Хаберлер
Акъмесджитте Озьбек медениетининъ куню къайд этильди
Опубликовано:
Акъмесджитте Озьбек медениетининъ кунюне багъышлангъан тантаналы тедбир олып кечти. Тешкилятчысы – «Юлдуз» ерли миллий-медений мухтариетидир. Вакъиа миллетлерара муаббетлик ве Къырым халкълары медений мирасынынъ популярлаштырылувы сиясетини аяткъа кечирюв ичюн муим бир адым олды. Байрам программасында Къырым мусульманлары диний идаресининъ дин оджасы Мерьем Муждабаева иштирак этти. Байрам черчивесинде мусафирлернинъ дикъкъатына буюк медений программа такъдим этильди. Тедбирге кельгенлер озьбек аньанелеринен якъынджа таныш олдылар: миллий урбалар нумайыш этильди, эм де, озьбек халкъынынъ миллий ашлары такъдим этильди. Айры дикъкъат земаневий джемиетте миллетлерара диалогнынъ ролюне айырылды. Тедбир фаркълы миллетлернинъ ве динлернинъ менсюплерини бирлештирди ве, бойледже, Къырымнынъ бирлик ве къаршылыкълы сайгъы гъаелерине садыкъ олгъаныны тасдыкълады. Къырым МДИ матбуат хызмети
Муфти муавини Раим Гъафаров тиббиет факультетининъ талебелеринен корюшти
Опубликовано:
Акъмесджитте С.И. Георгиевский адына Къызыл Эмек Байрагъы орденини алгъан Тиббиет институтынынъ талебелеринен ачыкъ диалог кечирильди. Бу сухбетте Къырым Муфтисининъ муавини Раим Гъафаров да иштирак этти. Корюшюв джанлы сухбет шекилинде кечирильди, талебелер оларны меракъландыргъан суаллерни берип, муим ичтимаий мевзуларны музакере эттилер. Сухбетнинъ эсас мевзулары – къоранта къыйметлери, къарышыкъ къоранталар, къоранта аятынынъ хусусиетлери, миллетлернинъ бирлиги ве махсус арбий операциягъа дестек олды. Раим Гъафаров ургъулап айтты ки, къоранта – джемиетнинъ темелидир, фаркълы халкъларнынъ урф-адетине урьмет косьтермек исе, – барышыкълыкъны ве муаббетликни къавийлештире. Муфти муавини къайд этти ки, чокъмиллетли Къырымда эйи къомшулыкъ мунасебетлерини джанлы тутмакъ ве ярдымлашмакъ гъает муимдир. Талебелер музакерелерде фааль иштирак эттилер, озь нокъта-и назарларынен пайлаштылар ве суаллер бердилер. Корюшюв сыджакъ ве достане муитте кечти. Бойле диалоглар яшларгъа аньаневий къыйметлерни ве земаневий джемиетте къорантанынъ ролюни анъламагъа ярдым эте. Къырым МДИ матбуат хызмети
Даа бир элял сертификатынынъ девам эттирильмеси
Опубликовано:
Къырым Джумхуриети ве Севастополь шеэри мусульманлары диний идаресинде иш адамы Абдурахманов Эмиль Нусрет огълуна, «GulNar» къавеханесине элял сертификатынынъ девам эттирилюви акъкъында весикъа такъдим этильди. Ихтар: Эляллыкъ сертификатны алмагъа истеген иш адамлары КъМДИ «Элял» сертификация меркезининъ башлыгъы Ремзи Къуртдедеге невбеттеки телефон боюнджа мураджаат эте билелер: +79780741847, я да эл.адрес: halal@qmdi.ru Къырым МДИ матбуат хызмети
Къырым Муфтилиги Кардоникская станицасында джума джамининъ ачылувында иштирак этти
Опубликовано:
