Haberler
İmamlarnıñ ananeviy toplaşuvı
Опубликовано:
Qırım Cumhuriyeti ve Sevastopol şeeri musulmanları diniy idaresinde imamlarnıñ er aylıq toplaşuvı olıp keçti. Diniy hadimler Qırım Cumhuriyeti ve Sevastopol şeeri Müftisi hacı Emirali Ablayev ögünde yapqan işleri içün esabatlarını berdiler ve kelecek ayğa iş planlarını belgilediler. Toplaşuvnıñ soñunda imamlar bölgelerinde darqatmaq içün Qırım MDİ çıqarğan "Hidayet" gazetası yañı sanınıñ nushalarını aldılar. Qırım MDİ matbuat hızmeti
“Merhametlik lâlesi” aktsiyası artıq bütün Qırım seviyesinde!
Опубликовано:
Qırımda "Merhametlik lâlesi" hayriye aktsiyası başlandı. Bu sene QC başlığı Sergey Aksönovnıñ destegi ile aktsiyanı bütün Qırım seviyesinde keçirmek qararı alındı. Aktsiyada Qırım Cumhuriyetiniñ umumtahsil müessiseleri iştirak etecek. Aktsiyada iştirak etmek içün hayriyege öz issesini qoşmaq istegen er kes davet etile – mektep talebeleri, bala bağçalarındaki balalar, şeer ve rayon memuriyetleri, medeniyet erbapları, imamlar, din cemiyetleriniñ başlıqları, cemaat faaliyetçileri. "Merhametlik lâlesi" aktsiyasınıñ rehberi Zenife Ablayevanıñ bildirgenine köre, aktsiya neticesinde toplanılğan paralarnıñ ekseriyeti Kefede bala hospisiniñ qurucılığına ayırılacaq. "Biz er sene mezkür hayriye aktsiyasını keçiremiz ve yıl-yıldan iştirak etmege tırışqan, öz ellerinen lâlelerni yapmağa istegen balalarnıñ ve ocalarnıñ sayısı ep artqanını köremiz. Şu sebepten, umumtahsil müessiseleriniñ episi iştirak etsin ve yardım alacaq balalarnıñ sayısı da çoqlaşsın diye, bu yıl aktsiyanı bütün Qırım boyunca keçirmek maqsadını qoydıq", – dedi Zenife Ablayeva. Aktsiya "Balalarnıñ ellerinen ve büyüklerniñ eyi niyetinen" şiarı astında fevral-mart ayları devamında keçirilecek. Şu müddet içinde er bir göñülli aktsiyanıñ timsallerini azırlap qoyacaq, martta ise, balalar yapqan elyapmalar farqlı meydançıqlarda satılıp, hayriye içün qullanılacaq. Qırım MDİ matbuat hızmeti
Qırım Müftiyatı QC boyunca Rosgvardiyada körüşüvni keçirdi
Опубликовано:
Qırım Cumhuriyeti ve Sevastopol şeeri musulmanları diniy idaresi "Qırım Cumhuriyeti halqlarınıñ medeniyet merkezi" ile birlikte Qırım Cumhuriyeti boyunca Rosgvardiya idaresinde iş körüşüvini keçirdi. Qırım Müftisiniñ muavini Raim Ğafarov ananeviy qıymetler mevzusında suhbet keçirdi, cemiyet ögündeki mesüliet ve insanlar arasında eyi munasebetler aqqında tarif etti. Buña ilâve olaraq, körüşüv çerçivesinde milletlerara birlik, yardımlaşuv, Vatanğa sevgi ve onı qorçalav aqqında laf etildi. Qırım MDİ matbuat hızmeti
2024 senesi hacılıq boyunca bütünrusiye muşaveresi
Опубликовано:
Qırım Müftisiniñ muavini, Müftilikniñ tış munasebetler ve hacılıqnı teşkil etüv bölüginiñ rehberi Artur Reşitov Hac şurasınıñ 2024 senesi hacılıqnıñ teşkil etilüvi boyunca keçirilgen iş muşaveresinde iştirak etti. Toplaşuv RF Federal Meclisiniñ Federatsiya Şurası azası, Rusiye Akimiyetiniñ diniy birleşmeler boyunca komissiyanıñ hacılıq işleri boyunca mesülietlisi İlyas Umahanovnıñ rehberliginde olıp keçti. Muşavere esnasında bıltırki hacılıqnıñ neticeleri çıqarıldı, bu sene keçirilecek hacılıqnıñ esas parametrleri işlendi, bütünrusiye kvotası bölünip, 2024 senesi hacılıq mevsimi içün hacılıq operatorları tasdıqlandı. Saudiye akimiyetiniñ qararı ile 2024 senesi hacılıqqa barmağa istegenler 2024 sene, martnıñ 1-ne qadar yazılmaq kerekler. Añlaşmanı tizmek içün yaşağan yeriniñ qaydı ile içki pasportnı ve tışki pasportnı taqdim etmek kerek. Hacılıqqa barmağa istegenler tafsilâtlı malümatnı almaq içün QMDİ MDT resmiy hacılıq operatorınıñ saytında ögrene bileler: https://avntour.ru Yazılmaq içün telefonlar: 8 800 551 3130 +79780908202 +79782026968 +79257158485 Qırım MDİ matbuat hızmeti
