Акъмесджитте, эрменилер, булгъарлар ве юнанларнынъ сюргюни къурбанларынынъ хатырасы кунюне багъышлангъан матем тедбири олып кечти.
Къырым Джумхуриети ве Севастополь шеэри мусульманлары диний идаресининъ темсильджилери – Къырым Муфтисининъ муавини Раим Гъафаров ве диний тедбирлерни тешкиль этюв болюгининъ рехбери Зенифе Аблаева хатыра тедбирининъ иштиракчилери олдылар. Сюргюн къурбанларынынъ хатырасыны анъмакъ ичюн Акъмесджит шеэр мемуриетининъ, миллий-медений бирлешмелернинъ, дин ве джемаат тешкилятларынынъ векиллери де кельдилер.
В.И. Вернадский адына Къырым Федераль Университетининъ Небатат багъчасынынъ янында ерлешкен сюргюн къурбанларынынъ хатырасына багъышлангъан абиденинъ янына чичеклер къоюлды. Тедбир иштиракчилери сюргюн къурбанларыны сюкюнет дакъикъасынен анъдылар, о дехшетли вакъиаларны унутмамакъ кереклигине ве бирликнинъ, муаббетликнинъ пекитильмеси муимлигине ургъу яптылар.
Хатырлатамыз, 2014 сенеси, Къырым Русие иле бирлешкен сонъ, Русие Президенти Владимир Путин сюргюн этильген халкъларнынъ реабилитациясы ве оларгъа дестек косьтерильмеси акъкъында ферманыны имзалады. Бу весикъа тарихий адалетни ерине кетирди ве Къырымда реабилитация этильген халкъларнынъ инкишафы ичюн омюрге кечириледжек ситематик тедбирлер ичюн укъукъий темель олды.
КЪМДИ матбуат хызмети