Qırım ve Sevastopol Müftisi hacı Emirali Ablayev Bağçasaray rayonındaki “Süren” demiryol durağında yerleşken “Qırım halqlarınıñ ğayrıdan tiklenüv yolu” memorial külliyesinde keçirilgen hatıra merasiminde iştirak etti. Toplanğanlarğa seslengen Qırım musulmanlarınıñ diniy yetekçisi 1944 senesi, mayıs 18 faciasınıñ acısı iç bir kitapqa sığmaycağını qayd etti.
“Elbette, biz bu künni iç bir vaqıt unutmazmız ve unuttırmazmız. Unutmazmız, elbet, amma bu – keçmişteki hatalarımıznı tahlil etmeden yaşamaq kerek olğanımıznı ifade etmey. Qırım Rusiye terkibinde olğan sekiz yıl yaşayışımız devamında bizim güzel kelecegimiz içün ümütimiz peyda oldı. Bu dünya – faniy dünyadır, biz endi bugün balalarımıznıñ ve torunlarımıznıñ kelecegini tüşünmelimiz. Mında cami yanında kelise tura. İşte bu, 1944 senesi, mayıs 18 künü faciasınıñ Qıyamet kününe qadar tekrarlanmaycağına işanç bere”, – dedi hacı Emirali Ablayev.
Qırım Cumhuriyetiniñ başlığı Sergey Aksönov tedbirni açqanda, hacı Emirali Ablayevge halqnıñ hatırasına titiz davranışı içün teşekkür bildirdi. “Bu faciada eñ çoq zarar körgen qırımtatar halqı oldı”, – dep, qayd etti Sergey Aksönov.
Sürgün etilgen halqlarğa destek sözleri ile Qırım Cumhuriyetiniñ Devlet Şurası Başlığınıñ muavini Yefim Fiks, Aqmescitniñ ve Qırım yeparhiyasınıñ vikariyi, Bağçasaray yepiskopı Kalinnik, “Qırım Cumhuriyeti ve Sevastopol şeerinde Roma katolik kilisesiniñ pastoral bölgesi” Merkezleştirilgen diniy teşkilâtınıñ başlığı Yatsek Pıl çıqışta bulundılar.
Qırımtatar devlet akademik muzıkalı drama teatri artistleriniñ temaşa numayışı Ana-Vatandan zorbalıqnen sürgün etilüviniñ dehşetli müitini is ettirdi.
Bundan da ğayrı, ürmetli musafirler “Qırım halqlarınıñ ğayrıdan tiklenüvi yolu” memorial külliyesiniñ müzeyinde numayış etilgen ekspozitsiyanı ziyaret ettiler, musafirlerni serginen Qırımtatar medeniy tarihiy miras müzeyiniñ müdiri Safiye Eminova tanış etti.
Matem tedbiriniñ soñunda abideler yanına güldestelerler qoyuldı ve “Qalbiñde ateş yaq” aktsiyası keçirildi.
Qırım MDİ matbuat hızmeti