Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) din erbapları Muhammed Peyğamberimizniñ (s.a.s.) doğğanı Mevlid gecesi munasebetinen dua oqudılar. Qırım Müftiligi qadın-qızlar bölüginiñ din ocaları hanımlar ve balalar içün dersler ve seminarlar keçirdiler.
Dünyanıñ er bir yerinde yaşağan musulmanlar er sene Muhammed Peyğamberimizniñ (s.a.s.) doğğanı Mevlid gecesini qayd eteler. İslâm dininde şu geceniñ emiyeti büyüktir. Mevlid, em de belli ananelerge saip tantanalı ve müim bir merasimdir.
2022 senesi Mevlüd gecesi oktâbr 7-8 künleri arasına rast kelgen musulman hicriy taqvimi boyunca Rebiu’l-evvel ayınıñ 12 gecesine tüşe. Adet üzre bu gece, Mevlid gecesi olğan aftada ve, umuman, Rebiu’l-evvel ayında halqımızda Peyğamberimizge bağışlanğan merasimler, suhbetler yapıla ve Mevlid-şerif adındaki qadimiy şiiriy eseri oqula.
QMDİ matbuat hızmeti