Къырым Муфтисининъ муавини Мухаммед Исламов №2 тахкикъат изоляторыны зиярет этип, анда ходжалыкъ такъымындаки махкюмлернен корюшти. Миллий бирлик кунюне багъышлангъан тедбир черчивесинде махкуюмлер арасында викторина отькерильди, иштиракчилер Ислям, православ христианлыкъ ве ехудий динлери акъкъында суаллерге джевап бердилер. Ярышта фаркълы дин векиллери иштирак эттилер.
«Бу бири-биримизни якъынджа огренмеге ярдым эте, бутюн динлерни бирлештире. Бойледже, биз фаркълы динлер арасында динлерара диалог къурулмасынынъ эмиетине ургъу япамыз», – деп, къайд этти Мухаммед Исламов.
Бундан да гъайры, Къырым Муфтисининъ муавини Акъмесджитнинъ №1 тюзетюв колониясында динлерара иш группасыны зиярет этти. Корюшювнинъ мевзусы аписханеде къурулгъан килисенинъ юбилейлик йылдёнюми олгъан. Зиярет эснасында джеза чеккен мусульманларнен шахсий корюшювлер олып кечти, бойледже, оларнынъ диний ихтияджлары ве меселелери музакере этильди.
Эр эки зиярет джемиетимизни бирлештиреджек бирлик ве къаршылыкълы урьмет принциплерининъ бирер мисали олып, динлерара ишбирликнинъ ве къаршылыкълы анълайышнынъ къавийлешюви ичюн муим адым олды.
Къырым МДИ матбуат хызмети