Haberler
Qırım müsülmanları Bulğar islâm akademiyasında tasil alacaqlar
Опубликовано:
Qırım Müftisiniñ muavini Esadullah Bairov Bulğar islâm akademiyasınıñ açılış merasiminde iştirak etti. E. Bairovnıñ aytqanına köre, bu, em Rusiye, em de Qırım müsülmanları içün büyük bir vaqia. "Bu oquv yurtu İslâm dünyasında mevcut olğan ve ileri ketken oquv ocaqlarından artta qalmay. Ümüt etemiz ki, oquv programmaları ve mezunları al-Azhar, Karauin ve başqa universitetlerniñ mezunlrı kibi belli olurlar", - dedi Müfti muavini. Bulğan islâm akademiyası İslâm ilimleri magistrleri ve doktorlarnı azırlaycaq. Esadullah Bairovnıñ aytqanına binaen, Qırım Müftiyatı İslâm ilimleri bakalavrlarını daa yüksek tasil almaları içün şu oquv yurtqa yollaycaq. QMDİ MDT matbuat hızmeti [gallery link="file" columns="4" size="medium" ids="8397,8395,8393"]
Qırım Müftiyatı hadimleri Bulğar islâm akademiyasınıñ konferentsiyasında iştirak etti
Опубликовано:
Qırım Müftisi muavini Esadullah Bairov "Maneviy Yipek yolu. Tiklenüv. İntegratsiya" adlı Halqara ilmiy – diniy köntserentsiyada iştirak etti. Bu forum Bulğar şeerinde sentâbrniñ 3-5 künleri arasında keçirildi. Tedbir Rusiye Müftiler Şurası ve RF müsülmanları Diniy İdaresiniñ reisi şeyh Ravil Gaynutdin, Tatarstan Cumhuriyetiniñ Prezdenti R.N. Minnihanov ve TC ükümetiniñ desteginen teşkil etildi. Esadullah Bairov "Diniy teşkilâtlar ile iş alıp baruvnıñ tecribesi ve müsülman cemaatçılığı arasında ekstremizmniñ ögüni aluv" mevzusında maruza azırladı. E.Bairov öz maruzasında qayd etkeni kibi, diniy idareler birleşip, sahte fikir ve ğalerge qarşı çalışa bileler. Bunıñnen beraber, Müfti muavini mekteplerde din derslerini kirsetmek teklifini seslendirdi. "Biz başlanğıç sınıflardan başlap, din derslerini alıp barmaq kerekmiz. Balağa başından doğru malümat ve bilginiñ berilmemesi, ileride onıñ çeşit aqıntılarnıñ tesirinde qalmasına sebep ola bile", - dedi Esadullah Bairov. "Maneviy Yipek yolu. Tiklenüv. İntegratsiya" 2-nci Halqara konferentsiyası diniy idareler ve Rusiye, Qıtay, Merkeziy Asiya devletleri ve Avropa devlet müessiseleri arasında işbirlikniñ meydançığıdır: bu yerde em tecribe paylaşalar, em de terrorizm ve ekstremizm kibi ceryanlarğa qarşı tedbirlerniñ muzakeresi ötkerile, yaşlarnıñ terbiyesi ile bağlı meseleler köterile. Konferentsiyanıñ işinde Rusiye, Qıtay, Qazahistan, Özbekistan, Qırğızstan, Tacikistannıñ Diniy İdarelerniñ vekilleri, RF Prezidenti Administratsiyasınıñ azaları, KHC Devlet idaresiniñ din işleri boyunca hadimleri, tedqiqatçı ve alimler iştirak ettiler. Tedbirniñ soñunda nevbetteki konferentsiyanı Qırğızstannıñ paytahtı Bişkek şeerinde keçirmek teklifi yañğıradı. Müfti R. Gaynutdin aytqanı kibi, qırğızlı şerikler yüksek seviyede azırlanıp, bütün kerekli tedbirlerni alırlar. QMDİ MDT matbuat hızmeti (Rusiye Müftiler Şurasınıñ malümatına esaslanıp) [gallery link="file" columns="4" size="medium" ids="8439,8437,8435"]
Rohinca müsülmanlarına yardım eteyik!
