Къырым Джумхуриети ве Севастополь шеэри мусульманлары диний идаресине Эски Къырым шеэрининъ мусульман дин джемиетинден ресмий мураджаат кельди. Весикъада мусульманлар Кемаль ата азизи къоругъынынъ саасы кет-кете харабе алына кельгени мунасебетинен джиддий раатсызлыкъ дуйгъаныны бильдирдилер.
Меселени аджеле чезмек ичюн Къырым Муфтилиги махсус мушаверени тешкиль этти. Мушавередеки музакереде мунасип идарелернинъ ве эксперт джемиасынынъ векиллери иштирак эттилер. Араларында Къырым Джумхуриети Медениет назирининъ муавини, Медений мирасны девлет тарафындан сакълав болюгининъ рехбери Андрей Костенко, Эски Къырым шеэри мемуриетининъ башлыгъы Григорий Балабанов, Къырым Джумхуриети Джемаат палатасынынъ азасы, археолог ве тарихчы Эмиль Сейдалиев, филология илимлери намзети, Февзи Якъубов адына Къырым муэндислик ве педагогика университетининъ къырымтатар филологиясы болюгининъ доценти Нариман Абдульвапов, Ислям Терек районынынъ баш имамы Эльдар Маматов, идаремизнинъ диний тедбирлерни тешкиль этюв болюгининъ рехбери, Къырым Джумхуриети Башлыгъынынъ меслеатчысы Зенифе Аблаева, Къырым Муфтисининъ месуль кятиби Айдер Аджимамбетов булунды.
Мушавере нетиджесинде бир протокол тизилип, Кемаль ата азизининъ сакъланылувы ичюн биринджи оларакъ япыладжакъ адымлар бельгиленди.
Къырым МДИ матбуат хызмети