Майское медениет эвинде Бутюнкъырым «Мерхаметлик лялеси» акциясы черчивесинде парлакъ хайрие тедбири олып кечти. Тедбирнинъ тешкилятчысы – Къырым Джумхуриети ве Севастополь шеэри мусульманлары диний идареси оны Джанкой районы мемуриетининъ дестеги иле кечирди.
Залны топлап толдургъан концерт районда бойле микъяста кечирильген ильк вакъиа олды. Концертте топланылгъан бутюн паралар хайрие макъсатларына, мухтаджларгъа ярдым этмек ичюн къулланыладжакъ.
Санада Джанкой районынынъ энъ гузель иджадий такъымлары иштирак этти:
«Джанкой фиданлары» миллий медениетлер нумюневий ансамбли (бедиий рехбери Айше Рамазанова);
«Филармония» вокал студиясы (рехбери – Къырым Джумхуриетинде нам къазангъан медениет эрбабы Эльмира Бекирова);
Къамаджы (Заречное) ве Къалай (Азовское) бала санат мектеплерининъ такъымлары (мудирлери, сырасынен, Игорь Иваненко ве Иззет Муединов);
Кучюк Алкъалы (Завет-Ленинский) медениет эвининъ артистлери (бедиий рехбер Анна Осетрова);
Окъутувы къырымтатар тилинде алып барылгъан Къамаджы мектеп-бала багъчасынынъ балалары.
Тедбирге урьметли мусафирлер ве джемаат фаалиетчилери тешкриф буюрдылар:
Зенифе Аблаева – Муфтилигимизнинъ диний тедбирлерни тешкиль этюв болюгининъ рехбери,
Азиз Меметов – Джанкой районы мусульман дин джемиетлерининъ реиси,
Якуб Келямов – Джанкой районы мемуриетининъ медениет, миллетлерара мунасебетлер ве дин болюгинде миллетлерара мунасебетлер секторынынъ рехбери,
Людмила Коршунова – «Русие миллетлер ассамблеясы» джемаат-девлет тешкилятынынъ Джанкой район болюгининъ реиси,
Айше Рамазанова – «Джанкой фиданлары» ансамблининъ бедиий рехбери.
Тедбир тек больгенинъ истидатларыны ве медений зенгинлигини нумайыш этмекнен сынъырланмады, эм де инсанларны эйилик япмакъ ичюн бир арагъа кетирген муим мерхаметлик акты олды. Тешкилятчылар бу хайрие акъшамынынъ мувафакъиетли кечирилювине озь иссесини къошкъан бутюн артистлерге, мусафирлерге ве сейирджилерге буюк тешеккюрлер бильдире.
Къырым МДИ матбут хызмети