaştı.
“Qırımtatarlarnıñ “İnkişaf” cemiyeti” bölge cemaat teşkilâtınıñ başlığı Eskender Bilâlov özüniñ selâmlav nutqunda Müftiniñ Vatan oğurında ayrı naaliyetlerini qayd etti.”Bugün biz Qırımda barışıqlıq içinde yaşağanımızda hacı Emirali efendiniñ issesi ğayet büyüktir. O, öz milletiniñ sadıq oğludır”, – dedi Eskender Bilâlov.
Qırım Cumhuriyetiniñ başlığı yanındaki Qırımtatarlar şurasınıñ azaları – Fevzi Yaqubov adına Qırım müendislik ve pedagogika universitetiniñ rektorı Çingiz Yaqubov ve V. İ. Vernadskiy adına QFU Filologiya institutınıñ qırımtatar filologiyası kafedrasınıñ professorı Lemara Selendili de minnetdarlıq ve hayırlav sözlerini ayttılar.
Yarımadamıznıñ din hadimleri adından Qırım Müftisiniñ muavini Raim Ğafarov çıqışta bulundı. O, hacı Emirali Ablayevğa bağışlanğan şiirini oqudı ve oña qurulayatqan Büyük Cuma caminiñ eskizini bağışladı.
“Müfti. Dua ile” filminiñ taqdim merasimine Moskvadan ve Dağıstan Cumhuriyetinden de ürmetli musafirler keldi: İslâm medeniyeti, ilimi ve tahsiline destek fondunıñ halqara meseleler boyunca mesleatçısı Magomed-Başir Albogaçiyev ve Dağıstan Cumhuriyeti Müftisiniñ yardımcısı Ahmad Nadırbegov.
Musafirler ögünde hacı Emirali Ablayev özü de çıqışta bulundı.”Unutmañız ki, ömür yolunda eñ müimi – adaletli olmaqtır.Bazıda biz adaletniñ üstüne merhamet ketiremiz, amma öyle olmamalı.Bazıda merhamet zarar ketire bile.Bunı aqılıñızda tutuñız”, – dep, nasiat etti Müfti efendi. O, film üzerinde çalışqan Qırım Cumhuriyeti ve Sevastopol şeeri musulmanları diniy idaresiniñ hadimlerine teşekkür bildirdi ve sanağa filmniñ baş prodüseri Zenife Ablayevanı, filmniñ müellifi Elvina Memetovanı ve rejissörı Viktor Lopatanı davet etti.
Filmniñ prezentatsiyası “Ateş” oyun ansambliniñ çıqışınen yekünlendi.
Qırım MDİ matbuat hızmeti