Къарасувбазар районынынъ медениет эвинде Аналар кунюне багъышлангъан концерт программасы олып кечти. Байрам тедбиринде фаркълы несиллерге аит сакинлер самимий муитте энъ азиз инсан – анагъа севгини ве миннтедарлыкъны бильдирмек ичюн топландылар.
Санада ана сыджагъы, къайгъырувы ве сонъсуз дестеги ичюн онъа миннетдарлыкъ сёзлери сеслендирильди. Къарасувбазар районы мемуриетининъ адындан чокъбалалы аналаргъа тешеккюрнамелер такъдим этильди. Мукяфатландырув ве хайырлав мерасиминини район мемуриетининъ медениет ве миллетлерара мунасебетлер болюгининъ башлыгъы Анна Горбенко кечирди.
Яш несильнинъ диний-ахлякъий тербиесине салмакълы исе къошкъаны себебинен диний идаремизнинъ оджасы Зера Хабипованынъ фаалиетини хусусий тешеккюрнаменен такъдир эттилер.
Сейирджилерни ренкли концерт программасы къувандырды. Ишбу байрам къоранта къыйметлерине ве ана эмегине урьмет косьтерильмесининъ ачыкъ мисали олды.
Къырым МДИ матбуат хызмети