Акъмесджитте, Кебир Джамиде 2026 сенеси хаджылыкъкъа бараджакъ мусульманлар ичюн эр йыл кечирильген семинар олып кечти. Семинарнынъ тантаналы къысымында Къырым Муфтисининъ муавини, Къырым мусульманлары диний идаресининъ тышкъы мунасебетлер ве хаджылыкъны тешкиль этюв болюгининъ рехбери Артур Решитов чыкъышта булунып, хаджылыкъ ёлджуларына огъурлы ёллар тиледи. О, Къырым Муфтиси хаджы Эмирали Аблаев адындан мусульманларгъа хаджылыкъкъа бармакъ ярдым эткен бутюн муэссиселерге ве идарелерге тешеккюр бильдирди, ве хаджылыкъкъа чыкъаджакъ мусульманларнынъ эйилиги ичюн дуа япты.
Семинарда хаджылыкъ ёлджуларына ачыкъ ёллар тилеп, фаркълы муэссиселернинъ ве идарелернинъ векиллери чыкъышта булундылар: Акъмесджит шеэринде Русие Тыш ишлер назирлигининъ темсильджиси Артём Березовский, Къырым Джумхуриети Миллетлерара мунасебетлер боюнджа девлет комитетининъ миллетлерара мунасебетлер ве мигрантларнынъ ичтимаий-медений адаптациясы идаресининъ рехбери Длявер Османов, Къырым Джумхуриети ве Севастополь шеэринде Роспотребнадзорнынъ векили Сергей Цыганов.
Семинар черчивесинде, аньаневий оларакъ, Диний идаремизнинъ дин оджалары чыкъышта булундылар. Олар келеджек хаджыларгъа талимат бердилер, хаджнынъ деврелерини ве ибадетлерини анълаттылар, оларнынъ маналары ве эмиети акъкъында тариф эттилер. Хаджылыкъ такъымларынынъ рехберлери амелий тевсиелер бердилер ве хаджны гузельдже эда этмек ве ватангъа къайтмакъ ичюн насыл этип, хаджылыкъ ёлджулыгъына азырланмакъ, хадж эснасында озюни алып бармакъ кереклигини анълаттылар.
Хаджылыкъкъа кетеджек мусульманлар учь этапнен ёлгъа чыкъаджакълар – майыс 08, 14 ве 18 куньлери.
Хаджылыкъ боюнджа семинар эр йыл диний идаремизнинъ хадж операторы «АВН ТУР» иле бирликте тешкиль этиле. Онынъ макъсады – хаджы оладжакъ мусульманларны Ислямнынъ беш темелинден бири олгъан хаджылыкъкъа эм маневий, эм де тешкилий джеэттен азырламакътыр.
Къырым МДИ матбуат хызмети