Хаберлер
Къырымда даа эки ММО пейда олды
Опубликовано:
Къырым Джумхуриети ве Севастополь шеэри мусульманлары диний идаресининъ (Таврия Муфтиятынынъ) аризасы иле региональ эмиетке малик медений мирас абиделери джедвелине эки янъы объект кирсетильди. Бойледже, Аутка коюнде ерлешкен эски джами бинасы (шимди Ялта шеэрининъ сынъырлары ичинде, Кирова сокъ., 113 адресинде) ве Багъчасарай районынынъ Гъавр коюнде ерлешкен тарихий «Ахмед ве Мехмед агъа-къардашнынъ эви» региональ эмиетке малик медений мирас объектлери олдылар. «Къырым мусульманлары диний идареси Медений мирасны девлет тарафындан сакълав департаментине мунасип аризаларнен мураджаат этип, ишбу объектлернинъ абиделер джедвелине кирсетильмеси ве оларнынъ девлет тарафындан имае этилювинининъ теминленмеси риджасында булунды. Департамент, озь невбетинде, керекли процедураларны кечирип, шу объектлерни бирер абиде оларакъ таныды», – деп, къайд этти Къырым Муфтисининъ месуль кятиби Айдер Аджимамбетов. Къырым мусульманлары диний идареси, Къырым Муфтиси хаджы Эмирали Аблаевнинъ ёлбашчылыгъында, Департаментнинъ ёлбашчыларына ве Къырым Джумхуриети Медениет назирлигининъ Медений мирас боюнджа ильмий-усулий шуранынъ азаларына оларнынъ профессионаллиги ве бойле абиделерге буюк меракъ косьтерювлери ичюн тешеккюр бильдире. Тарихнынъ ве кечмишимизнинъ сакъланылувы – ичтимаий аятымызнынъ муим къысымыдыр, бунынъ ичюн онъа айры эмиет бермек керек. Бизим улькемиз чешит абиделерге, шу джумледен, диний абиделерге гъает зенгиндир, бунынъ илериде ичюн даа чокъ ишимиз бар. Ихтар: Аутка коюнинъ джамиси 19 асырда къурулгъан. Джами оюлгъан къавий ташлардан къаланып, эвель онынъ дёрт тарафлы тенекенен къапатылгъан дамы бар эди. Пенджерелери кемер шекилинде япылгъан эди. Кунюмизде джами бинасы музыка мектеби оларакъ къулланыла. «Ахмед ве Мехмед агъа-къардашнынъ эви» Багъчасарай районындаки Гъавр (Плотинное) коюнде, Ленина сокъагъында ерлеше. Эвнинъ киришлеринде, эки тарафтан арап уруфатынен тарихлер язылы, гъарбий тарафтан – хиджрий 1202 сене, шаркъий тарафтан – хиджрий 1203 сенеси. Христиан такъвимине коре, бу – 1781 ве 1782 сенелери. Бунъа иляве оларакъ, киришлерде бойле язылар бар: шаркъ тарафында: «Машаллах, эльхамду лиллях. Саиби – Халим огълу Мехмед, 1203 сене», гъарп тарафында: «Машаллах, эльхамду лиллях. Саиби – Халим огълу Ахмед, 1202 сене». Мезкюр эмирлернен ашагъыдаки багълантылар иле таныш олмакъ мумкюн: https://mkult.rk.gov.ru/documents/00ec0600-a6d1-46e2-bdbe-e6d6f09456c7; publication.pravo.gov.ru/document/9101202506300011. Къырым МДИ матбуат хызмети
Даа бир «Элял» сертификаты девам эттирильди
Опубликовано:
Къырым Джумхуриети ве Севастополь шеэри мусульманлары диний идаресинде «Софра» тиджарет маркасына саип иш адамы Сейт-Джелиль Эрвин Арсеновичке «Элял» сертификатынынъ девам эттирильмеси акъкъында весикъа такъдим этильди. Ихтар: Эляллыкъ сертификатны алмагъа истеген иш адамлары КъМДИ «Элял» сертификация меркезининъ башлыгъы Ремзи Къуртдедеге невбеттеки телефон боюнджа мураджаат эте билелер: +79780741847, я да эл.адрес: halal@qmdi.ru Къырым МДИ матбуат хызмети
