Хаберлер
Кебир Джамиде хаджылыкъкъа бараджакълар ичюн эр йыллыкъ семинар олып кечти
Опубликовано:
Акъмесджитте, Кебир Джамиде 2026 сенеси хаджылыкъкъа бараджакъ мусульманлар ичюн эр йыл кечирильген семинар олып кечти. Семинарнынъ тантаналы къысымында Къырым Муфтисининъ муавини, Къырым мусульманлары диний идаресининъ тышкъы мунасебетлер ве хаджылыкъны тешкиль этюв болюгининъ рехбери Артур Решитов чыкъышта булунып, хаджылыкъ ёлджуларына огъурлы ёллар тиледи. О, Къырым Муфтиси хаджы Эмирали Аблаев адындан мусульманларгъа хаджылыкъкъа бармакъ ярдым эткен бутюн муэссиселерге ве идарелерге тешеккюр бильдирди, ве хаджылыкъкъа чыкъаджакъ мусульманларнынъ эйилиги ичюн дуа япты. Семинарда хаджылыкъ ёлджуларына ачыкъ ёллар тилеп, фаркълы муэссиселернинъ ве идарелернинъ векиллери чыкъышта булундылар: Акъмесджит шеэринде Русие Тыш ишлер назирлигининъ темсильджиси Артём Березовский, Къырым Джумхуриети Миллетлерара мунасебетлер боюнджа девлет комитетининъ миллетлерара мунасебетлер ве мигрантларнынъ ичтимаий-медений адаптациясы идаресининъ рехбери Длявер Османов, Къырым Джумхуриети ве Севастополь шеэринде Роспотребнадзорнынъ векили Сергей Цыганов. Семинар черчивесинде, аньаневий оларакъ, Диний идаремизнинъ дин оджалары чыкъышта булундылар. Олар келеджек хаджыларгъа талимат бердилер, хаджнынъ деврелерини ве ибадетлерини анълаттылар, оларнынъ маналары ве эмиети акъкъында тариф эттилер. Хаджылыкъ такъымларынынъ рехберлери амелий тевсиелер бердилер ве хаджны гузельдже эда этмек ве ватангъа къайтмакъ ичюн насыл этип, хаджылыкъ ёлджулыгъына азырланмакъ, хадж эснасында озюни алып бармакъ кереклигини анълаттылар. Хаджылыкъкъа кетеджек мусульманлар учь этапнен ёлгъа чыкъаджакълар – майыс 08, 14 ве 18 куньлери. Хаджылыкъ боюнджа семинар эр йыл диний идаремизнинъ хадж операторы «АВН ТУР» иле бирликте тешкиль этиле. Онынъ макъсады – хаджы оладжакъ мусульманларны Ислямнынъ беш темелинден бири олгъан хаджылыкъкъа эм маневий, эм де тешкилий джеэттен азырламакътыр. Къырым МДИ матбуат хызмети
№2 тахкъикъат изоляторында динлерара иш группасы
Опубликовано:
Акъмесджит шеэрининъ № 2 тахкъикъат изоляторында Къырым Джумхуриети ве Севастополь шеэри Муфтисининъ муавини Мухаммед Исламовнынъ иштиракинен динлерара иш группасынынъ топлашувы олып кечти. Тедбирде №2 тахкъикъат изоляторы мемуриетининъ векиллери ве шу муэссисе башлыгъынынъ инангъанлар иле чалышув боюнджа ярыдмджысы, иерей Максим Лютич иштирак эттилер. Топлашув эснасында иштиракчилер майыс айына иш планыны бельгиледилер. Айры дикъкъат майыс 9-да оладжакъ Улу Гъалебе кунюнинъ къайд этилювине азырлыкъ меселесине айырылды. Фаркълы динлернинъ векиллери Улу Ватан дженкиндеки гъалебеге фаркълы дин бирлешмелерининъ иссесини музакере эттилер. Тедбирнинъ ресмий къысымы екюнленген сонъ, Къырым Муфтисининъ муавини Мухаммед Исламов тахкъикъат изоляторында булунгъан инангъанларнен шахсий сухбетлер кечирди. О, оларнынъ диний дестекленмесинен ве акъларынынъ ерине кетирильмесинен алякъалы аризаларыны ве шахсий меселелерини бакъып чыкъты. Къырым МДИ матбуат хызмети
Акъмесджитте «Мерхаметлик лялеси» акциясынынъ хайрие концерти олып кечти
