Qırımnıñ paytahtında, Devlet akademik muzıkalı teatrinde “Biz Ğalebeniñ mirasçılarımız” yarışınıñ gala-kontserti olıp keçti. Bala yarışı 1941-1945 senelerinde olıp keçken Ulu Vatan cenkinde qazanılğan Ğalebege bağışlandı. Yarışta Qırımnıñ farqlı köşelerinden mektep talebeleri iştirak etti. Yarış jürisi 500 ziyade icadiy işni baqıp çıqtı, finalğa 15 iş keçken edi.
Finalistlerni Qırım Başlığı Sergey Aksönov ve Qırım Cumhuriyeti Devlet Şurasınıñ Reisi Vladimir Konstantinov selâmladılar.
Qırım Müftisi hacı Emirali Ablayev adından ğaliplerni Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) diniy tedbirlerni teşkil etüv bölüginiñ rehberi Zenife Ablayeva selâmladı. O, yarış teşkilâtçılarına, “Rus birligi” bölgelerara cemaat teşkilâtınıñ nezaret şurasınıñ başlığı, “Biz Ğalebeniñ mirasçılarımız” icadiy yarışnıñ teşkiliy komitetiniñ reisi Yelena Aksönovağa böyle büyük ve Qırım içün emiyetli vatanperverlik yarışını teşkil etkeni içün teşekkür bildirdi.
“Er bir çıqış istidatlı genç nesil içün ğurur duyğusını uyandırdı. Er bir çıqıştan tüklerim tim-tik oldı, iç bir çıqış lâqayd qaldırmadı. Yelena Aleksandrovna, balalarğa istidatlarını köstermege imkân bergeniñiz içün, olarda vatanperverlik duyğusını terbiyelegeniñiz içün, epimizge güzel duyğular bağışlağanıñız içün çoq sağ oluñız”, – dedi Zenife Ablayeva.
Qırım Cumhuriyeti ve Sevastopol şeeri musulmanları diniy idaresi adından bahşış olaraq noutbuknı Aqyarnıñ “N. A. Ostrâkov adına №22 mektep”-niñ talebeleri aldı. Olarnıñ çıqışı “Belousov Dmitriy Vladislavoviçke bağışlana” degen serlevhanen namayış etildi.
İcadiy yarışnıñ finalında vokal-muzıkalı, horeografik ve edebiy-temaşa namayışlar eda etildi. “Biz Ğalebeniñ mirasçılarımız” bölgelerara icadiy yarış Qırım başlığı Sergey Aksönovnıñ imayesinde 9-ıncı kere keçirile.
Qırım MDİ matbuat hızmeti