Qırım Müftiligi Halqara saqatlar kününe bağışlanğan hayriye aktsiyasında iştirak etti. Aktsiya, Aqmescit İçtimaiy-reabilitatsion merkeziniñ beden ve ruhiy sağlıqları zayıf olğan balalar ve ösmürler bölüginde olıp keçti. “Yahşı keyf künü” tedbiri çerçivesinde balalarğa ediyeler – yımşaq oyuncaqlar ve tatlılar berildi. Qırım ve Sevastopol şeeri müsulmanları Diniy idaresi adından balalarnı QMDİ diniy tedbirlerniñ teşkil etüv bölüginiñ reberi Zenife Ablayeva hayırladı.
Zenife Ablayeva: “Qırım müsulmanları Diniy idaresi balalarnı iç bir vaqıt unutmay, olarğa güzel duyğular is ettirmek içün er bir imkândan faydalanamız. Sizge sağlıq tileymiz. Biliñiz ki, biz sizni pek sevemiz”, – dep ayttı.
Tedbir çerçivesinde balalar “Sıçrağan şahzade” qoqla spektaklini seyir etti. Küçük seyirciler büyük eyecan ile masalnıñ qaramanları ile birlikte eyecanlanıp, olarnıñ ğalebelerine quvandılar. Numayıştan soñ, er bir balağa yımşaq oyuncaq ve tatlı bahşışlar berildi.
Aqmescit İçtimaiy-reabilitatsion merkeziniñ beden ve ruhiy sağlıqları zayıf olğan balalar ve ösmürler bölüginiñ reberi İnna Sviridovanıñ sözlerine köre, er ay bölükni 30, yılda ise 70 bala ziyaret ete. Balalarnen ruhiyatçı, logoped, LFK instruktorları çalışa. Medeniy tedbirler teşkilâtçısı farqlı bayramlarnı keçire, balalar ile murabiye yardımcısı ve balalarğa er angi bir yardım köstergen mahsus hadim meşğul ola. Patronaj hızmetiniñ lâğu etilmesi sebebinden bölük iştirakçileriniñ özleri, imkânlarına köre, vucut areketleri sıñırlı olğan balarnı ziyaret eteler.
İnna Sviridova: “Bizim vazifemiz – balalarğa er kün lâzim olğan areketlerni ögretmek, olar ileride de öz-özlerini baqabilsin. Bundan da ğayrı, bizde icat ustahanesi bar, mında balalar içün master-klass, meraqlı dersler keçirile. Bizim içün eñ müimi – balalarnıñ yüzünde tebessümni ve közlerindeki quvançnı körmektir”, – dep qayd etti.
Balalar ve olarnıñ tuvğanları “Yahşı keyf künü” bayramınıñ musafirlerine bahşışlar ve, eñ esası, diqqat içün, büyük teşekkürler bildirdi.
Aktsiya teşkilâtçısı Müfti yardımcısı Raim Ğafarovnıñ sözlerine köre, balalarğa bayramnıñ teşkil etilüvi teşebbüsine bir çoq vetandaşlarımız, iş adamları qol tuttı.
Raim Ğafarov: “Merhametlik bir insandan digerine, hayır işler ve yaqınnı quvandırmaq isteginen keçmekte. İslâmda balanı quvandırmaq – büyük sevaptır. İştirak etken er keske büyük teşekkürler bildirem. Qısqa müddet devamında 30-dan ziyade tatlılar paketini ve güzel oyuncaqlarnı azırladıq. Allah hayır işlerni sevaplarğa yazdırsın!”, – dep ayttı.
QMDİ matbuat hızmeti
