Хаберлер
Къырым Муфтисининъ муавини УФСИН эркянындаки Джемаат шурасынынъ янъы теркибине кирди
Опубликовано:
Акъмесджитте Русиенинъ Къырым Джумхуриети ве Севастополь шеэри боюнджа Джезаларнынъ иджра этилюви федераль хызмети идареси янындаки Джемаат шурасынынъ янъы теркибининъ биринджи топлашувы олып кечти. Тедбир мезкюр идаренинъ бинасында УФСИН-нинъ башлыгъы Вадим Булгаковнынъ рехберлигинде олып кечти. Топлашувда идаре башлыгъынынъ муавини Юлия Степаненко, джезаларны иджра этюв системасында инсан акъларыны къорчалав болюги мудирининъ ярдымджысы Екатерина Рогожникова, аписханелер идаресининъ болюклери ве идарелернинъ рехберлери, эм де Джемаат шурасынынъ янъы азалары иштирак эттилер. Топлашувны ачкъан Вадим Булгаков Шура азаларыны ишнинъ башламасынен хайырлады ве джемиетнинъ файдасы огъурында мувафакъиетли ве семерели ишлер тиледи. Тедбир эснасында янъы теркип азаларынынъ ресмий такъдими олып кечти, эм де Шуранынъ реиси ве онынъ муавинлери сайландылар. Къырым Джумхуриети ве Севастополь шеэри мусульманлары диний идаресинден Джемаат шурасынынъ теркибине Къырым Муфтисининъ муавини, Акъмесджит шеэрининъ баш имамы Мухаммед Исламов кирди. О, топлашувнынъ ишинде фааль иштирак этти. Иштиракчилер джезаларны иджра этюв системасынынъ фаалиети боюнджа меселелерде ватандашлыкъ джемиети ве джемаат бирлешмелери арасында конструктив ишбирликнинъ инкишаф перспективаларыны музакере эттилер. Айры дикъкъат джемаат тешеббюслерининъ, ичтимаий эмиетке малик олып, ишленип чыкъарылгъан норматив укъукъий актлар лейхаларынынъ, аписхане системасы ишлеген йыллыкъ планларынынъ теклиф ве музакере этилювине, эм де муэссисенинъ малюмат сиясетини омюрге кечирювинде иштирак этмек меселелерине айырылды. Бундан да гъайры, Русиенинъ Къырым Джумхуриети боюнджа Джезалар Федераль хызметининъ идаресинде Динлерара иш группасынынъ топлашувы олып кечти. Тедбирде Федераль джеза хызмети башлыгъынынъ инангъанлар иле чалышув боюнджа ярдымджысы, протоиерей Роман Цуркан ве Къырым Муфтисининъ УФСИН иле ишбирлик боюнджа муавини, Акъмесджит шеэрининъ баш имамы Мухаммед Исламов иштирак эттилер. Корюшюв девамында Къырымнынъ аписхане муэссиселеринде булунгъан шахысларнен маневий-ахлякъий ишнинъ тешкиль этилювинен багълы актуаль меселелер музакере этильди. Иштиракчилер шубе астында олгъан, къабаатлангъан ве махкюм этильген кишилерге ярдым этмек меселелеринде диний бирлешмелернинъ ве Федераль джеза хызмети болюклерининъ гъайретлерини координация этмек, эм де тахсиль ве тербие тедбирлерини кечирмек ичюн умумий тутумларны ишлеп чыкъармакъ меселесине айры дикъкъат айырдылар. Къырым мусульманлары диний идаресинде къайд эттилер ки, Джемаат шурасында ве Динлерара иш группасында диний идаремизден векиллернинъ иштирак этмеси – динлерара диалогнынъ къавийлешмеси, инсанларнынъ маневий-ахлякъий тербиеси ве агъыр аятий вазиетте къалгъан кишилерге ичтимаий дестек косьтерильмеси боюнджа алып барылгъан системалы ишнинъ муим бир къысымыдыр. Къырым МДИ матбуат хызмети
2027 сенеси хаджылыкъкъа весикъалар къабул этиле
Опубликовано:
