Багъчасарайда «Халкъ медресеси» онлайн-курсны екюнлеген талебелерге сертификатлар такъдим этильди. Курсларда онлайн шекильде Ислям темеллери огрениле.
Къырым Муфтиси хаджы Эмирали Аблаев адындан Муфти муавини Артур Решитов мезунларны хайырлады. О, оджаларгъа ве талебелерге япкъан эмеклери ве Аллахнынъ разылыгъыны къазанмакъ ёлунда косьтерген ынтылувлары ичюн тешеккюр бильдирди.
Курс Къырым Муфтилиги тарафындан тешкиль этилип, эки йыл девамында онлайн шекильде отькерильди. Дерслер къадынлар ве эркеклер ичюн айры ве фаркълы оджалар тарафындан кечирильди. Талебелер имтианларны мувафакъиетнен тапшыргъан сонъ, сертификатларны эльде эттилер.
Халкъ медресеси – Къырымда ильк кере мувафакъиетли шекильде тешкиль этильген Ислям темеллери боюнджа онлайн окъувдыр. Семинарлар эр афта кечириле эди, бундан да гъайры, талебелерге аудиошекильде дерслер ве китаплар такъдим этильди. Ислям темеллеринен бир арада Къуран окъувы ве теджвид боюнджа дерслер кечирильди. Бу, имамларны ве дин оджаларыны азырламакъ ичюн бир темельдир.
Талебелер невбеттеки программа боюнджа окъудылар:
Акъыде – 2 ай (8 дерс),
Фыкъых – 9 ай (36 дерс),
Сиер – 3 ай (12 дерс),
Урф – 2 ай (8 дерс),
Хадис – 2 ай (8 дерс),
Тефсир – 2 ай (8 дерс),
Фыкъых усулы – 2,5 ай (10 дерс),
Мезеплернинъ пейда олувы ве даркъалувы – 1,5 ай (6 дерс),
Къуран – 24 ай (эсас дерслернен бир арада).
Умумен, окъув 24 ай девам этти.
Дерс-семинарлар онлайн шекильде афтада 1 кере кечирильди, учь айда бир кере исе, дерслер джанлы шекильде кечирильди.
Бугунь исе, «Халкъ медресеси» Ислям темеллери курсунынъ янъы группасына талебелер давет этиле. Тафсилятлыджа малюмат невбеттеки багъланты боюнджа: https://t.me/+K9V00Xz2C_QzZDAy
Къырым МДИ матбуат хызмети