Къырым Муфтиси Русиеде Кришна анълавы джемиетлери меркезининъ реисинен корюшти
Опубликовано:
Акъмесджитте Къырым Джумхуриети ве Севастополь шеэри мусульманлары диний идаресининъ реиси, Къырым Муфтиси хаджы Эмирали Аблаевнинъ «Русиеде Кришна анълавы джемиетлерининъ меркези» меркезлештирильген диний тешкилятынынъ Идаре шурасынынъ реиси Апрамеятма дас (Алексей Карпеченков) иле корюшюви олып кечти. Къаршылыкълы урьмет муитинде кечкен корюшюв динлерара диалогнынъ инкишафы ве динлер арасында эйи къомшулыкъ мунасебетлерининъ пекитильмеси макъсадынен кечирильди. Муфтиси эфенди хаджы Эмирали Аблаев, озь диний теджрибесине эсасланып, барышыкълыкъ ичинде яшамакънынъ ве Къырымда фаркълы дин ве халкъ векиллерининъ бири-биринен япыджы мунасебетлер къурмасынынъ муимлигине ургъу япты. Музакеренинъ эсас мевзусы – умумий гуманитар ве ичтимаий фаалиет олды. Тарафлар Махсус арбий операциягъа ве джебеге якъын яшагъан инсанларгъа дестек теджрибесинен пайлаштылар. Апрамеятма дас онынъ рехберлигинде Донбасста чалышкъан тешкилятынынъ фаалиети акъкъында тариф этти, 2022 сенесинден башлап анда мунтазам суретте гуманитар миссия алып барыла. Корюшюв сонъунда тарафлар иш багъларынынъ къурулмасы ве хайрие саасында ишбирликлери акъкъында анълаштылар. Сухбетте Къырым Муфтисининъ муавини Раим Гъафаров да иштирак этти, онен умумий гуманитар лейхаларны тешкиль этюв боюнджа амелий суаллер музакере этильди. Къырым МДИ матбуат хызмети
Джанкой районында «Мерхаметлик лялеси» акциясына багъышлангъан буюк концерт
Опубликовано:
Майское медениет эвинде Бутюнкъырым «Мерхаметлик лялеси» акциясы черчивесинде парлакъ хайрие тедбири олып кечти. Тедбирнинъ тешкилятчысы – Къырым Джумхуриети ве Севастополь шеэри мусульманлары диний идареси оны Джанкой районы мемуриетининъ дестеги иле кечирди. Залны топлап толдургъан концерт районда бойле микъяста кечирильген ильк вакъиа олды. Концертте топланылгъан бутюн паралар хайрие макъсатларына, мухтаджларгъа ярдым этмек ичюн къулланыладжакъ. Санада Джанкой районынынъ энъ гузель иджадий такъымлары иштирак этти: «Джанкой фиданлары» миллий медениетлер нумюневий ансамбли (бедиий рехбери Айше Рамазанова); «Филармония» вокал студиясы (рехбери – Къырым Джумхуриетинде нам къазангъан медениет эрбабы Эльмира Бекирова); Къамаджы (Заречное) ве Къалай (Азовское) бала санат мектеплерининъ такъымлары (мудирлери, сырасынен, Игорь Иваненко ве Иззет Муединов); Кучюк Алкъалы (Завет-Ленинский) медениет эвининъ артистлери (бедиий рехбер Анна Осетрова); Окъутувы къырымтатар тилинде алып барылгъан Къамаджы мектеп-бала багъчасынынъ балалары. Тедбирге урьметли мусафирлер ве джемаат фаалиетчилери тешкриф буюрдылар: Зенифе Аблаева – Муфтилигимизнинъ диний тедбирлерни тешкиль этюв болюгининъ рехбери, Азиз Меметов – Джанкой районы мусульман дин джемиетлерининъ реиси, Якуб Келямов – Джанкой районы мемуриетининъ медениет, миллетлерара мунасебетлер ве дин болюгинде миллетлерара мунасебетлер секторынынъ рехбери, Людмила Коршунова – «Русие миллетлер ассамблеясы» джемаат-девлет тешкилятынынъ Джанкой район болюгининъ реиси, Айше Рамазанова – «Джанкой фиданлары» ансамблининъ бедиий рехбери. Тедбир тек больгенинъ истидатларыны ве медений зенгинлигини нумайыш этмекнен сынъырланмады, эм де инсанларны эйилик япмакъ ичюн бир арагъа кетирген муим мерхаметлик акты олды. Тешкилятчылар бу хайрие акъшамынынъ мувафакъиетли кечирилювине озь иссесини къошкъан бутюн артистлерге, мусафирлерге ве сейирджилерге буюк тешеккюрлер бильдире. Къырым МДИ матбут хызмети