Къырым Джумхуриети ве Севастополь шеэри мусульманлары диний идареси (Таврия Муфтияты) Къырымдаки ресмий хаджылыкъ туроператор «АВН ТУР» иле бирликте мусульманларны 2027 сенесининъ хаджалыгъыны эда этмеге давет этелер. 2027 сенеси хаджылыкъкъа весикъалар къабул этилип башланды, эртедже ерлерни туткъанлар эндирим фиятларындан къулланыла биледжек. 2026 йылынынъ август айынынъ сонъуна къадар истеген программалардан бири боюнджа ер тутмакъ (бронь япмакъ) мумкюн, сонъра исе, фиятлар денъише биле. Теклиф этильген программалар: ✅ Комби – 5 600 $ – ёлнынъ бир къысымы учакънен + Саудие Арабистанына къадар автобус; ✅ Авиа – 6 100 $ – Саудие Арабистанына къадар учакънен; ✅ Къыскъа – 6 900 $ – Саудие Арабистанына къадар учакънен, программа 16 куньгедже. Анълашманы имзаламакъ ичюн яшагъан ерининъ къайдынен олгъан ички паспортны, эм де четэль паспортны такъдим этмек керек. Хатырлатамыз, Саудие Арабистаны хаджылыкъкъа бармагъа истеген эр бир инсан ичюн весикъа берюв муддетини баягъы эксильткени себебинден, Къырым Муфтилиги весикъаларны эвельден тапшырмакъны тевсие эте. Къайд этильмек ве къошма малюмат алмакъ ичюн ашагъыдаки телефон номерлери боюнджа багъланмакъ мумкюн: 8 800 551 3130 +7978 090 82 02 +7978 202 69 68 Къырым МДИ матбуат хызмети
Муфти эфендининъ догъгъан куню мунасебетинен хайырлавлар
Опубликовано:
Къырым Джумхуриети ве Севастополь шеэри мусульманлары Муфтиси хаджы Эмирали Аблаев догъгъан куню мунасебетинен хайырлавларны къабул эте. Къырымнынъ ве Русиенинъ чешит больгелеринден сиясет, джемаат ве медениет эрбапларындан, зенаатдашлардан ве достлардан чокътан-чокъ хайырлав мектюплери кельди. Ресмий мектюплерден гъайры, бир сыра эрбаплар Къырым Джумхуриети ве Севастополь мусульманлары диний идаресининъ мемуриет куллиесини зиярет этип, Муфти эфендини шахсен хайырладылар. Къырым МДИ матбуат хызмети
Къырым Муфтилиги Муфти эфенди хаджы Эмирали Аблаевни догъгъан кунюнен хайырлай
Опубликовано:
Къырым Джумхуриети ве Севастополь шеэри мусульманлары диний идареси Къырым Муфтиси хаджы Эмирали Аблаевни догъгъан кунюнен хайырлай: «Сайгъылы ве азиз Муфти эфендимиз! Къырым Джумхуриети ве Севастополь шеэри мусульманлары диний идаресининъ бутюн такъымы адындан сизни догъгъан кунюнъизнен джан-юректен хайырлаймыз! Бу кунь эпимиз ичюн фаркълыдыр, чюнки о бизлерге сизге олгъан терен миннетдарлыгъымызны ве самимий урьметимизни даа бир кере бильдирмеге имкян бере. Сизинъ икметли рехберлигинъизде диний идаремиз диний ве ахлякъий темеллеримизни къавийлештирип, Ислям динимизнинъ аньанелерини сакълап ве Къырым топрагъында тынчлыкъны ве аманлыкъны дестеклеп, эминликнен инкишаф этмеге девам эте. Сизинъ мусульманларны эр кунь ёрулмай къайгъырып къолламанъыз, джемаатнынъ ихтияджларына дикъкъатынъыз, эм де башкъа динлернинъ векиллери ве девлет органларынен диалоггъа ачыкъ олманъыз энъ сыджакъ миннетдарлыкъ сёзлерине ляйыкътыр. Сиз бизим ичюн тек бир етекчи дегильсинъиз, акъикъий иманнынъ, икметнинъ ве инсаниетликнинъ нумюнеси оласынъыз. Биз Сизинъ рехберлигинъизде чалышып ярарлы олмакътан гъурур дуямыз! Сизге джан-юректен къавий сагълыкъ, узакъ омюр, бутюн эйи ишлеринъизде сабыр тилеймиз. Юдже Раббимиз сизге ве якъынларынъызгъа аманлыкъ ве эйи аллар берсин, сонъсуз мерхаметини насип эйлесин. Эр бир кунюнъиз къуванч, сыджакълыкъ ве фикирдешлеринъизнинъ дестегинен толсун. Буюк урьмет ве дуалар иле, Къырым Джумхуриети ве Севастополь шеэри мусульманлары диний идаресининъ такъымы». Къырым МДИ матбуат хызмети