Кардоникская станицасында (Къарачай-Черкессия Джумхуриети) больгедеки мусульманлар ичюн муим вакъиа олып кечти – тантаналы муитте джума джами ачылды. Бу вакъиагъа багъышланып, Бутюнрусие хафызлар ярышы кечирильди. Ярышта девлетимизнинъ фаркълы больгелеринден кельген энъ кучьлю Къуран хайфызлары, шу джумледен, Имам Матуридий адына Къалай ислямий илимлер медресесининъ талебелери иштирак эттилер. Тантаналы джами ачылышы мерасиминде Къырым Джумхуриети ве Севастополь шеэри мусульманлары диний идаресинининъ векили, Къурман районынынъ баш имамы, медресемизнинъ хафызлар болюгининъ мудири Сулейман Самединов иштирак этти. О, эм де, ярыш иштиракчилерине къыймет кескен мутебер жюри эйетининъ теркибине кирди. Чыкъышында Сулейман оджа мусульман умметининъ бирлигине ве Ислям къыйметлерининъ сакъланылувына ургъу япты. Онынъ къайд эткенине коре, янъы джами тек ибадет ери дегиль де, маариф ве хайрие меркези оладжакъ. Бунъа иляве оларакъ, о, топлангъанларгъа Къырым Муфтиси хаджы Эмирали Аблаев адындан селямлар еткизди, эр кеске боллукъ ве эйи аллар тиледи. Тедбирде бир чокъ мусафир топланды: ерли сакинлер, дин эрбаплары, акимиет ве джемаат тешкилятларынынъ векиллери, Русиенинъ фаркълы больгелеринден кельген ярыш иштиракчилери. Джамининъ ачылувы иле ярышнынъ кечирилюви маневий аньанелер пекитильмесининъ, диний тахсильге дестекнинъ ве Шималий Кавказда динлерара диалогнынъ тимсали олды. Кардоникскаяда джума джамисининъ ачылувы ве Бутюнрусие хафызлар ярышынынъ кечирилюви – Къарачай-Черкессия Джумхуриетинде диний инфраструктуранынъ инкишафы ве, эм де, Русиенинъ фаркълы больгелеринден олгъан мусульман джемаатларынынъ арасындаки багъларнынъ къавийлешмеси ичюн муим бир адым олды. Ярыш яшларгъа Мукъаддес Къуранны огренмек ве диний къыйметлерни сакъламакъ ичюн ильхам берди. Къырым МДИ матбуат хызмети
Халкъларнынъ сюргюни къурбанларынынъ хатырасы куню
Опубликовано:
Къырымда Халкъларнынъ сюргюни къурбанларынынъ хатырасы куню къайд этильди. Адет узере, бу куню 1944 сенеси, майыс 18 кунюнде олып кечкен дехшетли вакъиаларгъа багъышлангъан хатыралыкъ матем тедбирлери олып кечти. Тедбирлерде Къырым Джумхуриети ве Севастополь шеэри мусульманларынынъ Муфтиси хаджы Эмирали Аблаев иштирак этип, бутюн мусульманларнынъ дуйгъаны терен кедерни ифаде этти. Муфти эфенди къайд этти ки, о къоркъунч куньлерни унутмамакъ ве сюргюнликни башындан кечирген халкъларнынъ аджысына урьмет косьтермек пек муимдир. Онынъ сёзлерине коре, айны бойле хатыралар инсанларны бирлештире ве фаркълы миллетлер арасында барышыкълыкъны къавийлештире биле. «Биз кунюмизге келемегенлер ичюн дуалар этемиз ве бойле вакъиаларнынъ текрарланмамасы ичюн Аллахкъа нияз этемиз. Биз бу аджыны хатырлаймыз ве ич бир вакъыт унутмазмыз», – деди Къырым мусульманларынынъ диний етекчиси. Муфти къошты ки, бугунь адалетли келеджекни къурмакънынъ темелини Русие Федерациясынынъ Президенти Владимир Путиннинъ эрмени, булгъар, юнан, къырымтатар ве алман халкъларынынъ реабилитациясына ве оларнынъ гъайрыдан тикленилювине ёнелик ферманы къоя. Майыс 18 тедбирлери черчивесинде дуалар окъулды ве Багъчасарай районындаки Сюйрен къасабасында ерлешкен «Къырым халкъларынынъ гъайрыдан тикленилюви ёлу» мемориал куллиеси иле бутюн Къырым боюнджа сюргюнлик къурбанларынынъ хатырасына багъышлангъан абиделер янына чичеклер къоюлды. Къырым МДИ матбуат хызмети
1944 сенеси, майыс 18 къурбанларынынъ хатырасына дуа
Опубликовано:
