Акъмесджитте, Февзи Якъубов адына Къырым муэндислик педагогика университетинде «Земаневий джемиетнинъ медиа керчеклери: интегратив медениет» мевзусында халкъара конференция олып кечти. Иштиракчилер огюнде селямлав сёзлеринен чыкъышта булунгъан урьметли мусафирлер арасында Къырым Муфтисининъ муавини, Къырым Джумхуриети Девлет Палатасынынъ азасы Раим Гъафаров бар эди.
Конференцияны журналистика кафедрасынынъ башлыгъы Егорова Людмила Геннадьевна ачты, о, ишдешлерни ве студентлерни илим байрамынен хайырлады.
Бундан да гъайры, иштиракчилерни ильмий ве информация фаалиети боюнджа проректор, педагогика илимлери докторы, профессор Татьяна Гордиенко, тарих, санат, къырымтатар тили ве эдебияты факультетининъ деканы, филология илимлери намзети, доцент Эмине Гъаниева, Къырым Джумхуриети Девлет Палатасынынъ кутьлевий матбуат васталары боюнджа иш такъымынынъ азасы, «Русие бугунь» халкъара информация агентлигининъ «Къырымда спутник» радиосында махсус лейхалар болюгининъ рехбери, Къырым Джумхуриетинде нам къазангъа журналист Ирина Мульд, Кубань девлет университетининъ тарих ве кутьлевий коммуникацияларнынъ укъукъан регуляция этильмеси факультетининъ рехбери, филология илимлери докторы, профессор Юрий Лучинский селямладылар.
Конференция черчивесинде беш тематик секция чалышты: «Медиа ве диджитал медениет», «Медиа ве кросс-медений коммуникация», «Медиарегионалистика», «Тиль медениети ве медиа», «Медиа медениети ве тахсиль».
Къырым МДИ матбуат хызмети