Динлерара иш такъымынынъ векиллери Акъмесджит шеэринде Тахкикъат изоляторыны ве аписханени зиярет эттилер
Опубликовано:
Русиенинъ Къырым Джумхуриети ве Севастополь шеэри боюнджа Джезаларны иджра этюв федераль хызмети идаресинининъ (УФСИН) векиллери бир кереден Акъмесджиттеки эки муэссисени – №2 Тахкикъат изоляторыны ве №1 Тюзетюв колониясыны зиярет эттилер. №2 Тахкикъат изоляторында ходжалыкъ хызмети отрядындаки махкюмлернен корюшюв кечирильди. Къырым Муфтисининъ Джезаларны иджра этюв федераль хызмети идареси (УФСИН) иле ишбирлик боюнджа муавини Мухаммед Исламов ве шу идаре башлыгъынынъ инангъанлар иле чалышув боюнджа ярдымджысы, протоиерей Роман Цуркан озь джанына къаст арекетлерининъ огюни алмакъ мевзусында профилактик сухбетни кечирдилер. Дин эрбаплары рухий темкинликнинъ ве бухран вазиетлеринден чыкъмакъ ичюн конструктив ёллар тапмакъ мааретининъ эмиетине дикъкъат чектилер. Спикерлер христианлыкънынъ ве Ислям динининъ диний-ахлякъий къыйметлерине эсасланаракъ, озюне ве башкъаларгъа нисбетен месулиетли давранышнынъ муимлигини къайд эттилер. Мухаммед Исламов Ислям дининде омюр энъ буюк къыймет сайылгъаныны, эр анги сынавлар исе, кечиджи олгъаныны къайд этти. Бундан да гъайры, Муфти муавини №1 Тюзетюв колониясыны зиярет этти. Анда Мухаммед Исламов диндашларымызнен корюшип, топлу дуа кечирди ве озь джанына къыймакъ иле дигер адамны ольдюрмек мевзусында Ислямнынъ мевамыны анълатты. Имам эфенди Къуран-ы Керимден мевзунен алякъалы аетлер кетирди ве Ислям дини инсан аятына теджавюзни кесен-кес ясакълагъаныны къайд этти. Бойле зияретлер махкюмлернен планлы маневий-тербиевий ишнинъ черчивесинде кечирилип, ахлякъий къыйметлерни пекитмеге, джинаетчиликнинъ огюни алмагъа ве аписханеге тюшкен инсанларгъа дестек косьтермеге ёнеликтир. Къырым МДИ матбуат хызмети
Къырым Муфтиси Акъмесджит ве Къырым митрополити Тихонны хайырлады
Опубликовано:
Къырым Джумхуриети ве Севастополь шеэри мусульманлары Муфтиси хаджы Эмирали Аблаев Акъмесджит ве Къырым Митрополити Тихонны догъгъан кунюнен хайырлады: «Къырым Джумхуриети ве Севастополь шеэри мусульманлары диний идареси адындан ве озь адымдан сизни догъгъан кунюнъизнен джан-юректен хайырлайым! Сизинъ омюринъиз – Раббимизге ве инсанларгъа федакяр хызметнинъ парлакъ нумюнесидир. Чокъ йыллар девамында сиз маневият нуруны сачасынъыз, православ динини къавийлештиресинъиз, джемиетнинъ ахлякъий сагълыгъы ве Къырымда динлерара диалогнынъ инкишафы акъкъында къайгъырып, бунынъ ичюн арекет эесинъиз. Биз сизинъ икметинъизге, ачыкълыгъынъызгъа ве чешит динлернинъ векиллери арасында даима муаббетлик олувына ёнелик ынтылувынъызгъа алельхусус къыймет кесемиз. Къаршылыкълы урьметке ве ишанчкъа эсаслангъан ишбирлигимиз эр кес ичюн гузель бир нумюнедир. Бу эмиетли куню сизге къавий сагълыкъ, маневий къувет, тюкенмез такъат ве бутюн ишлеринъизде Юдже Раббимизнинъ ярдымыны тилейим. Юрегинъизни эр вакъыт якъынларынъызнынъ сыджакълыгъы къыздырсын, дуаларынъыз исе, сизни хызмет ёлунда пекитсин». Къырым МДИ матбуат хызмети