Опубликовано:
Qırım ve Sevastopol müsülmanları Diniy İdaresi Şurası Myanmadaki rohinca müsülman halqına yardım olaraq Bütünqırım boyunca hayriye aktsiyasını ilân ete. Qırım Müftiyatı ilk evelâ dindaşlarnıñ eyiligi içün dua etmege ve maddiy taraftan da yardım qolunı uzatmağa davet ete. Paranı Aqmescit ş., Kurçatov soq., 4 (Kebir cami) ya da rayon ve yeri imamlarnıñ qoluna berip yibermek mümkün. Toplanğan sadaqa qaçaqlarnıñ lagerlerine yollanılacaq. Hatırlatamız, soñki afta devamında haberlerde ve içtimaiy ağlarda Myanma arbiy küçleri ve büddit keşişleri tarafından milliy ve diniy mensüplikke köre adiy insanlar qıynalıp, öldürilgeni aqqında video ve foto resimler darqatıla. Balalar, qadınlar, qarttlar-yaşlar vahşiyce qatil etilgenini şaatlar da tasdiq ete. BBT bildirgeni kibi, soñki künler devamında 60 biñge yaqın rohinca Myanmadaki Rakhayn ştatında qomşu Bangladeş memleketine qaçıp kettiler. Spravka: Rohinca — Myanmadaki Rakhayn ştatında yaşağan bir etnik gruppası. Rohinca – müsülman milleti. Bu millet vekilleri özlerini tamır halq sayalar. Lâkin, Birma sakinleri, rohinca halqını- Bangladeş qaçaqları dep sayalar. Rohinca halqı dünyada eñ çoñ zorbalıq yaşağan bir halqtır. 2012 s. bu halqnıñ 120 biñ vekili öz evlerinden quvulıp, qaçaqlar lagerlerinde kün keçirmege mecbur oldılar. QMDİ MDT matbuat hızmeti
QMDİ Şurasınıñ Myanma boyunca beyanatı
Опубликовано:
Soñki afta devamında haberlerde ve içtimaiy ağlarda Myanma arbiy küçleri ve büddit keşişleri tarafından milliy ve diniy mensüplikke köre adiy insanlar qıynalıp, öldürilgeni aqqında video ve foto darqatıla. Balalar, qadınlar, qartlar-yaşlar vahşiyce qatil etilgenini şaatlar da tasdiq ete. BBT bildirgeni kibi, soñki künler devamında 60 biñge yaqın rohinca Myanmadaki Rakhayn ştatında qomşu Bangladeş memleketine qaçıp kettiler. Qırım müsülmanları Diniy İdaresi Myanma akimiyetinden vahşiylikni toqtatmağa talap ete. Şura dünya cemaatçılığı, bu soy cinayetlerge qarşı turmaq içün meydanğa ketirilgen Birleşken Milletler Teşkilâtına muracaat etip, Rokhayn ştatında olıp keçken vaqialarğa qarışıp, kerekli tedbirlerni almağa rica ete. Dünya cemaatçılığı insanseverlik ve demokratiya esaslarını çızıp taşlamaz, degen ümüttemiz. Biñlerce adamlarnıñ, başqa millet ve din kütkeni içün çekişkenini körip, pervasız qalmaq mümkün degil. Biz, qırımtatar halqı olaraq ep birlikte Allahqa dua etip, rohinca halqı tezden qurtarılır, yaralar savrulır, dünya ise, olarğa küler yüznen baqacaq dep, ümüt besleymiz. Qırım ve Sevastopol müsülmanları Diniy İdaresi
Qırım Müftiyatınıñ hadimleri mahkümlerni Qurban bayramınen hayırladılar (FOTO)
Опубликовано:
Aqmescit ş. baş imamı Muhammed İslamov ve onıñ yardımcısı İbraim Zinetdinov Qırım Müftisiniñ avalesi ile Qırım paytahtınıñ 1 sanlı taqiqat merkezi ve 1 sanlı apishanesini ziyaret ettiler. Müftiyat hadimleri mahküm etilgen müsülmanlarnı Qurban bayramınen hayırladılar. Muhammed İslamov dindaşları ile birlikte dua oqudı, subet keçirip, suallerge cevap berdi, mahkümlerge eyilikler ve azatlıq tiledi. Ziyaretniñ soñunda tatlılıqlar darqatıldı. QMDİ MDT matbuat hızmeti [gallery link="file" columns="4" size="medium" ids="8460,8458,8456,8454"]
Qırım Müftiyatı Quran ögrenüvi boyunca Bütündünya teşkilâtı ile añlaşma tizdi
Опубликовано:
Cidda şeerinde (Saudiya Arbistanı Qırallığı) Qırım müsülmanları Diniy İdaresi ve Quran ögrenüvi boyunca Bütündünya teşkilâtı arasında işbirlik aqqında añlaşma tizildi. Resmiy körüşüv devamında Hacılıqnıñ teşkilâtlandıruvı ve tış alâqalar boyunca bölükniñ reberi Artur Reşitov ve Quran ögrenüvi boyunca Bütündünya teşkilâtı reisi Abdulla Basfar muzakereler alıp bardılar, neticede, eki yıllıq teneffüsten soñra, Qırımda şu teşkilât tarafından Quran ögrenüvi boyunca iş devam ettirilecegi belli oldı. Artur Reşitov Qırım Müftiyatı ve şahsen Qırım Müftisi hacı emirali ABlayev adından selâmlar, teşekkürlerni bildirdi. QMDİ MDT matbuat hızmeti
Qırım Müftisi muavini Mekkede din erbapları körüşüvinde iştirak etti (FOTO)
Опубликовано:
Türkiye Cumhuriyeti Diyanet işleri İdaresi reisi vazifesini eda etken Ekrem Keneş çeşit ülke ve devletlerniñ din erbapları ile ananeviy körüşüvni keçirdi. Körüşüv Diyanetniñ ofisinde ötkerildi. Tedbirde Acılıq missiyasınıñ reberleri, çeşit devletlerniñ Diniy İdareleri hadimleri iştirak ettiler. Rusiye hacılarını Qırım Müftisi muavini Ayder İsmailov, RMŞ hacılıq ve ümre departamentniñ reisi Ali Gürdin, Dağıstan Cumhuriyeti Müftisiniñ muavini Ahmad haci Kahayev, TC MDİ programmasınıñ reberi Ranis Vahitov temsil ettiler. Körüşüv devamında devlet vekilleri Hacılıq ile bağlı teessüratlarınen paylaştılar, bu ibadetniñ qabul etilmesi içün dua ettiler. Ayder İsmailov öz nevbetinde Qırım Müftisi hacı Emirali Ablayevniñ selâmlarını söyledi ve Ekrem Keleşke davet içün teşekkürler bildirdi. Ekrem Keleş, Qırım müsülmanlarını bayramnen hayırladı, Aqmescitte Cuma Caminiñ qurucılığına yüksek qıymet kesti ve qayd etkeni kibi, Türkiye Diyaneti ananeviy müsülman degerliklerini aşlamaq işinde Qırım Müftiyatına daima qol tutmaqta. İş körüşüvi devamında iştirakçiler Arakandaki (Birma) vaziyetni muzakere ettiler. Şu yerde yerli rohinca müsülmanlarını qıynap, öldüreler. Toplaşqanlar ögünde Myanma müsülmanlarınıñ vekili çıqışta bulundı. O tavsilâtlı şekilde vaziyetni añlattı. İştirakçiler adaletsizlikniñ toqtatılması içün dua ettiler. Arakan temsilcisi, er keske muracaat etip, müsülman devletlerniñ liderlerine öz noqta-i nazarını bildirip, halqara teşkilâtlarından zorbalıqnı toqtatmaq ve yardım etmekni talap etmege teklif etti. Hatırlatamız, bundan evel Türkiye Cumhuriyeti Prezidenti Recep Erdogan Arakandaki müsülmanlarğa qarşı zorbalıqnı toqtatmağa ve halqara cemaatçılığından adaletni tiklemege talap etti. QMDİ MDT matbuat hızmeti
Qurman Qurban bayramına davet ete!
Опубликовано:
Sentâbrniñ 3-nde Qurman qasabasında eñ müim müsülman bayramlarından biri – Qurban bayramı qayd etilecek. Tedbir Mekke Camisi yanında ötkerilecek. Bayram saat 15.00-te başlanacaq. Seyircilerni icadiy taqımlarnıñ kontsert programması, balalar içün attraktsionlar: batut, 3D-oyun, atlar qoşusı, bedava tatlılıqlar, dondurma ve popkorn ve ilâhre bekley. Balalarnı sevimli qaramanlar eglendirecek, bahşışlar darqatılacaq. Milliy Küreş boyunca yarışlarda yigitler ve balalar yarışlaşacaqlar. Ğalip – qoy qazanacaq. Bayram musafirleri içün sofralar donatılacaq. Mekke camisi Qurman qasabası,. 20 let Oktâbrâ soq., 2-a adresi boyunca yerleşe. QMDİ MDT matbuat hızmeti
Bulğanaq bayram qarşılaycaq! (FOTO)
Опубликовано:
Aqmescit rayonı Bulğanaq köyünde yerli müsülmanlar Qurban bayramına azırlanalar. Yerli sakinler adamlar toplaşacaq binanı, qorasını boyalap, kiriş yollarını temizlediler, etrafnı tertipke ketirdiler. QMDİ MDT matbuat hızmeti [gallery link="file" columns="4" size="medium" ids="7719,7717,7715,7713"]
