Имам Матуридий адына Къалай ислямий илимлер медресесинде «Къырымда диний тахсиль. Тарихий теджрибе ве земаневий керчеклер» программасы боюнджа дин оджалары ичюн ихтисас юксельтюви курсу олып кечти. Курснынъ тешкилятчысы – Къырым Джумхуриети ве Севастополь шеэри мусульманлары диний идареси (Таврия Муфтияты). Программа эки окъув кунюне къарарлаштырылгъан эди.
Курсларда имамлар, мусульман дин джемиетлерининъ реислери ве дин оджалары иштирак эттилер. Программа черчивесинде Къырымда диний тахсильнинъ тарихий теджрибеси ве бугуньки вазиети тедкъикъ этильди, бундан да гъайры, диний тахсиль системасынынъ къурулувы принциплери де тахлиль этильди.
Курсны тантаналы шекильде Къырым Муфтисининъ муавини Раим Гъафаров ачты.
Курнынъ эсас макъсады – эалининъ кейфиетли диний тахсилини ве маневий-ахлякъий тербиесини теминлемек ичюн больгелеринде кураторлар функциясыны беджерген дин оджаларынынъ ихтисасыны юксельтмектир.
Къырым МДИ матбуат хызмети