Qırım Cumhuriyeti ve Sevastopol şeeri musulmanları diniy idaresi yanında çalışqan Qırım musulmanlarınıñ hayriye fondu “Hususiy baqış” hayriye fondu ile beraber ruhiy, psihiatrik, nevrologik ve nutuq inkişafınıñ hususiyetleri olğan balalar ve qorantaları içün bayram keçirdi.
Bayram “Yujnaya Galereya” ticariy merkeziniñ “Balaland” bala merkezinde keçirildi. Anda göñülliler ve animatorlar meraqlı eglence programmasını azırlağan ediler.
Qırım Müftisi hacı Emirali Ablayevniñ adından iştirakçilerni QMDİ diniy tedbirlerni teşkil etüv bölüginiñ rehberi, Qırım Cumhuriyeti Başlığınıñ mesleatçısı Zenife Ablayeva selâmlap, ediyelerni taqdim etti.
“Arañızdaki er bir bala, aqiqaten, emsalsiz ve acayıptır. Biz bu tedbirni balalar cemiyetke açıq yerlerde munasebetlerini serbest qura bilmeleri içün keçiremiz. Em balalarğa, em ana-babalarına sağlıq tileymiz. Biliñiz ki, siz yañğız degilsiñiz. Biz daima destek bermege, yardım etmege azırmız”, – dep, qayd etti Zenife Ablayeva.
Qırım MDİ matbuat hızmeti