Февзи Якъубов адына Къырым муэндислик педагогика университетинде Халкъара динлерара яшлар форумынынъ сонъки топлашувы олып кечти. Тедбир Къырым Джумхуриетинде В. И. Вернадский адына Къырым Федераль Университетиндеки Яшларда фааль ватандашлыкъ мевамынынъ шекиллендирильмеси, миллетлерара ве динлерара конфликтлернинъ профилактикасы, терроризм мефкуресине къаршылыкъ берюв ве экстремизмге къаршы профилактика меселелери боюнджа координация меркези тарафындан кечирильди.
Къырым алий окъув юртларынынъ студентлери ичюн «Мерхаметлик – сёзлерден ишлерге догъру. Динлернинъ ичтимаий лейхалары» музакере мейданы къурулды. Тедбирде Къырым Муфтисининъ муавини Раим Гъафаров, Акъмесджит ве Къырым епархиясынынъ миссионерлик болюги рехберининъ муавини, протоиерей Максим Кондаков, Акъмесджит шеэри Эрмени Апостол кильсесининъ башлыгъы, иерей Нерсес Хананян, Къырым Джумхуриети Ички сиясет, малюмат ве багъ назирлигининъ миллетлер ишлери ве диний тешкилятларнен ишбирлик боюнджа болюгининъ рехбери Валентин Чуприн иштирак эттилер. Тедбирни В. И. Вернадский адына Къырым Федераль Университети Координация меркезининъ мудири Елена Губанова алып барды.
Ачыкъ музакере эснасында Къырым Джумхуриетиндеки чешит дин джемиетлерининъ ичтимаий лейхалары такъдим этильди. Къырым Муфтисининъ муавини Раим Гъафаров Муфтилик тешкиль эткен хайрие акцияларыны, ярышларны, диний тедбирлерни ве Махсус арбий операция иштиракчилерини дестеклеген тешеббюслерни такъдим этти.
Музакере эснасында талебелер спикерлернен инсанларнынъ дюньябакъышы шекилленювине энъ чокъ тесир эткен маневий къыйметлерден бири оларакъ, мерхаметлик акъкъында сухбетлештилер. Иштиракчилер мерхаметликнинъ менбасы, онынъ медениетнен багъы, земаненинъ мушкюллери къаршысында инсаниетликни сакълап къалмакъ ве конфликтнинъ о бир тарафында тургъан кишилерге мерхамет косьтермек киби меселелерни музакере эттилер.
Тедбир муфтилигимизнинъ эр йыл кечиргени «Мерхаметлик лялеси» акциясынынъ гимнини ве клипини нумайышынен екюнленди. Эсер Раим Гъафаров тарафындан иджат этильди, Лозовое махсус мектеп-интернатнынъ талебелери исе, оны иджра эттилер.
Къырым МДИ матбуат хызмети