Кезлевде «Биз гъалебенинъ мирасчыларымыз!» XII больгелерара иджадий ярышнынъ ярымфиналы олып кечти. Санагъа Кезлевде, Сакъта, Сакъ ве Акъмечит (Черноморское) районларында муниципаль басамакъларнынъ биринджи ве экинджи ерлерини къазангъан гъалиплер чыкътылар.
Бу куню жюрининъ дикъкъатына 17 иджадий чыкъыш такъдим этильди: 7-си – кичкенелерден ве 10-у – даа буюк олгъан балалардан. Яш артистлер йырлар, оюнлар, эдебий-музыкаль композициялар ве Улу Ватан дженкинде косьтерильген къараманлыкъларгъа багъышлангъан саналаштырмалар иле озь истидатларыны нумайыш эттилер.
Ярышчыларгъа дестек косьтермек ичюн, тедбирге шеэр ве район мемуриетлерининъ векиллери, дин эрбаплары ве ана-бабалар кельдилер. Жюри теркибине Къырым мусульманлары диний идаресининъ диний тедбирлерни тешкиль этюв болюгининъ азасы Зенифе Аблаева кирди.
Лейханынъ гъае ильхамджысы ве рехбери Елена Аксёнова иштиракчилерге ве оджаларгъа мураджаат этип, япкъан буюк ишлери, шу мевзуны теренден огренгенлери ве тарихны сакълагъанлары ичюн, оларгъа самимий тешеккюр бильдирди.
Ярымфиналнынъ гъалиплери больгелерини ярышнынъ финалында темсиль этмек акъны къазандылар. Адет узере, финал Акъмесджит шеэринде кечириледжек.
Къырым МДИ матбуат хызмети