Moskva şeerinde, Rusiye Akimiyetiniñ hac meseleleri boyunca Vekil, Federatsiya Keñeşi Başlığınıñ muavini İlyas Umahanovnıñ idareciligi altında Rusiye Hac missiyasınıñ keñleştirilgen Toplaşuvı olıp keçti.
Mezkür tedbirde, Rusiyeniñ Hac-missiyası, Müftiler Keñeşi, müsulmanlarnıñ Diniy İdareleriniñ, Federal telükesizlik Hızmetiniñ, RF çetel işleri boyunca Nazirlikniñ, turizm boyunca Federal agentliginiñ, Rospotrebnadzor ve Rusiye aviatsiyasınıñ vekilleri iştirak etti. Qırım müsulmanları Diniy İdaresini Qırım Müftisi muavini Ayder İsmailov ve “AVN-Tur” hac-operatorınıñ vekili Artur Reşitov taqdim ettiler.
Toplaşuv devamında, Hacılıq-2018 mevsiminiñ neticelerini çıqarıp, yekün çekildi ve Hacılıq-2019 teşkil etüv işleri boyunca müim qararlar qabul etildi. Hacılıq mevsimine azırlıq, turoperatorınıñ mesülietligi, avia bağ-alâqası boyunca añlaşmalarnıñ imzalanuvı, Rusiye kvotalarınıñ taqsimlenüvi, Saudiya Arabistanına kirmek içün viza kibi meseleler muzakere etildi.
2019 senesi Rusiye Federatsiyasından, hacılıq ibadetini 22000-den ziyade insan yerine ketirdi. Hac-missiyası vekilleri, Rusiye Federatsiyası Hac-missiyası tarafından qayd etilgen regional hac-operatorlarınıñ yüksek seviyedeki işlerine müsbet qıymet kesti.
Qırım Müftisi muavini Ayder İsmailovnıñ bildirgenine köre, toplaşuvda, Saudiya Arabistanında bulunğan hacılarnıñ oñaytlı şaraitleriniñ eyilişüvi ile birlikte, aynı zamanda, devlette ekonomik şartlar deñişe, bu cümleden, hac ziyaretiniñ fiyatına tesir etebilecek vergi seviyesi artmaqta.
Muşavere çerçivesinde, hacılıqqa ketkenlerniñ umumiy elektron cedevelini tizmek qararı qabul etildi. Bugünki künde mahsus Sertifikatnıñ şekili işlenilip çıqarıldı ve hac-turı içün para tölengende, hacılıqqa baracaq er insanğa individual Sertifikat taqdim etilecek.
Bundan ğayrı, turoperatorlarınıñ, Rusiye hacılarına hızmet kösterüv içün nezaret daa ziyade artacaq.
Ayder İsmailovnıñ aytqanına köre, mezkür müim qararlar, qanundan tış faaliyet köstergen turoperatorlarınıñ mesülietsiz areketlerini ögünden aldırmaq sebebinden qabul etildi.
Ayder İsmailov: “İnsanlarğa nisbeten kösterilgen mesülietsizlik neticesinde, 1000-den ziyade insanlardan para ve vesiqalar toplanıldı, lâkin şu hacılar hacılıqqa öyle de barıp olamadı. İşbu sertifikatsiya aqqında qarar hacılarnı çeşit telükelerden qorumaq içün alındı”, dep qayd etti.Bugünki künde, Rusiye Federatsiyası Hac-missiyası tarafından qayd etilgen hac-operatorlarınıñ cedveli endi tizildi. Litsenziyanı elde etken cemi 9 hac-operatorı faaliyet köstermekte. Astını çızaraq, qayd etmeli ki, mezkür cedvelge kirmegen tur-agentlikleriniñ ve tur-operatorlarınıñ, hacılıq ziyaretini teşkil etmek ve hacılarnı Saudiya Arabistanına alıp ketmek aqqı yoq.
RF Hac-missiyasınıñ toplaşuvı devamında, Rusiye Federatsiyasınıñ regionlarındaki Diniy İdareleri arasında kvotalar bölündi. Bu yıl Rusiye içün kvota sayısı aynı qaldı. Qırım Cümhuriyeti içün kene de 600 yer olıp qaldı. Aynı zamanda, Qırım Müftiligi RF Hac-missiyasına, mezkür kvota saysını 1000-ce arttırmaq ricası ile resmiy mektüp yolladı. İlyas Umahanov, öz nevbetinde, kvotalarnıñ qoşuluvı meselesi ileride de RF çetel işleri boyunca Nazirlik ile birlikte baqılacaq. Bundan ğayrı, Saudiya Arabistanına hacılarnıñ kirmesi içün lâzim olğan viza vesiqası almaq içün qolaylaştırılğan şekili muzakere etilecek.
Toplaşuv tedbiriniñ soñunda, 2018 senesi, Saudiya Arabistanı Qırallığına olıp keçken, hacılıq meseleleri ile meşğul olğan erkânnıñ ziyaretine ve Saudiya tarafı ile keçirilgen añlaşmalarğa yüksek qıymet kHatırlatamız ki, bu yıl hacılıq mevsimi avgustnıñ 9-dan 14-ne qadar devam etecek.
QMDİ MDT matbuat merkezi
