Mubarek Ramazan ayı soñuna yaqınlaştı. Bu ayda Qırımnıñ bütün camilerinde iftarlar keçirildi. Eñ tolu olaraq, Ramazannıñ soñki 10 künü keçti. İftarlar tek Qırım musulmanlarınıñ degil de, yarımadada yaşağan bütün halqlarnıñ birleşüvi timsali oldı.
Qırım Cumhuriyetiniñ başlığı Sergey Aksönovnıñ imayesi ve buyurığı ile Qırımnıñ bir qaç bölgesinde büyük toplu iftarlar keçirildi. İftarlarnı yerli memuriyetler teşkil ettiler. Hususan, Levadki köyünde Aqmescit rayonı memuriyetiniñ başlığı Denis Kratük; İçki qasabasında İçki rayonı memuriyetiniñ başlığı Viktoriya Gritsay ve Qırım Cumhuriyetiniñ İçki siyaset, malümat ve bağ naziri Vladimir Tregub; Bağçasaray rayonınıñ Mostovoye köyünde – Bağçasaray rayonı memuriyetiniñ başlığı Lüdmila Puçkova ve Bağçasaray şeeri memuriyetiniñ başlığı Dmitriy Skoblikov; Eski Qırımda şeer memuriyetiniñ başlığı Grigoriy Balabanov iftarlar keçirdiler.
“Cumhuriyetniñ rehberiyetiniñ, memuriyet başlıqlarınıñ Ramazan ayında biznen beraber oluvları, öz teşebbüslerinen iftarlar keçirgeni bizni pek quvandıra. Bu birligimizni, bir qoranta olğanımıznı köstere”, – dep, qayd etti Qırım Cumhuriyeti ve Sevastopol şeeri Müftisiniñ muavini Raim Ğafarov.
Qırım MDİ matbuat hızmeti