Canköy şeeriniñ camisinde imamlar toplaşuvı olıp keçti. Toplaşuv başlamadan evel diniy hadimler Canköy rayonınıñ Ermeni Barın (Mnogovodnoye) köyü din cemiyetiniñ vefat etken reisi Remzi Azizovnı dua ile añdılar. Bundan soñ, toplanğanlar ögünde Canköy rayon memuriyeti başlığınıñ muavini Sergey Kovarj ve cemaat nizamını qoruv boyunca inspektor Rostislav Derkaç çıqışta bulundılar.
Canköy bölgesiniñ baş imamı Eldar Acibekirov Qırım Cumhuriyeti ve Sevastopol şeeri Müftisi hacı Emirali Ablayev adından Toğanaş (Solönoye özero), As Caraqçı (Rısakovo) ve Acı Ahmat (Tabaçnoye) köyleriniñ din erbaplarına Quran-ı Kerim nushalarını ve tercimesini taqdim etti. Bundan da ğayrı, Qırım musulmanlarınıñ yetekçisi hacı Emirali Ablayev adından Acı Ahmat köyünde qurulğan cami içün maddiy destek teslim etildi.
Qırım MDİ matbuat hızmeti