Имам Матуридий адына Къалай ислямий илимлер медресесининъ къыз болюгинде талебелернинъ келеджегинен багълы муим бир корюшюв олып кечти. Тедбирде Къырым Джумхуриети ве Севастополь шеэри мусульманлары диний идаресининъ векиллери – Муфтилигимизнинъ диний тедбирлерни тешкиль этюв болюгининъ рехбери Зенифе Аблаева ве Тахсиль болюгининъ рехбери Гульчер Зекерьяева, бундан да гъайры, В.И. Вернадский адына Кырым федераль университетининъ филология институтындаки къырымтатар тили филологиясы кафедрасынынъ рехбери Эдие Меметова иштирак эттилер.
Корюшювнинъ эсас макъсады – медресе мезунларына келеджекте зенаат сайламакъ мевзусында ярдым этмектир. Иштиракчилер алгъан бильгилерининъ келеджекте къулланылувы меселесинде бир сыра имкянларны музакере этти – диний маарифтен ве оджалыкъ фаалиетинден башлап, ильмий-тедкъикъат ишлерине ве тувгъан тиль иле медениетнинъ теренден огренилювине къадар.
Зияретлери черчивесинде Муфтиликнинъ мутехассыслары медресенинъ китапханесине къыйметли китапларны – улу алим ве маарифчи Усеин Боданинскийнинъ эсерлер джыйынтыгъыны ве «Къырымнынъ тарих козетмелери» ильмий неширининъ джылтларыны такъдим эттилер. Бу китаплар тахсиль джереяны ве къызларнынъ тедкъикъатлары ичюн муим бир ресурс олып, аньаневий диний бильгилер иле земаневий академик илим арасында багъларны пекитир.
Къырым МДИ матбуат хызмети