Qırım paytahtında Eşref Şemi-zade adına №42 orta umumtahsil mektebiniñ 25 yıllığı qayd etildi.
Mektepniñ taqımını Qırım Müftisi hacı Emirali Ablayev adından Qırım Müftisiniñ muavini Remzi Qurtdede ve QMDİ diniy tedbirlerni teşkil etüv bölüginiñ rehberi Zenife Ablayeva hayırladılar.
“Bereketli Qırım toprağı bizge ecdatlarımızdan qaldı ve bugün, qırımtatar milliy mektebiniñ yubileyini qayd eterek, talebelerge Noman Çelebicihan, İsmail Gasprinskiy, Eşref Şemi-zade kibi ulu insanlarnıñ yolundan ketmekni tileyim”, – dedi Remzi Qurtdede.
Zenife Ablayevanıñ qayd etkenine köre, mektepniñ yıldönemi em ocalar, em balalar, em de ana-babalar içün büyük bayramdır.
“25 yıl – büyük müddettir. Talebeler bu mektepniñ bir parçası olğanlarından ğurur duymalı. Bizim milliy mekteplerimizniñ suratnen inkişaf etmesi, ocaları ve talebeleriniñ Bütün Rusiye yarışlar ve olimpiadalarda ğalip çıqqanı pek quvandıra. Allah sizni saqlasın ve yubileyni güzel şekilde qayd etmege qısmet etsin”, – qayd etti Zenife Ablayeva.
Tedbirde Milletlerara munasebetler boyunca devlet komiteti başlığınıñ birinci muavini Ruslan Yaqubov, Qırım Cumhuriyeti Tahsil, ilim ve yaşlar naziriniñ muavini Svetlana Bespalova, Aqmescit şeer memuriyeti başlığınıñ muavini, Tahsil idaresiniñ rehberi Tatyana Suhina, Aqmescit şeer şurası başlığınıñ muavini Nadejda Aksönova, Fevzi Yaqubov adına Qırım müendislik ve pedagogika universitetiniñ rektorı Çingiz Yaqubov, Devlet ve şeer şuralarınıñ halq vekilleri, bölge imamları, Boğurça qasabası din cemiyetiniñ temsilcileri, mektepniñ hadimleri ve diger mekteplerniñ müdürleri bulundı.
Başlanğıç sınıflarnıñ talebeleri Rusiye Federatsiyasınıñ, Qırım Cumhuriyetiniñ ve qırımtatar halqınıñ milliy marşlarını icra etti. Tantanalı tedbir devamında musafirler içün meraqlı kontsert programması taqdim etildi.
Qırım MDİ matbuat hızmeti