Майыс 18 куню, Къырымтатар халкъынынъ сюргюнлик къурбанларынынъ хатыра кунюнде Акъмесджиттеки Буюк Джума джамиде ве Къырымнынъ бутюн дигер джамилеринде сюргюнлик къурбанларына багъышланып, дуа мерасимлери кечирильди. Имамлар джами джемаатларынен берабер сюргюнликте вефат эткен ве Ана-Ватангъа къайтып оламагъан якъынларымыз ичюн дуалар окъудылар. Эр йыл, майыс 18 куню Къырымда халкъларнынъ сюргюнлик къурбанларынынъ хатырасына багъышланып, матем тедбирлери кечириле. Джумхуриетимизнинъ шеэрлеринде ве дигер ерлешим меркезлеринд, зораки сюргюнлик къурбанларына тикленген абиделер янына чичеклер къоюла. Къырымнынъ бутюн джамилеринде оларнынъ рухлары ичюн дуалар окъула. Къырым МДИ матбуат хызмети
Къурман районында Ислям тарихы боюнджа семинар
Опубликовано:
Къурман районында Къырымда Ислям тарихы мевзусына багъышлангъан семинар олыр кечти. Дерсни Къырым Джумхуриети ве Севастополь шеэри мусульманлары диний идаресининъ диний тедбирлерни тешкиль этюв болюгининъ рехбери Зенифе Аблаева кечирди. Дерсте Къурман районында ве якъын койлерде Къуран окъувы ве дин темеллери курсларына къатнагъан талебелер иштирак эттилер. Зенифе Аблаева дерсинде Къырымда Ислямнынъ ерлешмеси ве инкишафы деврелерини, больгемизнинъ тарихында ве медениетинде онынъ ерини тафсилятлы шекильде анълатты. Семинарнынъ эсас къысмындан сонъ диний идаремизнинъ фаалиети акъкъында сухбет япылды. Иштиракчилер ичюн татлылыкъларнен донатылгъан софра къурулды, бойлеликнен, сухбет сербест муитте девам этти. Къадын-къызлар оларны меракъландыргъан суаллерни берип, озь теэссуратларынен пайлашмакъ имкянына саип олдылар. Тешкилятчылар бильдиргенине коре, бойле лекцияларнынъ кечирильмеси ичюн талаплар кельгени сайын, олар Къырымнынъ дигер районларында да кечириледжек. Къырым МДИ матбуат хызмети
«Элял» сертификациясы
Опубликовано:
Къырым Джумхуриети ве Севастополь шеэри мусульманлары диний идаресинде «Алем» месулиети сынъырлы джемиетине, «Алем» ресторанына «Элял» сертификаты такъдим этильди. Ихтар: Эляллыкъ сертификатыны алмагъа истеген иш адамлары КъМДИ «Элял» сертификация меркезининъ башлыгъы Ремзи Къуртдедеге невбеттеки телефон боюнджа мураджаат эте билелер: +79780741847, я да эл.адрес: halal@qmdi.ru Къырым МДИ матбуат хызмети
«Биз – Гъалебенинъ мирасчыларымыз!» ярышынынъ финалы олып кечти
Опубликовано:
Къырым Джумхуриетининъ Девлет академик музыкалы театрында «Биз – Гъалебенинъ мирасчыларымыз!» 12-нджи регионларара иджадий ярышнынъ финалы олып кечти. Ярыш эр сене «Рус бирлиги» регионларара джемаат тешкиляты тарафындан, Къырым Джумхуриетининъ Башлыгъы Сергей Аксёновнынъ ёлбашчылыгъында, Къырым Джумхуриетининъ Тахсиль, илим ве яшлар назирлиги иле Медениет назирлигининъ дестеги иле кечириле. Мусафирлернинъ дикъкъатына джанларны титреткен ватанперверлик чыкъышлар, бундан да гъайры, «Танъры иле Ватан ичюн» («Таврида къадынлары») фотосергиси иле «Шершень» силяхлы инсансыз ава системалары операторларыны азырлагъан Къырым окъув меркезинден сивиль ве тедкъикъат инсансыз ава аппаратларынынъ имкянларыны нумайыш эткен серги такъдим этильди. Экинджи къатнынъ залында ерлештирильген баннерде истеген эр кес Улу Ватан дженкинде ве Махсус арбий операцияда джанларыны берген сойларынынъ ве якъынларынынъ адларыны хаттыралыкъ яза эдилер. Тедбирде урьметли мусафирлер: Къырым Джумхуриетининъ Башлыгъы Сергей Аксёнов, Къырым