Er yıllıq “Merhametlik” hayriye aktsiyası çerçivesinde Qırım Cumhuriyeti ve Sevastopol şeeri musulmanları diniy idaresinde (Tavriya Müftiyatı) paalı tedaviylenüvge muhtac insanlarnıñ qorantalarına ilâç almaları ve tedaviylenüvden keçmeleri içün maddiy destek kösterildi. Qırım musulmanlarınıñ hayriye fondu ise, Qırım Cumhuriyeti ve Sevastopol şeeri musulmanları diniy idaresiniñ desteginen Qurban bayramı arefesinde muhtac qorantalarğa erzaq torbalarını tarqattı. 14 qorantanıñ vekili Qırım Cumhuriyeti ve Sevastopol şeeri musulmanları diniy idaresine davet etildi. Tedbirde sözge Qırım Müftisi hacı Emirali Ablayev çıqtı. “Er bir qorantanıñ öz ikâyesi bar. Sabırlı oluñız. Allah sabırlı ve adaletli olğanlarnen beraberdir ve, O, mıtlaqa sizge merhametini kösterir. Unutmañız, siz yalıñız degilsiñiz. Bizge keliñiz, öz problemalarıñıznen paylaşıñız. Biz de sizge yardım qolunı uzatırmız”, – dedi Qırım musulmanlarınıñ diniy yetekçisi.
Hayriye fondunıñ işini idare etken Müfti muavini Raim Ğafarov fondnıñ işi ve muhtac qorantalarğa destek leyhaları aqqında tarif etti. Körüşüv güzel müitte yekünlendi.
Qırım MDİ matbuat hızmeti
Telegramm-kanalına abune oluñız – https://t.me/qmdi_org