Aqyar (Sevastopol) şeerinde “Birlikte quvet” şiarı ile Qırımtatarlarnıñ III forumı olıp keçti. Keçken forumlar kibi, şu tedbir de Aqyardaki qırımtatar cemaatçılığı içün müim meselelerniñ muzakeresine bir meydan teşkil etti. Şu cümleden, halqnıñ medeniy ve maneviy mirası ile tarihınıñ saqlanıluvı muzakere etildi. Maneviy ve diniy temellerniñ saqlanıluvı ve pekitilmesiniñ müimligi aqqında Qırım Cumhuriyeti ve Sevastopol şeeri musulmanları diniy idaresiniñ Aqyardaki temsilcisi, “Miloserdiye” (“Merhametlik”) yerli cemiyetiniñ rehberi Abdulamit İzmailov tarif etti. Yaşlarnen çalışuv, ekstremizm ve terrorizmge qarşı profilaktika aqqında “Sotsium” (“Cemiyet”) leyhasınıñ rehberi Eskender Asanov ve Aqyardaki Antiterroristik komitetiniñ başlığı Andrey Köpılov tarif ettiler.
Forumda cemaat teşkilâtlarınıñ vekilleri, ilim ve tahsil yurtlarınıñ, müzeylerniñ hadimleri, qırımtatar cemaatçılığınıñ vekilleri, Aqyardaki milliy medeniy cemiyetler birliginiñ başlığı Yevgeniy Bakkal, Aqyar şeerindeki milliy medeniy merkezniñ başlığı Ölga Malinovskaya ve Aqyar qırımçaqlarınıñ “Krımçahlar” milliy medeniy cemiyetiniñ azası Galina Levi iştirak ettiler.
Hatırlatamız, Aqyarda üç bölge qırımtatar cemaat teşkilâtı çalışa: “Sevastopol bölgesindeki “Aq-Yar” qırımtatarlar birleşmesi” (başlığı – Enver Mamutdinov), “Aqyar qırımtatar medeniyeti bölge merkezi” (başlığı – Diana Asanova), professor S. O. İzidinov adına Aqyar qırımtatar medeniyetini tiklev fondu (rehberi – Venera Qurmayeva). Şu teşkilâtlarnıñ er biri tahsil, medeniy ve tarihiy leyhalarını ömürge keçirip, qırımtatar medeniyeti, tili, urf-adetiniñ saqlanıluvı ve ilerilemesine öz issesini qoşa. Şu faaliyetniñ esas maqsadı – toplanğan birikimni yaş nesilge yetkizmektir.
Qırım MDİ matbuat hızmeti