Джумхуриети Девлет Шурасынынъ Реиси Владимир Константинов, Русие Федерациясынынъ Къараманы, Къырым Джумхуриетинде Никарагуанынъ шерефли консулы Олег Белавенцев, Акъмесджит ве Къырым епархиясынынъ векиллери, Къырым Джумхуриети ве Севастополь шеэри мусульманлары диний идаресининъ векиллери, Къырым Джумхуриети ве Севастополь шеэрининъ назирликлери ве идарелерининъ рехберлери, Девлет Шурасынынъ депутатлары, комитетлернинъ рехберлери, Къырым Джумхуриети тахсиль идарелерининъ рехберлери, байрам авасыны яшамакъ ичюн кельген лейханынъ мусафирлери ве достлары булундылар. Къырым мусульманлары диний идареси адындан тедбирде Къырым Муфтисининъ муавини Раим Гъафаров ве Муфтилигимизнинъ диний тедбирлерни тешкиль этюв болюгининъ рехбери Зенифе Аблаева иштирак эттилер. Раим Гъафаров эр кесни келеяткъан Гъалебе кунюнен хайырлады ве тешкилятчыларгъа Къырым Муфтиси хаджы Эмирали Аблаев адындан тешеккюр бильдирди. «Дефаларджа айткъанымыз киби, бизим кучюмиз бирликтедир. Кучюмиз къардашлыкътадыр. Кичкене бир сырны ачмакъ истейим ки, бизим кучюмиз – Гъалебенинъ мирасчыларындадыр. Балалар, аферин сизге! Эминим ки, бизим къараманларымыз бугунь сизнен гъурурлана. Олар медаллер я да шухрет ичюн бармалыдар, гъалебе ичюн гъайрет эттилер. Олар бизге барышыкълыкъны, байрамны багъышладылар. Сизнен МАО иштиракчилери де гъурурланалар, олар да ёлларындан кетелер, гъалебе къазанмакъ ичюн кетелер, ве бу ёлда акъикъий къардашлыкъ ве бирлик косьтерелер. Бирликте Раббимизнинъ берекети. Бирликте – гъалебедир. Биз бирликтемиз ве биз гъалебе къазанаджакъмыз!» – деп, къайд этти Раим Гъафаров. Джанкой районындаки «Яркое поле мектеби-бала багъчасы» такъымына «Джума джами» куллиеси боюнджа экскурсиягъа сертификат такъдим этильди. Рехберлери – Юсупов Рустем Рамиз огълу. «Биз – Гъалебенинъ мирасчыларымыз!» иджадий ярышнынъ макъсады – музыкаль бедиий васталарнен, Ватаннынъ тарихий кечмишине урьмет ёлунен, яш несильге ватанперверлик дуйгъуларыны ашыламакъ ве оларны буютмектир. Къырым МДИ матбуат хызмети
Къырым Муфтиси Джанкойде адий сакинлернинъ эляк олмасы мунасебетинен тазиесини бильдирди
Опубликовано:
Къырым Муфтиси хаджы Эмирали Аблаев Джанкойде адий сакинлернинъ эляк олмасы мунасебетинен тазиесини бильдирди. Душман тарафнынъ силялы инсансыз ава аппаратлары шеэрге уджюм этерек, беш кишининъ ольмесине себеп олды. «Адий ватандашлырымызнынъ эляк олгъаны хаберини буюк бир кедер иле къаршыладыкъ. Беш инсан ольди. Бу, оларнынъ къоранталары ве бутюн Къырым ичюн буюк бир гъайыптыр. Бу къыйын вакъытта шу аджыны берабердже яшаймыз. Сойларына ве якъынларына Аллахтан сабыр ве кучь тилеймиз. Раббимиз оларнынъ джанларыны къабул этсин ве Дженнетине къойсын», – деди Муфти эфенди. Бундан гъайры, Муфти бей бутюн инангъан инсанларны бирлик олмагъа, къавий олмагъа ве эляк олгъанлар ичюн дуа япмагъа чагъырды. Къырым МДИ матбуат хызмети
Къырым Джумхуриетининъ Башлыгъы янындаки Демографик ве аилевий сиясет боюнджа шуранынъ биринджи отурышы
Опубликовано:
Акъмесджитте Къырым Джумхуриетининъ Башлыгъы янындаки Девлетнинъ демографик ве аилевий сиясетини омюрге кечирюв шурасынынъ биринджи отурышы олып кечти. Тедбирни Къырым Джумхуриетининъ Башлыгъы Сергей Аксёнов кечирди. Отурышта Къырым Джумхуриети ве Севастополь шеэри мусульманлары Муфтисининъ муавини Раим Гъафаров иштирак этти. Топлашув эснасында «Къоранта» миллий лейха черчивесинде «Къорантагъа дестек» ве «Чокъбалалы къоранта» региональ лейхаларынынъ омюрге кечирильмеге девам эткени къайд этильди. Чокъбалалы аилелерге бир сыра дестек тедбирлери, яш студентлер къоранталарына исе, белли сермия такъдим этиле. Бундан гъайры, балалы къоранталаргъа ишбергенлернинъ региональ корпоратив дестек стандарты омюрге кечириле. Сергей Аксёновнынъ фикирине коре, бугуньки куньде чезильмеси демографик вазиетни эйилештире биледжек эсас проблемалардан бири – яш къоранталарнынъ эвге саип олмамасыдыр. Тедбир иштиракчилери джумхуриеттеки демографик вазиетни, догъумларнынъ артмасына ёнелик тедбирлерни, студентлерге хас бир демографик стандартнынъ пекинмеси меселелерини музакере эттилер. Айры дикъкъат исе, балалы къоранталаргъа дестек меселесине эртарафлы янашув иле балаларнынъ догъулмасы ве осьтюрильмеси ичюн онъайтлы муитнинъ пейда этильмесине айырылды. Шура топлашувында ильмий, джемаат ве диний тешкилятларнынъ векиллери иштирак эттилер. Къырым МДИ матбуат хызмети
Кебир Джамиде хаджылыкъкъа бараджакълар ичюн эр йыллыкъ семинар олып кечти
Опубликовано:
Акъмесджитте, Кебир Джамиде 2026 сенеси хаджылыкъкъа бараджакъ мусульманлар ичюн эр йыл кечирильген семинар олып кечти. Семинарнынъ тантаналы къысымында Къырым Муфтисининъ муавини, Къырым мусульманлары диний идаресининъ тышкъы мунасебетлер ве хаджылыкъны тешкиль этюв болюгининъ рехбери Артур Решитов чыкъышта булунып, хаджылыкъ ёлджуларына огъурлы ёллар тиледи. О, Къырым Муфтиси хаджы Эмирали Аблаев адындан мусульманларгъа хаджылыкъкъа бармакъ ярдым эткен бутюн муэссиселерге ве идарелерге тешеккюр бильдирди, ве хаджылыкъкъа чыкъаджакъ мусульманларнынъ эйилиги ичюн дуа япты. Семинарда хаджылыкъ ёлджуларына ачыкъ ёллар тилеп, фаркълы муэссиселернинъ ве идарелернинъ векиллери чыкъышта булундылар: Акъмесджит шеэринде Русие Тыш ишлер назирлигининъ темсильджиси Артём Березовский, Къырым Джумхуриети Миллетлерара мунасебетлер боюнджа девлет комитетининъ миллетлерара мунасебетлер ве мигрантларнынъ ичтимаий-медений адаптациясы идаресининъ рехбери Длявер Османов, Къырым Джумхуриети ве Севастополь шеэринде Роспотребнадзорнынъ векили Сергей Цыганов. Семинар черчивесинде, аньаневий оларакъ, Диний идаремизнинъ дин оджалары чыкъышта булундылар. Олар келеджек хаджыларгъа талимат бердилер, хаджнынъ деврелерини ве ибадетлерини анълаттылар, оларнынъ маналары ве эмиети акъкъында тариф эттилер. Хаджылыкъ такъымларынынъ рехберлери амелий тевсиелер бердилер ве хаджны гузельдже эда этмек ве ватангъа къайтмакъ ичюн насыл этип, хаджылыкъ ёлджулыгъына азырланмакъ, хадж эснасында озюни алып бармакъ кереклигини анълаттылар. Хаджылыкъкъа кетеджек мусульманлар учь этапнен ёлгъа чыкъаджакълар – майыс 08, 14 ве 18 куньлери. Хаджылыкъ боюнджа семинар эр йыл диний идаремизнинъ хадж операторы «АВН ТУР» иле бирликте тешкиль этиле. Онынъ макъсады – хаджы оладжакъ мусульманларны Ислямнынъ беш темелинден бири олгъан хаджылыкъкъа эм маневий, эм де тешкилий джеэттен азырламакътыр. Къырым МДИ матбуат хызмети