Иш адамлары «Элял» сертификатларыны девам эттирелер
Опубликовано:
Къырым Джумхуриети ве Севастополь шеэри мусульманлары диний идаресинде эки иш адамына эляллыкъ сертификатларынынъ девам эттирильмеси акъкъында весикъалар такъдим этильди: иш адамы Менумеров Темур Рефатовичке ве «ChoCogo», «CHoCOPlay», «Pashaogly», «Frutibos», «Galata», «TAVRICHI», «Funcho» тиджарий маркаларнынъ саиби «Восточный букет» («Шаркъ гульдестеси») месулиети сынъырлы джемиетине. Ихтар: Эляллыкъ сертификатны алмагъа истеген иш адамлары КъМДИ «Элял» сертификация меркезининъ башлыгъы Ремзи Къуртдедеге невбеттеки телефон боюнджа мураджаат эте билелер: +79780741847, я да эл.адрес: halal@qmdi.ru. Къырым МДИ матбуат хызмети
Къырым Муфтиси кой мемуриетине ве арекетли атеш группаларына ярдым косьтерди
Опубликовано:
Къырым Джумхуриети ве Севастополь шеэри Муфтиси хаджы Эмирали Аблаевнинъ дестеги иле Къырым мусульманлары диний идареси сакинлерге ве ярымадада хавфсызлыкъны темин эткен болюклерге адресли ярдымны косьтермеге девам эте. Якъында Къырым Муфтиси адындан диний идаремизнинъ векили Аслан Алиев койлерден бирининъ мемуриетине электрик энергиясы сёндюрильген вакъытта хадимлерининъ толусынен ишлерини беджермелери ичюн керек олгъан генераторны теслим этти. Бундан гъайры, Муфтилик Акъмесджит районында ерлешкен арекетли атеш группаларына дестек тешкиль этти. Ярдым черчивесинде позицияларны азырлав ве хавфсызлыгъыны пекитюв боюнджа ишлер алып барылды, арбийлер ашайт ве шахсий темизлик махсулатларынен темин этильди. Айры дикъкъат эр такъымынынъ ве техниканынъ къорчаланувына айырылды. Диний идаремизнинъ ярдымынен автомобиллерни пилотсыз учуш аппаратларынынъ зарарындан къорчаламакъ ичюн демир конструкцияларнынъ ишлеп чыкъарылувы тешкиль этильди. Къырым Муфтилигинде бойле ишнинъ девам этиледжеги къайд этти, чюнки мухтаджларгъа ярдым ве къорчалайыджыларымызгъа къол тутув – Ислям дини огреткен энъ муим мерхаметлик ве бирлик принциплериндендир. Къырым МДИ матбуат хызмети
Муфти муавини Раим Гъафаров Къырым Джемаат Палатасынынъ янъы теркибине кирди
Опубликовано:
Къырым Джумхуриети Девлет Шурасынынъ отурышында Къырым Джумхуриети Джемаат Шурасынынъ янъы, бешинджи теркибининъ азаларына намзетлер тасдикъ этильди. Къарар Къырым Джумхуриетининъ «Къырым Джумхуриетининъ Джемаат палатасы» акъкъындаки Къанунына ве Къырым парламентининъ регламентине эсасен къабул этильди. Джемаат Палатасынынъ янъы теркибине Къырым Муфтисининъ муавини Раим Гъафаров кирди. Къырым Джумхуриети ве Севастополь шеэри мусульманлары диний идаресининъ Къырымнынъ Джемаат Палатасында иштираки динлерара диалогнынъ муимлигини ве джемиет ичюн муим олгъан къарарларда мусульманларнынъ мевамы козьге алынаджагъыны косьтере. Тасдикъ этильген янъы теркипке фаркълы сааларда чалышкъан инсанлар кирдилер: джемаат ве укъукъкъоруйыджы тешкилятлары, профсоюз бирлешмелери, миллий-медений автономиялар, казакилер бирлешмеси, тиббиет мутехассысларынынъ берлешмелери, ветеран ве тарихий-ватанперверлик бирлешмелери, махсус арбий операциянынъ ветеранлары, алимлер, экимлер, икътисадиятчылар, политологлар, миллий джемиетлернинъ векиллери, дин ве медениет эрбаплары. Къырым МДИ матбуат хызмети
