Ярымада мусульманларынынъ аятында Украина заманындан къалгъан ве Къырым джемиетини больмек макъсадыны къойгъан фыркъаларнынъ темизленюви ёлунда янъы саифе ачылды.
Оларнен разы олмагъан бутюн Къырым мусульманларына душманлыкъ ве нефрет сачкъан хабашизм деген фыркъанынъ тарафдарлары Кезлевде ерлешкен тарихий Хан Джамини Украинадан кельген фыркъаджыгъылыгъынынъ меркези оларакъ къулландылар, андан текфир мефкуресини яя эдилер.
Ишбу фыркъанынъ менсюплери ярымадамызда гизлиден медреселер ве чешит диний меркезлер агъыны къурдылар. Амма диний спекулянтларнынъ фаалиети Къырымнынъ къанункъоруйыджы ве махкеме идарелери тарафындан токътатылды.
2024 сенеси хабашийлернинъ Акъмесджит районындаки «медресеси» ве Акъмесджит шеэриндеки диний меркези къапатылды. Меркез къапатылгъан сонъ, махкеме органлары къанунсыз къурулгъан бинаны йыкътырмакъ джереяны башлатылды.
2025 сенеси, майыс 7 куню хабашийлернинъ «Хан-джами» адындаки дин джемиети лягъу этильди. Фыркъаджыларнынъ дин джемиети ёкъ этильмеси мунасебетинен Къырымнынъ Арбитраж махкемеси о дин джемиетининъ Кезлев шеэрининъ мемуриетине ве Къырым мусульманлары диний идаресине къаршы ачкъан даваларыны къапатты. 2025 сенеси, декабрь 26 куню укъукъкъоруйыджы органлар тарафындан Къырымнынъ къадимий джамисини хабаший баскъынджылардан азат этмек ичюн бутюн керекли къануний тедбирлер алынды.
Узун вакъыт девамында, фаркълы махкемелернинъ къарарларына къаршы чыкъып, озьлерини «Хан-джами» джемиети оларакъ адландыргъан фыркъаджылар такъымы къанунсыз шекильде, зорбалыкъ этерек, тарихий-медений асабалыгъымызнынъ федерация севиесинде козьде бир инджиси олгъан абидени запт эткен эдилер.
Мусульманларнынъ мукъаддес мекяныны аджыныкълы алгъа кетирген, ибадет еринде уйгъун олмагъан ходжалыкъ фаалиетини алып баргъан, джамини келип-кечкен кишилер ичюн ятакъханеге чевирген шу хабаший къурумы укъукъкъоруйыджы органларынынъ махкеме къарарыны ерине кетиргенлери вакъыт, оларгъа къаршы чыкъышты.
Ич бир ресмий весикъалары олмагъан, антитеррористик тедбирлерни алмагъан хабашийлер джамиге кельген джемаатнынъ ве мусафирлернинъ омюрлерини ве сагълыкъларыны техлике астында къалдыра эдилер. Шу баскъынджыларнынъ джамини тутып алгъанлары вакъыт ичинде мимарий абиде дехшетли бир алгъа кетирильди. Джамиде бельгисиз кишилер яшай эди.
Тарихий-медений асабалыкъ объекти аджыныкълы вазиетте – ичинден де, тышындан да. Ильк бакъышта бина энъ азындан умумий тамир ишлерине мухтадж. Бинанынъ физикий вазиетини огренмек ичюн Къырым Муфтилиги Къырым Джумхуриети Медениет назирлигининъ Медений мирас департаментине мунасип мураджаатта булунды. Мунасип идарелернинъ джамининъ алыны бельгилегенлерине къадар, тамир ишлери кечирильмек керек олгъанындан, джемааткъа ве зияретчилерге зарар берильмесининъ къаршылыгъыны алмакъ ичюн, джамининъ вакъытынджа къапатылмасы акъкъында къарар алынды.
Къырым Муфтилиги Хан Джамининъ тездже джемааткъа ве мусафирлерге къапыларыны ачмасы ичюн керекли бутюн тедбирлерни аладжакъ.
КЪМДИ матбуат хызмети