Qırım Müftiyatı elâllıq sertifikatlarını devam ettire
Опубликовано:
Qırım Cumhuriyeti ve Sevastopol şeeri musulmanları diniy idaresinde (Tavriya Müftiyatında) iş adamı Ablayev Abdulla Enveroviçke elâllıq sertifikatınıñ devam ettirilmesi aqqında şeadetname berildi. İş adamı "Shukur" ticariy markalı tatlılıq mahsulatlarını azırlap sata. Sertifikatnı Qırım Müftisi hacı Emirali Ablayev taqdim etti ve işlerinde muvafaqiyetler tiledi. İhtar: Elâllıq sertifikatını almağa istegen iş adamları QMDİ "Elâl" sertifikatsiya merkeziniñ başlığı Remzi Qurtdedege nevbetteki telefon boyunca muracaat ete bileler: +79780741847, ya da el.adres: halal@qmdi.ru Qırım MDİ matbuat hızmeti
“Elâl” sertifikatlarınıñ taqdim etilüvi
Опубликовано:
Qırım Cumhuriyeti ve Sevastopol şeeri musulmanları diniy idaresinde (Tavriya Müftiyatında) "Osman" ticariy markanı temsil etken Abibullayev Enver Fikretoviç iş adamına elâllıq sertifikatı taqdim etildi. Bundan da ğayrı, "Mevlüd" ticariy markasını temsil etken iş adamı Mevlüdov Server Rasimoviçke "Elâl" sertifikatınıñ devam ettirilmesi aqqında şeadetname taqdim etildi. İnsanlarnıñ eyiligi oğrunda eyi çalışmalar tilep, sertifikatlarnı Qırım Cumhuriyeti ve Sevastopol şeeri Müftisi hacı Emirali Ablayev taqdim etti. İhtar: Elâllıq sertifikatını almağa istegen iş adamları QMDİ "Elâl" sertifikatsiya merkeziniñ başlığı Remzi Qurtdedege nevbetteki telefon boyunca muracaat ete bileler: +79780741847, ya da el.adres: halal@qmdi.ru Qırım MDİ matbuat hızmeti
Qırımda Sovetler Birliginiñ eki defa qahramanı Amethan Sultannıñ hatırası añıldı
Опубликовано:
Qırım Müftisiniñ muavini Raim Ğafarov Sovetler Birliginiñ eki defa qahramanı, nam qazanğan uçucı-sınavcı Amethan Sultannıñ abidesi yanına güldestelerniñ qoyuluvı merasiminde iştirak etti, tedbir bugün Qırımnıñ paytahtında olıp keçti. Raim Ğafarov toplanğanlarnı Qırım Müftisi hacı Emirali Ablayev ve Qırım Cumhuriyeti ve Sevastopol şeeri musulmanları diniy idaresi adından selâmladı ve qayd etti ki, efsaneviy uçucı Amethan Sultannıñ adı epimizniñ yüreginde yaşamalı. "Bizim vatandaşımız yapqan qahramanlıqlar daima hatıramızda ve yüreklerimizde qalacaq", – dep, qayd etti Raim Ğafarov. Tedbir çerçivesinde iştirakçiler Amethan Sultannıñ hatırasını sükünet daqqasınen añdılar ve abidesi yanına güldesteler qoydılar. İhtar: Sovetler Birliginiñ eki defa qahramanı, namlı uçucı Amethan Sultan 1971 senesi, fevral 1 künü Tu-16 uçqan laboratoriyanıñ sınavı esnasında elâk oldı. Ulu Vatan cenkinde efsaneviy uçucı 603 arbiy uçuşnı keçirdi, 150 ava uruşında iştirak etti, şahsen özü ve taqım erkânında duşmannıñ 49 uçağını urıp yıqtı, şu cümleden, Qırım üstünde 6 uçaqnı yoq etti. Qırım MDİ matbuat hızmeti
“Halq medresesi” mezuniyeti
Опубликовано:
İçki qasabasınıñ camisinde "Halq medresesi" kursunıñ mezuniyeti olıp keçti. Diplomlarını 10 bitirici aldı. "Halq medresesi"-niñ mezunlarını Qırım Cumhuriyeti ve Sevastopol şeeri Müftisiniñ muavinleri Raim Ğafarov ve Emir-Asan Umerov hayırladılar. Olar mezunlarğa İslâmnı ögrenmege ve halqqa hızmet etmege ıntılğanları içün teşekkürlerini bildirdiler. Bütün bitiricilerge "Halq medresesi" İslâm temelleri ve ibadet esasları kursunıñ yekünlenüvini bildirgen şeadetnameler ve ediyeler ile diniy kitaplar taqdim etildi. Hatırlatamız, Qırım musulmanları diniy idaresiniñ "Halq medresesi" leyhası endi üç yıl devamında çalışa. Bu müddet devamında kurslarnı 200-den ziyade kişi yekünledi. "Halq medresesi"-niñ diplomları imam olaraq çalışmağa ve diniy faaliyetni alıp barmağa aq bere. Leyhanıñ maqsadı – Qırım Cumhuriyetinde çalışacaq yerli diniy kadrlarnı azırlamaqtır. Qırım MDİ matbuat hızmeti
Muhammed İslâmov №1 tüzetüv merkezini ziyaret etti
Опубликовано:
Qırım Cumhuriyeti ve Sevastopol şeeri musulmanları Müftisiniñ Cezalarnı icra etüv boyunca federal hızmeti idaresi ile işbirlik boyunca muavini Muhammed İslâmov mezkür idare başlığınıñ diniy işler boyunca muavini, protoiyerey Roman Tsurkan ile birlikte Aqmescitteki №1 tüzetüv merkezini ziyaret etti. Olar dinlerara taqım erkânında musulmanlar içün açılacaq namaz odasını baqıp çıqtılar. "Tüzetüv merkezinde namaz odası olacaq. Men, Qırım Müftisiniñ avalesinen, onı baqtıp çıqtım, kerek olğan eşyanıñ, abdest almaq içün kerekli şaraitniñ bar olıp-olmağanını teşkerdim", – dedi Muhammed İslâmov. Buñdan ğayrı, iş taqımı "Ananeviy qoranta qıymetleri" mevzusında lektsiya keçirdi. Qırım MDİ matbuat hızmeti
Tahqiqat izolâtorında dinlerara iş taqımınıñ körüşüvi
Опубликовано:
Qırım Cumhuriyeti ve Sevastopol şeeri musulmanları Müftisiniñ Cezalarnı icra etüv boyunca federal hızmetiniñ idaresi ile işbirlik boyunca muavini Muhammed İslâmov mezkür idare başlığınıñ diniy işler boyunca muavini, protoiyerey Roman Tsurkan ile birlikte Aqmescitteki ekinci tahqiqat izolâtorını ziyaret etti. Olar Tİ rehberiniñ terbiye işleri boyunca muavini Kirill Kurbatov ve yardımcısı iştirakinen dinlerara iş taqımınıñ toplaşuvını keçirip, 2024 senesine keçirilecek tedbirler planını belgilediler. Tizilgen iş cedveli çerçivesinde esas diqqat yañlış yolğa kirip, mahküm etilgen dindaşlarnen diniy-maneviy terbiye işiniñ alıp barılmasına berilecek. Qırım MDİ matbuat hızmeti
Qırım ve Sevastopol Müftisi Ayder Tippanıñ qorantasına tatasınıñ ölümi munasebetinen taziye bildirdi
Опубликовано:
Qırım Müftisi hacı Emirali Ablayev ve Qırım Cumhuriyeti ve Sevastopol şeeri musulmanlarınıñ diniy idaresi Qırım Cumhuriyeti Milletlerara munasebetler boyunca devlet komitetiniñ reisi Ayder Tippağa tatası Zarema Tippanıñ ölümi munasebetinen taziyelerini bildireler. "Yaqın insannı coymaq – ağır bir imtiandır. Rabbimiz onı şerefli şekilde keçmege yardımcı olsun. Acıñızğa emdem olıp, göñülimizde keder duyamız, ve Allah Taalânıñ merhumeniñ canına rahmet etmesi ve ebediy ayatta eñ güzel mukâfatnen taqdirlemesi içün dua etemiz", – dedi Qırım Müftisi. Allah rahmet eylesin! "Epimiz Allah içünmiz ve qaytuvımız Oñadır!" ("Baqara" suresi, 2/156). Qırım MDİ matbuat hızmeti
Qırım Müftiliginde Aqmescit imamlarınıñ toplaşuvı olıp keçti
Опубликовано:
Qırım Cumhuriyeti ve Sevastopol şeeri musulmanları diniy idaresinde Aqmescit şeeri ve rayonı imamlarınıñ toplaşuvı olıp keçti. Toplaşuv Qırım Müftisiniñ muavinleri Raim Ğafarov ve Muhammed İslamov, Aqmescit bölgesiniñ baş imamı Enver Baqiyev ve Qırım Müftisiniñ mesül kâtibi Ayder Acimambetovnıñ rehberliginde olıp keçti. Bütün din hadimleri yapılğan işleri içün esabat berdiler ve yaqın vaqıtqa planlarını belgilediler. Tedbir esnasında işbu toplaşuvnı er ay keçirmek qararı alındı. Qırım MDİ matbuat hızmeti