«Мерхаметлик лялеси» хайрие сабалыгъы
Опубликовано:
Акъмесджитте Махсус арбий операция иштиракчилерине дестек косьтермек макъсадынен «Мерхаметлик лялеси» хайрие сабалыкъ емеги олып кечти. Сабалыкъ черчивесинде «Гонъюллилик: гонъюлли ярдымнынъ маневий-рухий аспектлери» мевзусында амелий семинар олып кечти. Тедбир дин эрбапларыны, джемаат тешкилятларынынъ, гонъюллилер бирлешмелерининъ, девлет муэссиселерининъ векиллерини ве Махсус арбий операция иштиракчилерине ве оларнынъ къоранталарына дестек меселесине ёнелик хайрие фаалиетининъ актив иштиракчилерини бир арада топлады. Тедбир иштиракчилерини Къырым Джумхуриети ве Севастополь шеэри мусульманлары диний идареси эркянындаки диний тедбирлерни тешкиль этюв болюгининъ рехбери, Къырым Джумхуриети Башлыгъынынъ меслеатчысы Зенифе Аблаева селямлады. Озь чыкъышында, о, улькемиз ичюн къолай олмагъан бу куньлеримизде гонъюллилер фаалиетининъ инкишафы, джемиеттеки гъайретлернинъ консолидациясы ве аньаневий маневий-ахлякъий къыйметлернинъ сакъланылувы не къадар муим олгъанына ургъу япты. Семинар черчивесинде Махсус арбий операциясы иштиракчилерине ве оларнынъ къоранта азаларына маневий, рухий ве амелий дестек боюнджа меселелер музакере этильди. МАО кечирильген заманда маневий-ахлякъий тербиенинъ ве инанчнынъ эмиети акъкъында аньаневий динлернинъ темсильджилери – Къырым Муфтисининъ муавини Раим Гъафаров иле Акъмесджит ве Къырым епархиясынынъ православ рухиятчысы Татьяна Данилова тариф эттилер. Олар джемиетнинъ къуветленмеси ве инсаннынъ ички къавийлигини сакъламасы ичюн маневий дестекнинъ, мерхаметликнинъ ве ярдымлашувнынъ айры муимлигини къайд эттилер. Ватан аскерлери къоранталары комитетининъ баш мудири Ольга Дорохина ве «Къырым аналары Ватаннынъ эрлерине» тешкилятынынъ темсильджиси Екатерина Артёмина иштиракчилерни омюрге кечирильген ичтимаий лейхаларнен, грант программаларында ве гонъюллилер арекетинде иштирак этмекнинъ имкянларынен таныш эттилер ве арбийлернинъ къоранталарына косьтерильген дестек акъкъында тариф эттилер. Тедбирнинъ амелий къысымыны Къырым Джумхуриети ватандашлыкъ имаеси ве февкъуляде вазиетлер боюнджа окъутув-усулий меркезининъ мутехассыслары кечирди. Иштиракчилер аджеле вазиетлерде биринджи ярдымны бермек боюнджа файдалы бильгилерге саип олдылар. Программада айры ерни Махсус арбий операция иштиракчилерининъ къоранталарына Къырым шифаханелеринде раатлыкъ ичюн сертификатларнынъ такъдим этилюви мерасими алды. Шифаханелерде тедавийленмек имкяныны он къоранта къазанды. Бундан да гъайры, «Мерхаметлик лялеси» хайрие акциясынынъ фааль иштиракчилери де айрыджа къайд этильдилер. Гонъюллилер