Имам Матуридий адына Къалай ислямий илимлер медресесинде бу сене окъув юртунынъ куньлюк болюгине окъушкъа киреджек абитуриентлерден весикъалары къабул этильди, абитуриентлер тестлерден кечтилер. Тестлер черчивесинде темель Ислям бильгилери, къырымтатар тили ве эрудиция боюнджа суаллерге джевап бермек керек.
Бундан да гъайры, ана-бабаларнен умумий топлашув кечирильди, ве медресе рехберлиги окъувнынъ программасы, кунь тертиби, медреседеки шараит ве алып барылгъан тербие иши акъкъында тафсилятлыджа тариф этти.
Хатырлатамыз, медресенинъ гъыябий болюгине киреджек абитуриентлернен мулякъат август 16 куню, саат 11.00-де, Акъмесджит шеэри, Клара Цеткин сокъагъы, 34 адресинде ерлешкен Сейит Сеттар джамисинде кечириледжек.
Къырым МДИ матбуат хызмети