Qırım Qurban bayramına azırlıq köre (FOTO)
Опубликовано:
Qırım camileri Qurban bayramına azırlanalar. Bağçasaray rayonı Bürlük köyünde imam Midat Tohtarovnıñ reberliginde yerli sakinler cami azbarı ve binasını tertipke ketirdiler. Esas işler endi yapıldı – çalılar pıçıldı, bağça temizlendi. Müsülmanlar qoranı boyaladılar, tereklerge ilâc septirdiler. Caminiñ binasında tamir işleri ötkerildi. İmamnıñ aytqanına köre, adamlar özleri teşebbüs kösterip, camini bayramğa azırlamağa istediler. "Yerli müsülmanlar camini seveler. Er bayram arfesinde azbarnı cıyıştıramız, boyalaymız, aqlaymız, temizleymiz. Asılında, cami diqqatsız qalmay. Cemaatımızğa teşekkürler, diqqatlı ve çeber adamlarımızğa maşallah!", - dedi Midat Tohtarov. Talaqada ösmürler de iştirak etti. Bürlük köyündeki cami yarımadanıñ esas yolları çatışqan yerde tura. Bulğanaq, Cav Cürek köylerinde de tamam böyle azırlıq kete. Mamaşay, Gölümbey ve başqa köylerniñ ibadehaneleri tertipke ketirile. QMDİ MDT matbuat hızmeti [gallery link="file" columns="4" size="medium" ids="7711,7709,7707,7705,7703,7701,7699,7697,7695,7693,7691,7689,7687,7685,7683"]
Qırımda birinci sınıf talebelerine çanta ve mektep aletleri bağışlandı (FOTO)
Опубликовано:
Aqmescitniñ "Seit-Settar" diniy kompleksinde çoqbalalı qorantalarnıñ balalarına çanta ve mektep aletleri bağışlandı. Merasimde Qırım Müftisi hacı Emirali Ablayev ve RF DD deputatı Ruslan Balbek iştirak ettiler. Hayırlav sözleri ile hacı Emirali Ablayev çıqışta bulundı. O, bala ve ana-babalarnı kelecek yañı oquv yılınen hayırlap, muvafaqiyetler tiledi. "Tasil – balalarımızğa teslim ete bilecek eñ müim şeydir. Eyi tasil alğan insan ögünde qısmet qapıları açıla. Balalarımız eñ eyi universitetlerde oqusın, bilgi alsınlar, halqına hızmet etsinler. Qırım müsülmanları Diniy İdaresi er taraftan yardım etmege azır", - dedi Müfti efendi. Ana-babalarğa ise, sabır ve ikmet tiledi. Müftiniñ fikirine DD deputatı Ruslan Balbek qoşuldı. Qayd etkeni kibi, bu kibi tedbirler halqnıñ küçü – birlikte saqlı olğanını köstere. "Bu hayırlı iş - göñüllerde tek eyi duyğular doğura. Bir qoranta olıp, biri-birimizge destek olamız", - dedi R. Balbek. Kiçikler bahşışlarnı alıp, quvandılar. Tamam şu yerde ana-babalarğa bahşışlarnı kösterip başladılar. Balalar içün tatlı sofralar donatıldı, şeñ animatorlar meraqlı programma azırladılar. Balalar oynap-külüp, yırladılar. Bir qaç künden soñ, olar rale başına oturacaqlar. Yañı, bilgi tolu ayat başlanacaq. QMDİ MDT matbuat hızmeti [gallery link="file" columns="4" size="medium" ids="7792,7790,7788,7786,7784,7782,7780,7778,7776,7774,7772,7770,7768,7766,7762,7760,7758,7756,7754,7752,7750,7748,7746,7744,7742,7740,7738,7736,7734,7732,7730,7728,7726,7724"]
“Faydalı ilim” yañı oquv yılını başlay
Опубликовано:
QMDİ MDT terkibinde çalışqan "Faydalı ilim" mektebi yañı oquv yılını başlay. 2017-2018 oquv yılına 8-12 yaş arasında balalar davet etile. Balalar yıl devamında tecvid qaideleri boyunca Quran oqumağa, İslâm dini esasları, Peyğamberler ayatını ögrenecekler. Dersler er cumaertesi künleri saat 10:00-dan 15:00-ke qadar meraqlı oyun şekilinde ötkerilecek. Birinci ders sentâbrniñ 9-nda saat 11:00-de olıp keçecek. Adresimiz: Aqmescit ş., Pobeda caddesi, 128. Telefon: +7978-892-07-26 QMDİ MDT matbuat hızmeti