арекетининъ инкишафына къошкъан исселери, фааль ватандашлыкъ мевамлары ве хайрие тешеббюслеринде иштираклары ичюн 25 гонъюллиге тешеккюрнамелер такъдим этильди. Тедбирни Къырым Джумхуриетинде нам къазангъан медениет эрбабы, «Юрегимни балаларгъа берем» халкъара алтын орденининъ кавалери рехберлигиндеки Сакъ районы Орехово кою «Демирель» нумюневий мектеп-оюн студиясынынъ балалары озь иджадий чыкъышынен яраштырдылар. Дюльбер концерт чыкъышлары мусафирлерге байрам муитини багъышладылар ве бирликнинъ, барышыкълыкънынъ, япыджылыкънынъ тимсали олдылар. Ресмий къысымдан сонъ фотосессия, сербест къонушув ве хайрие емеги олды. Тешкилятчылар къайд эткенлерине коре, бойле корюшювлер джемаат, диний ве гонъюллилер тешкилятларынынъ ишбирлигине сильтем бере ве махсус арбий операция иштиракчилерине ве оларнынъ къоранталарына дестек косьтермек меселесинде гъайретлерни бирлештирмеге ярдым эте. Къырым МДИ матбуат хызмети
Къырым мусульманлары диний идаресинде баш имамлар топлашувы олып кечти
Опубликовано:
Къырым Джумхуриети ве Севастополь шеэри мусульманлары диний идаресинде Къырым Муфтиси хаджы Эмирали Аблаевнинъ рехберлигинде больге баш имамларынынъ невбеттеки топлашувы олып кечти. Корюшюв эснасында дин эрбаплары больгелеринде дин джемиетлерининъ фаалиетинен алякъалы агъымки меселелерни музакере эттилер ве мусульманларнынъ эки диний байрамындан бири олгъан Къурбан байрамы къайд этильмесининъ екюнини чектилер. Топлашувнынъ иштиракчилери бильдиргени киби, ярымадамызнынъ больгелеринде байрам юксек севиеде тешкиль олунды. Бунъа иляве оларакъ, имамлар келеджек айгъа иш планларыны бельгиледилер. Къырым МДИ матбуат хызмети
Акъмесджитнинъ тахкъикъат изоляторында Къурбан байрамы кечирильди
Опубликовано:
Къурбан байрамы куньлеринде Къырым Джумхуриети ве Севастополь шеэри Муфтисининъ авалесинен онынъ муавини Мухаммед Исламов ярдымджыларынен бирликте Акъмесджитнинъ №1 ве №2 тахкикъат изоляторларына ве №1 тюзельтюв колониясына хайрие зияретлеринде булунды. Зияретлери эснасында диний идаремиз адындан махкюм диндашларымызгъа татлылыкълар ве эрзакъ теслим этильди. Мусульманлар ичюн джемаат намазлары ве дуа мерасимлери тешкиль этильди. Байрам куньлери муминлерге къол тутмакъ ве маневий къыйметлеримизни хатырлатмакъ гъает муимдир. «Муфти эфенди ве бутюн Къырым мусульманлары диний идареси адындан сизни мубарек Къурбан байрамынен хайырлайым. Сизге анълы амеллер япманъызны теменни этем, дуа этинъиз ве диндар мусульманнынъ адий яшайышына къйтынъыз. Юдже Раббимиз дуаларынъызны къабул этсин ве сизге тюзельменъиз ичюн кучь берсин», – деп, байрамнен хайырлады Мухаммед Исламов. Эрзакъ такъымлары ве татлылыкълар тек мусульманлар ичюн дегиль де, апислерде булунгъан дигер дин векиллерине де берильди. Бу, динине бакъмадан, эр бир инсангъа нисбетен аньаневий эйи къомшулыкъ ве урьмет принциплерининъ аяткъа кечирильмесининъ бир нумюнесидир. Къырым Муфтилиги мезкюр муэссиселернинъ мемуриетлерине байрам тедбирлерининъ тешкиль этилювинде косьтерген ярдымларыы ичюн тешеккюрлерини бильдире. Къырым МДИ матбуат хызмети