Акъмесджит гимназиясында «Мерхаметлик лялеси» акциясы черчивесинде концерт олып кечти
Опубликовано:
Акъмесджиттеки Э.К. Покровский адына №10 мектеп-гимназиясында «Мерхаметлик лялеси» хайрие акциясына багъышлангъан тесирли концерт олып кечти. Бу кунь бутюн мектеп джемиети ичюн хусусий бир вакъиа олды. Чюнки ляле – садедже бир чичек дегиль, о, умютнинъ, эр кунь инсанларнынъ аятларыны сакъламакъ ве Ватаныны къорчаламакъ ичюн курешкенлерге миннетдарлыкънынъ ве буюк урьметнинъ тимсалидир. Санадан тесирли шиирлер ве йырлар янъгъырады, талебелер азырлагъан оюн номерлери исе, тедбирге чокъмиллетли реклилик къошты. Мусафирлерни, ана-бабаларны ве оджаларны урьметли мусафирлер селямладылар: Къырым Муфтисининъ муавини Раим Гъафаров, «Рус бирлиги» регионларара джемаат тешкиляты незарет шурасынынъ башлыгъы Елена Аксёнова, Къырым Эсап палатасынынъ реиси Сергей Додонов, Акъмесджит умумий тахсиль болюгининъ рехбери Наталья Прилепо. Бундан эвель мектепни Къырым мусульманлары Муфтисининъ муавини Раим Гъафаров зиярет эткен эди. О, талебелер ичюн мерхаметлик, эйилик ве ярдымлашув акъкъында хусусий бир дерс кечирген эди. Самимий сухбет эснасында о, балаларгъа этрафымыздаки инсанларгъа ярдым этмекнинъ эмиети ве фаркълы медениетлерни бирлештирген ортакъ къыйметлер акъкъында тариф эткен эди. Хатырлатамыз, «Мерхаметлик лялеси» хайрие акциясы апрель айына къадар девам этеджек, бутюн истегенлер акцияда иштирак этип, эйилик япаракъ, мухтаджларгъа ярдым эте билелер. Къырым МДИ матбуат хызмети
Автонакълие техникумында аньаневий къыйметлер ве Ватанны къорчалав акъкъында лекция
Опубликовано:
Къырым Муфтисининъ муавини Раим Гъафаров Автонакълие техникумынынъ талебелеринен маариф корюшювни кечирди. Лекциясы черчивесинде о, студентлерге земаневий джемиетте аньаневий маневий-ахлякъий къыйметлер сакъланылувынынъ эмиети акъкъында тариф этти. Айры дикъкъат ватанперверлик ве Ватанны къорчалав мевзусына айырылды. Раим Гъафаров къайд этти ки, эр бир ватандашнынъ боюн борджу – девлетини ве къорантасыны къорчаламакъ ичюн азыр олмасыдыр. Тедбир Къырым мусульманлары диний идареси иле джумхуриетимизнинъ тахсиль муэссиселери ишбирлиги черчивесинде омюрге кечирильди. Бойле корюшювлер яшларнынъ маневий-ахлякъий ве ватанпервер тербиесине ёнеликтир. Къырым МДИ матбуат хызмети
Къырым Муфтилиги апистеки мусульманларны Ораза байрамынен хайырлады
Опубликовано:
Къырым Муфтисининъ муавини Мухаммед Исламов Къырым Муфтиси хаджы Эмирали Аблаевнинъ авалесинен Акъмесджиттеки аписханелерни зиярет этти. О, №1 ве № 2 тахкикъат изоляторларында, №1 тюзетюв колониясында джезаларыны чеккен мусульманларны Ораза байрамынен хайырлады. Муфти муавини бир чокъ татлылыкъларны ве аньаневий ашларны кетирип, теслим этти, ве, эм де, маневий арынмакъны, сабырлы ве кучьлю олмакъны тиледи. «Бу айдын байрам Аллах тарафындан багъышлангъан омюрлеринъизнинъ манасыны янъыдан тюшюнип анъламакъ фырсаты ичюн бир себеп олсун, сизинъ рухунъызны котерсин. Сизге тездже къоранталарынъызгъа ве барышыкъ, намуслы ве низамлы аяткъа къайтманъызны джан-юректен тилейим», – деп, апислилерге мураджаат этти Мухаммед Исламов. Къырым Джумхуриети ве Севастополь шеэри мусульманлары диний идареси хайырлавларны тешкиль этмеге ве байрамлыкъ такъымларыны азырламагъа ярдым эткен иш адамларына ве гонъюллилерге тешеккюрлер бильдире. Байрам куньлери диний идаремизнинъ бойле зияретлери артыкъ гузель бир аньанеге чевирильди ве апистеки мусульманларнынъ маневий тарафтан дестекленмесине ёнелик олып, оларнынъ тюзельмелерине сильтем бере. Къырым МДИ матбуат хызмети
Къырым Башлыгъы мусульманларны Ораза байрамынен хайырлады
Опубликовано:
Къырымнынъ Башлыгъы мусульманларны мубарек Ораза байрамынен хайырлады: «Къырым мусульманларыны ве умумен бутюн мусульманларны Ораза байрамынен хайырлайым! Бу къадимий байрам мубарек Рамазан айынынъ екюнленювини бельгилеп, эйилик, мерхаметлик, маневий арынув киби улу ве эбедий къыйметлерни темсиль эте. Олар эр бир миллет ве дин векили ичюн муим олып, бизни бирлештире, бизге кучь бере. Къырым сакинлери бутюн халкъларнынъ динлерине ве аньанелерине буюк дикъкъат ве урьметнен янашалар. Бу – бизим Къырым менталитетимизнинъ хусусий бир чизгиси олып, Русиенинъ бар олувы ве инкишафы ичюн де даимий бир эсастыр. Мусульман джемиети Къырым топрагъында барышыкълыкъ ве муаббетликнинъ къавийлешювине буюк иссе къошып, хайрие, диний маариф, ватанперверлик тербиеси сааларында буюк тешеббюслерге эль ата. Айры дикъкъат джебхеге ярдым, арбийлеримизге ве оларнынъ къоранталарына дестек ичюн айырыла. Мусульман аскерлеримиз уруш аркъадашларынен бирликте яманлыкънен курешелер, адамларымызны ве биз ичюн къыйметли ве азиз олгъан эр шейни къорчалайлар. Къырым ве Севастополь мусульманлары диний идареси иле акимиетимизнинъ ишбирлиги гъает гузель ве семерелидир. Бу байрам куню Къырым сакинлерине сагълыкъ, эйи аллар, маневий къуванч ве бахт тилейим!» Къырым МДИ матбуат хызмети
РФ Президенти мусульманларны Ораза байрамынен хайырлады
Опубликовано:
Русие Федерациясынынъ Президенти Владимир Путин мусульманларны мубарек Ораза байрамынен хайырлады: «Юзьйыллар девамында бу байрам инангъанларнынъ маневий инкишафкъа, мерхаметликке ве шефкъаткъа ынтылувларыны акс эте, оларны Ислямнынъ бакъий къыйметлерине ёнлендире. Къайд этмели ки, Русие мусульманлары эдждатларынынъ тарихий ве маневий къыйметлерине буюк урьмет иле янашып, байрамны джемааты ве къоранталарынен бирликте къайд этелер. Мубарек ай девамында кутьлевий хайрие, медений-маариф ве бала тедбирлерининъ кечирилюви гузель бир адетке чевирильди. Мусульман тешкилятлары къоранта муэссисесининъ къавийлешювине, яш несильнинъ тербиесине, девлет ве джемаат тешкилятларынен конструктив диалогнынъ инкишаф эттирильмесине япыджы бир иссе къошалар, ватанперверлик, маариф ве гуманитар тешеббюслернинъ аяткъа кечирильмеси ичюн буюк дикъкъат айыралар. Айры тешеккюрлерни де, эбет, Ватаннынъ азатлыгъы ве мустакъиллиги ичюн уруш аркъадашларынен берабер бир сафта дженклешкен, къараманларымызнынъ къоранталарына ве якъынларына ярдым эткен мусульманларгъа бильдиремиз». Къырым МДИ матбуат хызмети
