Багъчасарай районынынъ джамилеринде балаларгъа вакъытларыны файданен ве меракълы кечирмек ичюн бала язлыкъ лагерьлери кечириле. Бойле лагерьлерден бири Орта джамиде тамамланды. Лагерьнинъ10 куню девамында балалар бир чокъ мусбет теэссюрат, дуйгъу ве бильги къазандылар.
Къыз балалар ичюн ахлякънынъ ве Ислям адабынынъ муим тарафларыны анълаткъан программа тешкиль олунды. Олар буюклерге урьмет косьтермек, кичиклерге мерхамет этмек, бильгилернинъ ве намазнынъ эмиети ве Къураннынъ къыйметлери мевзуларыны огрендилер. Айры дикъкъат ортюнмеге, мусульман къадынынынъ шекилине, хаджылыкъ, Аллах ве Пейгъамберимиз (с.а.с.) огюнде вазифелерге айырылды. Иштиракчилер фаркълы оюнлар ойнадылар ве чешит мастер-класс дерслеринден кечип, шоколад ичинде хурма татлылыгъыны япмакъны, балчыкътан япылгъан чанакъларны бояп безетмекни ве ресим япмакъны огрендилер. Язлыкъ лагеринден хатыра оларакъ эр бир къыз балагъа Орта джамининъ эмблемасынен бирер футболка эдие этильди.
Огълан балалар да дикъкъатсыз къалмадылар. Олар Ислям акъаидинининъ темеллерини, мусульманларнынъ адабыны, бильги алмакънынъ муимлигини ве насыл этип бильги эльде этильмели мевзуларыны огрендилер. Дерслер эснаасында олар эр кунь бирер дуа эзберлеп, эм де этраф инсанларнен мунасебетлерде косьтериледжек адаб къаиделерини огрене эдилер.
Къочкъар Эли (Брянское) коюнде де балалар ичюн язлыкъ лагери кечирильди. Балалар дуа, мусульманларнынъ адабыны ве Пейгъамберимизнинъ сиерини огрене эдилер. Олар пейгъамберлер ве сахабелер акъкъында мультфильмлер бакътылар, чешит арекетли ве маса оюнларыны ойнадылар.
Бундан да гъайры, Мамашай (Орловка) коюнде де балалар ичюн джамиде эм диний маариф, эм де эглендже программасыны тешкиль этюв аньанесининъ девамы оларакъ, бир язлыкъ лагери даа отькерильди.
Сонъки бала лагери Багъчасарай шеэрининъ алтынджы микрорайонында, Ханчайыр джамисинде кечирильди. Анда да къыз ве огълан балалар ичюн меракълы окъув ве эгеледже программасы тешкиль олунды.
Бойле лагерьлер етишеяткъан несильнинъ диний ве медений тербиесинде муим ер тута ве балаларны Ислям къыйметлерине багълай.
Къырым МДИ матбуат хызмети