Ciddede 2020 senesi Rusiye Federatsiyasına berilgen hacılıq kvotaları boyunca protokol imzalandı (FOTO) | ЦРО ДУМК

Четверг

28

марта

18
Рамазан
1445 | 2024
Утр.5:02
Вос.6:20
Обед.12:53
Пол.16:20
Веч.19:16
Ноч.20:34
Времена намазов
Календарь 2024

Намаз

Ciddede 2020 senesi Rusiye Federatsiyasına berilgen hacılıq kvotaları boyunca protokol imzalandı (FOTO)

Опубликовано:

Qırım ve Sevastopol şeeri musulmanları diniy idaresiniñ Tış alâqalar ve hacılıqnı teşkil etüv bölüginiñ reberi Artur Reşitov Rusiye Federatsiyasınıñ hac missiyası terkibinde Saudiye Arabistanı Qırallığınıñ Hacılıq ve ümre naziriniñ muavinii Muhammed Salih Bentan ile körüşüvde iştirak etti. Körüşüv Saudiye Arabistanı Qırallığında RF Mesülietli ve Fevqulade elçisi Sergey Kozlovnıñ destegi ile keçirildi.

Körüşüv devamında taraflar hicriy taqvim boyunca 1441 senesi hacılığına azırlanuv ve Rusiyeden hacılıqqa kelgenlerge lâzim bütün hızmetlerni kösterüvniñ koordinatsiyası meselelerini muzakere ettiler.

Bundan da ğayrı, hac ve ümrenen bağlı umumiy meseleler, Hacılıq ve ümre nazirliginiñ Rusiye hacıları içün taqdim etken hızmetleri ve oñaytlılıqları boyunca meseleler baqıldı.

Rusiye hac missiyasınıñ hacılıqnı yüksek seviyede teşkil etkeni qayd etildi.

Körüşüv çerçivesinde Artur Reşitov Hacılıq ve ümre nazirine Qırım Müftisi hacı Emirali Ablayevden Qırım musulmanları içün hacılıqnı teşkil etüvde destek ve yardımları içün teşekkür bildirgen selâmlav mektübini taqdim etti.

Körüşüvniñ neticesi olaraq, Rusiye Federatsiyası içün 2020 senesiniñ haccı kvotası boyunca protokol imzalandı. 2020 senesinden başlap, Rusiye içün hacılıq kvotası 4500 yerge artaraq, 25 000 yerni teşkil etecek.

Rusiye tarafından protokolnı Rusiye Akimiyeti erkânında Diniy birleşmeler boyunca komissiyasınıñ Hacılıq işleri boyunca mesül hadimi İlyas Umahanov imzaladı, Saudiye Arabistanı tarafından ise, Saudiye Arabistanı Qırallığınıñ Hacılıq ve ümre nazirniñ muavini Abdulfettah bin Suleyman Maşat qol qoydı.

Taraflar 2020 senesiniñ hac kampaniyası, er vaqıt olğanı kibi, yüksek seviyede, qabul etilgen vesiqalarğa esasen keçeceginden emin olğanlarını ifade ettiler.

Rusiye Federatsiyası içün kvota arttırılğanından sebep, Qırım musulmanları içün de kvotanıñ 1 000-gece artması planlaştırıla.

QMDİ matbuat hızmeti