Опубликовано:
Акъмесджитте «Мерхаметлик лялеси» бутюнкъырым акциясыны екюнлеген буюк хайрие концерти олып кечти. Бу сене акция озюнинъ бешйыллыкъ юбилейини къайд этип, Къырымнынъ лякъайд къалмагъан сакинлерини бирлештире. Тедбир Къырымтатар девлет академик музыкалы драма театринде олып кечти. Мусафирлер ве иштиракчилер ичюн артистлер, иджадий такъымлар, оюн ве йыр ансамбллери чыкъышта булунып, сейирджилерге текрарланмаз программаны багъышладылар. Театрнынъ фойесинде умумтахсиль муэссиселерининъ талебелери тарафындан япылгъан лялелер ве дигер эль япмалары такъдим этильген хайрие ярмалыгъы кечирильди. Эр бир иштиракчи мерхаметлик акциясына къол тутып, онынъ тимсали олгъан лялени сатын ала бильди. Концерт бир къач ай девамында тахсиль муэссиселерининъ, джемаат тешкилятларынынъ ве первасыз къалмагъан инсанларнынъ иштирак эткенлери буюк бир акциянынъ екюни олды. Тантаналы къысымда Къырым Джумхуриети ве Севастополь шеэри Муфтиси хаджы Эмирали Аблаев мусафирлерни селямлады ве акциянынъ кечирилювине дестек косьтерген Къырым Джумхуриетининъ Тахсиль назирлиги, Медениет назирлиги, Ички сиясет, малюмат ве багъ назирлиги векиллерине тешеккюрнамелер такъдим этти. Къырым Джумхуриети Назирлер шурасынынъ реиси адындан мусафирлерге Ольга Шевцова мураджаат этти, о, хайрие тешеббюслерининъ ве джемиет бирлигининъ муимлигине ургъу япты. Къырым Джумхуриетининъ Тахсиль назирлиги акциянынъ кураторы Зенифе Аблаевагъа ве акциянынъ кечирилювинде фааль иштирак эткен умумтахсиль муэссиселерине тешеккюнамелер такъдим этти. Къырым Джумхуриети медениет назирининъ муавини Ольга Бурова медениет назири Татьяна Манежина адындан селямлав сёзлерини айтып, концерт программасыны яраштыргъан иджадий такъымларгъа тешеккюрнамелер такъдим этти. Акциянынъ кураторы, Муфтилигимизнинъ диний тедбирлерни тешкиль этюв болюгининъ рехбери Зенифе Аблаева Акъмесджит шеэр мемуриети башлыгъынынъ муавини Ислям Усеиновгъа, Къырым Джумхуриети Яшлыкъ сиясети девлет комитети реисининъ муавини Ани Григорян ве Февзи Якъубов адына КЪМДУ ректоры Чингиз Якъубовгъа акциягъа фааль къол туткъанлары ичюн тешеккюрнамелер такъдим этти. «Беш йыл эвельси биз акциямызны бир къач адамны бирлештирген гъае иле кичик бир адымнен башладыкъ. Бугунь исе, «Мерхаметлик лялеси» – бинълердже Къырым сакини иштирак эткен кутьлевий бир арекеттир. Озь эллеримизнен япкъан эр бир лялемиз – бир эйилик олып, ярдымгъа энъ чокъ мухтадж олгъанлар ичюн реаль ярдымдыр. Бу йыллар девамында бизнен олгъан инсанларгъа тешеккюримни бильдирем. Инанам ки, илериде бизни даа чокъ хайырлы ишлер беклей», – деп екюн чекти Зенифе Аблаева. Хатырлатамыз, эм умумий акция черчивесинде, эм де концерт себебинен топлангъан бутюн паралар агъыр хаста балаларнынъ тедавийленюви ве махсус арбий операция иштиракчилерининъ къоранталарына ёлланыладжакъ. Тешкилятчылары акцияда иштирак эткен ве мерхаметлик ишине иссесини къошкъан эр кеске терен тешеккюрини бильдирелер. Къырым МДИ матбуат хызмети
«Мерхаметлик лялеси» хайрие ярмалыгъы Февзи Якъубов адына КЪМПУ студентлерини бирлештирди
Опубликовано:
Февзи Якъубов адына Къырым муэндислик ве педагогика университетининде «Мерхаметлик лялеси» хайрие акциясы олып кечти. Тедбир Къырым Джумхуриети ве Севастополь шеэри мусульманлары диний идаресининъ дестеги иле Къырым мусульманлары хайрие фонду тарафындан даимий «Мерхаметлик лялеси» акциясы черчивесинде тешкиль этильди. Муфтилигимизнинъ диний тедбирлерни тешкиль этюв болюгининъ рехбери, Къырым Джумхуриети Башлыгъынынъ меслеатчысы Зенифе Аблаева бу сене акциянынъ беш йыллыкъ юбилейини къайд эткенине дикъкъат чекти. Бу вакъыт эснасында о, кичик гонъюллилер такъымынынъ тешеббюсинден джемаат эрбаплары, тахсиль муэссиселери ве меценатлар тарафындан дестекленген кутьлевий бир арекетке чевирильди. Акция иштиракчилерини Февзи Якъубов адына КЪМПУ-нинъ ичтимаий ве тербиевий иш боюнджа проректоры Нияз Фазылов селямлады. О, хайрие тешеббюслеринде студентлер ролюнинъ эмиетини ве яшларнынъ ичтимаиет нокъта-и назарындан муим лейхаларда иштирак этювлерининъ артмасыны къайд этти. Къырым Муфтисининъ муавини Ремзи Къуртдеде акциянынъ бирлештирюв ролюни къайд этип, онынъ инсанларны яшларына, миллетлерине ве динлерине бакъмадан, бир макъсатта бирлештиргенини ургъулады. Ярмалыкъта Февзи Якъубов адына КЪМПУ-нинъ бутюн филиалларындаки талебелери тарафындан япылгъан эльяпмалары такъдим этильди. Истеген эр кес мерхаметини косьтерип, мухтаджларгъа ярдым ишине озь иссесини къошмагъа чаре булды. Тешкилятчылар ярмалыкънынъ бутюн иштиракчилерине ве мусафирлерине первасыз къалмагъанлары ве фааль ватандашлыкъ мевамларыны косьтергенлери ичюн тешеккюр бильдирелер. Къырым МДИ матбуат хызмети
«Буюк къадын-къыз шурасы. Къырым танълары» форумнынъ векиллери Буюк Джума джамини зиярет эттилер
Опубликовано:
«Буюк къадын-къыз шурасы. Къырым танълары» больгелерара форумы черчивесинде «Русие къадынлары иттифакъы» умумрусие джемаат девлет тешкиляты векиллерининъ Къырым Муфтиси хаджы Эмирали Аблаевнен иш корюшювлери олып кечти. Мусафирлер Буюк Джума джами иле Къырым Джумхуриети ве Севастополь шеэри мусульманлары диний идаресини зиярет эттилер. Эйетке Русие къадынлары иттифакъынынъ президенти Екатерина Лахова ёлбашчылыкъ этти. Бунъа иляве оларакъ, эйетнинъ теркибине Русие къадынлары иттифакъы региональ болюгининъ рехбери Нонна Бахарева, Президент грантлары фонду баш мудирининъ меслеатчысы Владимир Татаринов ве Русие къадынлары иттифакъы региональ болюгининъ миллетлерара ве динлерара барышыкълыкъ ёнелишининъ кураторы Зенифе Аблаева кирдилер. Корюшюв эснасында тарафлар миллетлерара ве динлерара барышыкълыкънынъ пекитильмеси, аньаневий къоранта къыйметлерининъ сакъланылувында ве аиле муэссисесине дестек этильмесинде къадын-къыз джемаат тешкилятларынынъ ролю иле алякъалы меселелерни музакере эттилер. Мусафирлер Джума джамининъ мимариетинен интерьери иле Къырым Джумхуриети ве Севастополь шеэри мусульманлары диний идаресининъ фаалиетинен таныш олдылар. Къырым МДИ матбуат хызмети
Бугунь Алуштада «Буюк къадын-къыз шурасы. Къырым танълары» Русие къадынлары иттифакъынынъ форумы екюнленди
Опубликовано:
Алуштада Русие къадынлары иттифакъынынъ «Буюк къадын-къыз шурасы. Къырым танълары» деген буюк форумы олып кечти. Онынъ баш мевзусы – къоранталаргъа, къадынларгъа ве балаларгъа къол тутмакъ саасында девлет сиясетини омюрге кечирмек меселеси олды. Тедбирде акимиет векиллери, федераль ве региональ экспертлер, бундан да гъайры, бутюн улькеден кельген джемаат бирлешмелерининъ етекчилери топландылар. Форумнынъ эсас акценти къадынлар шураларынынъ, профиль идарелерининъ ве джемаатчылыкънынъ къоранта муэссисесини пекитмек, аналарны ве балаларны дестеклемек, къадынларнынъ иш ве ичтимаий тешеббюслерине къол тутып, инкишаф эттирмек мевзусында бирлешмесинде япылды. Форумнынъ программасы дёрт тематик болюктен ибарет олды: «Къорантагъа дестек», «Аналыкънынъ ве балалыкънынъ къорчаланувы», «Ичтимаий лейхаджылыкъ, кяр макъсатлы олмагъан тешкилятларнынъ инкишаф эттирилюви» ве «Къадын иш тешеббюслерине дестек». Иштиракчилер актуаль дестек тедбирлерини музакере эттилер, энъ гузель больге теджрибелеринен пайлаштылар ве илеридеки ишнинъ векторларыны бельгиледилер. Къырым Джумхуриети ве Севатополь шеэри мусульманлары диний идаресининъ диний тедбирлерни тешкиль этюв болюгининъ рехбери Зенифе Аблаева «Къорантагъа дестек» болюгинде иштирак этти. Форумнынъ медений программасында черчивесинде уникаль экспозициялар такъдим этильди. Мусафирлер миллий орьнеклер иле ишленген Къырым курк фабрикасынынъ курклю махсулларына ве, эм де, муэллифи Зенифе Аблаева олгъан «Алем-и нисван» миллий къадын урбалары коллекциясына къыймет кестилер. Коллекциянынъ иджаткяры ишбу урбаларнынъ тасарланмасы артында олгъан ильхамы акъкъында тариф этти: «Къадынлар дюньясы» коллекциясында такъдим этильген миллий къыяфетлер дикъкъат меркезинде олмакътан чекинмеген къадынлар ичюн иджат этильди. Бу къыяфетлер вастасынен къадын земаневий дюньяда озюни такъдим этип, къадынлыгъыны гузель косьтермеси ве миллий колорит иле озюнинъ уникаль медениетини телькъин этмеси мумкюн», – деди Зенифе Аблаева. Тедбирнинъ кульминациясы оларакъ, Къырым Джумхуриети Девлет Шурасында Русие къадынлары иттифакъынынъ президенти Екатерина Лахова иштиракинен тёгерек масанынъ кечирильмеси олды. Шу топлашув эснасында тематик сессияларда олып кечкен музакерелернинъ нетиджелери чыкъарылды. Къырым МДИ матбуат хызмети
Къырым мусульманлары диний идареси арбийлерге гуманитар ярдым ёллады
Опубликовано:
Къырым Джумхуриети ве Севастополь шеэри мусульманлары диний идаресининъ векиллери арбийлер ичюн гуманитар ярдымнынъ невбеттеки партиясыны тапшырдылар. Ярдым Къырым Муфтиси хаджы Эмирали Аблаевнен шахсий корюшюв эснасында теслим этильди. Гуманитар ярдым оларакъ элял стандартларына уйгъун эрзакъ ве керекли левазимат: тушёнка, конфетлер ве блиндажларны къавийлештирмек ичюн чуваллар ёлланылды. Бунъа иляве оларакъ, бир мотоцикл теслим этильди, о, тез арекет ве якъын дислокацияларгъа юкни аджеле шекильде алып кетмек ичюн къулланыла биле. Ярдым «Имкянлар такъымы» тешкилятынынъ тесисчиси Евгений Пичугин ве бир батальон штабынынъ рехбери, РФ арбий къуветлерининъ капитаны Илья Подороганынъ дестегинен ёлланылды. Ишбу акция диний идаремизнинъ арбийлерни дестеклев ичюн алып баргъаны гуманитар тешеббюслер сырасыны девам эттире. Къырым МДИ матбуат хызмети
