Къырым Джумхуриети ве Севатополь шеэри мусульманлары диний идаресининъ тешеббюси иле Багъчасарай районы, Албат (Куйбышево) къасабасынынъ ве Азек (Плодовое) коюнинъ орта мектеплеринде Бесланнынъ №1 мектебинде юзь берген дехшетли фаджианынъ хатырасына багъышлангъан тедбирлер олып кечти.
Талебелернен Къырым Муфтиси муавинининъ Багъчасарай районындаки умумтахсиль мектеплеринен ишбирлик боюнджа ярдымджысы Аслан Алиев корюшти. О, талебелернен маневий-ахлякъий къыйметлернинъ пекитильмеси, бири-бирине мерхаметликнинъ ве урьметнинъ шекилленмеси мевзусында сухбет кечирди. Айры дикъкъат экстремизмнинъ ве терроризмнинъ ясагъына ве харам олмасына, инсан омюрининъ къыйметли олмасына ве о дехшетли фаджианынъ къурбанлары акъкъында хатырлавнынъ муимлигине айырылды.
Талебелер тедбирнинъ мевзусына буюк дикъкъат косьтердилер ве куньделик аятта бири-бирине мерхаметлик этмекнинъ, дестек олмакънынъ не къадар муим олгъаныны музакере эттилер. Оджалар КъМДИ векилине мундериджели ве муим сухбетлери ичюн тешеккюр бильдирип, яш несиль ичюн оларнынъ маневий-ахлякъий джеэттен муим олгъаныны къайд эттилер.
Къырым МДИ матбуат хызмети