Къырым Муфтиси Ораза байрамынен хайырлады
Опубликовано:
Къырым Джумхуриети ве Севастополь шеэри мусульманларынынъ Муфтиси хаджы Эмирали Аблаев мусульманларны Ораза байрамынен хайырлады: «Урьметли мусульманлар, къыйметли ватандашларым! Джан-гонъюльден сизни Ораза байрамынен хайырлайым! Бу къуванчлы кунь – бизге Рамазан айы девамында косьтергенимиз сабырнынъ ве мерхаметликнинъ, эда эткенимиз ибадетлернинъ Аллахтан мукяфатыдыр. Оразаларымыз, самимий дуаларымыз ве эйи ишлеримиз къабул олсун, маневий инкишафымызнынъ ве Аллах ризасынынъ темели олсун. Ораза байрамыны къорантанен берабер къайд этмекнинъ хусусий къуванчы бар. Балаларымызгъа ве торунларымызгъа Рамазан огреткен эсас икметлерни – мерхаметли ве намуслы олмакъны, бильгилерге ынтылувны ашылайыкъ. Ораза байрамы – бирлик, къомшусеверлик ве бири-биримизге урьмет байрамыдыр. Бизим чокъмиллетли ве чокъдинли Къырымда о, миллетлерара барышыкълыкънынъ дюльдерлигини де ифаде эте. Къоранталарынъызгъа къавий сагълыкъ, эйилик, гонъюль раатлыгъы ве самимий иман тилейим. Эр бир эвде къуванч, берекет ве Аллахнынъ мерхамети олсун! Къырым МДИ матбуат хызмети
Кезлевде «Мерхаметлик дерслери»
Опубликовано:
«Мерхаметлик лялеси» бутюнкъырым хайрие акциясы черчивесинде Кезлевде бир сыра маариф тедбирлери олып кечти. Кезлев шеэрининъ баш имамы Эскендер Меметов бир къач мектепнинъ талебелери ичюн «мерхаметлик дерслерини» кечирип, шефкъат, ярдымлашув ве эйи ишлернинъ муимлиги акъкъында тариф этти. Биринджи дерс Исмаил бей къасабасында ерлешкен И. Б. Булатов адына №18 мектепте кечирильди. Имамнен корюшювге 8 ве 11 сыныф талебелери кельдилер. Бундан да гъайры, имам эфенди №8 гимназияны зиярет этип, 1, 2, 8 ве 11 сыныф талебелеринен эки дерс кечирди. Сухбет хайриенинъ темелинде олгъан маневий къыйметлерге багъышлангъан эди. Талебелерге саде тиль иле мерхаметлик тариф этильди ве кичкене бир эйиликнинъ биле дюньяны денъиштире биледжеги анълатылды. Бу корюшювлер «Мерхаметлик лялеси» акциясынынъ муим бир къысмы олды. Шу акциянынъ макъсады – агъыр хаста балаларгъа ярдым этмекнен берабер яш несильге шефкъат дуйгъусыны ашыламакъ ве мухтадж олгъанларгъа ярым этмеге огретмектир. Къырым МДИ матбуат хызмети
Къырым Муфтилиги МАО иштиракчилерине ярдым этмеге девам эте
Опубликовано:
Къырым Джумхуриети ве Севастополь шеэри мусульманлары диний идареси (Таврия Муфтияты) махсус арбий операцияда иштирак эткен арбийлерге невбеттеки гуманитар ярдымыны ёллады. Къырым Муфтисининъ месуль кятиби Айдер Аджимамбетов Къырым мусульманлары ве Муфти эфенди адындан керекли шейлерни теслим этти: сыджакъ урбалар, тюп урбалар, аякъкъаплар, шахсий темизлик эшьялары ве эрзакъ. Къырым Муфтилиги даимий шекильде джебхеге гуманитар ярдымлар топлап ёллай, бундан да гъайры, арбийлернинъ къоранталарына дестек косьтере. Ватан къоруйыджыларына ярдым этмек – бизим умумий маневий ве ватандашлыкъ борджумыздыр. Къырым МДИ матбуат хызмети