Акъмесджит тюзетюв меркезинде динлерара иш группасы
Опубликовано:
Къырым Муфтисининъ муавини Мухаммед Исламов Джезаларны иджра этюв федераль хызмети идареси (УФСИН) башлыгъынынъ инангъанлар иле чалышув боюнджа ярдымджысы, протоиерей Роман Цурканнен бирликте Акъмесджиттеки тюзетюв меркезлерининъ бирисини зиярет этти. Корюшюв эснасында олар джеза чеккен фаркълы дин векиллеринен корюшти. Диалог ачыкъ ве семерели олды. Дин эрбаплары маневий къыйметлер сакъланувынынъ, ахкълякъий ориентирлернинъ ве инсаннынъ омюринде диний байрамларнынъ эмиетини анълаттылар. Айры дикъкъат исе, Русиеде Халкълар бирлиги йылынынъ илян этилювине айырылды, фаркълы дин ве миллет векиллери арасында достане ве сайгъы эсаслы мунасебетлернинъ муимлигине, мусамахагъа ургъу япылды. Зиярет черчивесинде Динлерара иш группасынынъ топлашувы олып кечти. Топлашув иштиракчилери майыстаки байрамлар иле Гъалебе кунюнен алякъалы планларыны музакере эттилер. Къырым МДИ матбуат хызмети
Къалай медресесинде мезунларнынъ профессиональ перспективалары музакере этильди
Опубликовано:
Имам Матуридий адына Къалай ислямий илимлер медресесининъ къыз болюгинде талебелернинъ келеджегинен багълы муим бир корюшюв олып кечти. Тедбирде Къырым Джумхуриети ве Севастополь шеэри мусульманлары диний идаресининъ векиллери – Муфтилигимизнинъ диний тедбирлерни тешкиль этюв болюгининъ рехбери Зенифе Аблаева ве Тахсиль болюгининъ рехбери Гульчер Зекерьяева, бундан да гъайры, В.И. Вернадский адына Кырым федераль университетининъ филология институтындаки къырымтатар тили филологиясы кафедрасынынъ рехбери Эдие Меметова иштирак эттилер. Корюшювнинъ эсас макъсады – медресе мезунларына келеджекте зенаат сайламакъ мевзусында ярдым этмектир. Иштиракчилер алгъан бильгилерининъ келеджекте къулланылувы меселесинде бир сыра имкянларны музакере этти – диний маарифтен ве оджалыкъ фаалиетинден башлап, ильмий-тедкъикъат ишлерине ве тувгъан тиль иле медениетнинъ теренден огренилювине къадар. Зияретлери черчивесинде Муфтиликнинъ мутехассыслары медресенинъ китапханесине къыйметли китапларны – улу алим ве маарифчи Усеин Боданинскийнинъ эсерлер джыйынтыгъыны ве «Къырымнынъ тарих козетмелери» ильмий неширининъ джылтларыны такъдим эттилер. Бу китаплар тахсиль джереяны ве къызларнынъ тедкъикъатлары ичюн муим бир ресурс олып, аньаневий диний бильгилер иле земаневий академик илим арасында багъларны пекитир. Къырым МДИ матбуат хызмети
Акъмесджитте динлерара иш группасы кечирильди
Опубликовано:
Акъмесджит районынынъ джинаий-иджра инспекциясында динлерара группасы векиллерининъ иш корюшюви олып кечти. Тедбир Ораза байрамындан сонъ ве православ Пасха арефесинде кечирильди. Топлашувда Къырым Муфтисининъ муавини Мухаммед Исламов ве ярымадамыздаки дигер динлернинъ векиллери иштирак эттилер. Такъым иштиракчилери апрель ве майыс айларына умумий ишлерининъ планларыны музакере этип, тасдикъ эттилер. Топлашувнынъ энъ эсас къысымы исе, – шартлы оларакъ махкюм этильгенлер ичюн хусусий лекциялар курсу олды. Диний хадимлер топлангъанларгъа диний байрамлар – Ораза байрамы ве Пасханынъ эмиетлери акъкъында тариф эттилер. Эр эки байрамны да мерхаметлик, багъышлав, арынув ве аятны тазертмек умюти гъаелери бирлештире. «Бойле корюшювлер гъает муим. Олар аятларында агъыр вазиетте къалгъан инсанларгъа эзелий къыйметлер, догъру ёлны сайламакънынъ ве джемиет тарафындан дестекнинъ муимлиги акъкъында хатырлата», – деп, къайд этти Мухаммед Исламов. Къырым МДИ матбуат хызмети
