İmam Maturidiy adına Qalay islâmiy ilimler medresesiniñ qızlar bölüginde mezuniyet bayramı olıp keçti. Mezunlarnı böyle müim künnen hayırlamaq içün tantanalı tedbirge Qırım Cumhuriyeti ve Sevastopol şeeri Müftisi hacı Emirali Ablayev buyurdı. Öz çıqış sözünde Qırım musulmanlarınıñ diniy yetekçisi bilgi almaqnıñ müimligine urğu yaptı. “Er bir başlanğıçnıñ neticesi bar. Bugün siz medresedeki oquşıñıznı bitirdiñiz, belli bir yol keçtiñiz. Amma bu – daa büyük yolnıñ başlanğıçıdır. Bundan soñ halqqa, Yüce Allahqa hızmet yolu başlana”, – dedi hacı Emirali Ablayev.
Müfti ana-babalarnıñ ve mezunlarnıñ diqqatını tüşüngen insannıñ er vaqıt diniy tahsil almağa tırışqanına çekti. O, qızlarnı aliy diniy oquv yurtlarında tahsillerini devam ettirmege çağırdı. “Üstüñizde büyük mesüliyet bar, siz ana olacaqsıñız. Er şey sizge bağlı. Yaş nesilniñ terbiyesi siziñ elleriñizde. Siz er taraftan bilgili olmalısıñız”, – dep, qayd etti hacı Emirali Ablayev.
İmam Maturidiy adına Qalay islâmiy ilimler medresesiniñ müdiri Edem Lümanov ve talim-terbiye işleri boyunca müdirniñ muavini Ayşe Lümanova da mezunlarğa nasiat etip, muvafaqiyet tilediler. Olar mezunlarğa diniy maarif ve halqqa hızmet yolunda eyiliklerge irişmekni tilediler.
Qızlar da çette qalmadı. Olar tedbirniñ medeniy programmasını azırladılar, ocalar ve ana-babalarğa bağışlap, tesirli şiirler oqudılar, oquğan künleri aqqında öz hatıralarınen paylaştılar.
Qırım MDİ matbuat hızmeti