Къырым Муфтилигинде къадын-къыз оджаларнынъ топлашувы олып кечти
Опубликовано:
Къырым Джумхуриети ве Севастополь шеэри мусульманлары диний идаресинде къадын-къыз дин оджаларынынъ эр айлыкъ иш топлашувы олып кечти. Тедбирни Муфтилигимизнинъ диний тедбирлернинъ тешкиль этюв болюгининъ рехбери Зенифе Аблаева кечирди. Бундан да гъайры, топлангъанлар огюнде Къырым Джумхуриети Тахсиль, илим ве яшлар назирлигининъ балаларнынъ тербиеси, раатланувы ве сагълыкъларыны сакълав ишлерининъ тешкиль этилюви болюгининъ рехбери Геннадий Швейдель чыкъышта булунды. Озь сёзюнде о, мектеп талебелери ичюн диний маарифнинъ муимлигини къайд этип, эм диний илимлерни, эм де дюньявий фенлерни огреткен оджаларнынъ буюк ве агъыр эмегининъ муимлигине ургъу япты. Тахсиль назирлигининъ векили къайд этти ки, диннинъ огренилюви ве фаркълы динлер мабедлерининъ зиярет этилюви джемиетте достане, семерели ве къомшусевер мунасебетлерни къавийлештирмеге ярдым эте. Топлашув эснасында оджалар «Мерхаметлик лялеси» эсабат концерт тедбирине азырлыкъны музакере эттилер. Зенифе Аблаева оджаларгъа бу хайрие акциясынынъ омюрге кечирилюви меселесинде актив фаалиетлери ве хайыр ишине салмакълы исселерини къошкъанлары ичюн тешеккюр бильдирди. Оджалар исе, озь невбетинде, мерхаметлик дерслеринде балаларнен чалышкъанларынынъ мусбет нетиджелеринен пайлашып, осип келеяткъан яш несильде шефкъатны, дуйгъударлыкъны ве инсанларгъа ярдым этмек азырлыгъыны ашылав боюнджа конкрет мисаллерни анълаттылар. Къырым МДИ матбуат хызмети
Ялтада уникаль «Шаркъ музейининъ мирасы» сергиси ачылды
Опубликовано:
Ялта тарихий-эдебий музейинде «Шаркъ музейининъ мирасы» сергисининъ тантаналы ачылувы олып кечти. Сергининъ ачылувы музейнинъ 105 йыллыгъына багъышланды. Тарихнынъ сакъланылувыны омюрлерининъ иши ве озьлерининъ профессиональ борджу оларакъ бильген инсанлар топланды. Мерасимде Къырым Муфтисининъ муавини Раим Гъафаров, Къырым Джумхуриети Миллетлерара мунасебетлер боюнджа девлет комитети реисининъ муавини Айкуи Арутюнян, Ялта шеэр шурасынынъ реиси Константин Шимановский, медениет, илим ве дин саасынынъ векиллери иштирак эттилер. Музейнинъ юбилейине багъышлангъан экспозицияда онынъ фондундан 160 асыл экспонат нумайыш этильди. Мусафирлер агъачтан, чиниден ве филь тишинден ясалгъан эшьялар оларакъ такъдим этильген Иран, Япония ве Чин индже санатларынен таныш ола билелер. Айрыджа, сергиде къырымтатар миллий урбалары ве турмуш аятта къулланылгъан эшьялар нумайыш этиле. Сергининъ энъ буюк гъуруры – эльязма китаплар коллекциясыдыр. Музейнинъ фондларында 200 якъын эльязма китабы бар ве шу уникаль язы абиделери артыкъ сейирджилернинъ дикъкъатына да такъдим этильди. «Шаркъ музейининъ мирасы» сергиси 2026 сенесининъ ноябрь айына къадар чалышаджакъ. Къырым МДИ матбуат хызмети